Lesoni e Vulici ni Sureti o Karisito me Vola na Kequ iTalanoa

Au a saga na vuli torocake, na rawati ni koroi ena univesiti kei na koroi ni lawa. Au a vakamau ena gauna au a vulica tiko kina na veika vakalawa. A sucu na imatai ni luvequ tagane ena yabaki au a rawata kina na veitarogi ni vuli loya. Au a vakaluveni, ka keirau a taleitaka kei watiqu me susugi ka lomani iratou ni keirau cakacaka ruarua tiko. Ea osooso, ka so na gauna ea vakariri; keirau bolei ka so na gauna dau oca vakalevu. Au tokoni koya, ka tokoni au o koya. E bibi duadua tiko ga na neirau vuvale mai na gauna oya, ki na siga nikua. Keirau a vakasaqara vakaveiwatini na veivakauqeti ena veidigidigi oqo ka vakakina na kena gauna donu. Oya na ka keirau a vakauqeti me keirau cakava. Keirau a saga tiko me qaqa na Kalou.

Mai na rai vakailavo kei na rai vakacakacaka, ena vakaibalebale beka meu a vakadaroya na vakaluveni me yacova niu sa vakadeitaki ena noqu cakacaka. Ia nida vakatara vua na Turaga me vola na keda italanoa, eda na dau cakava ena so na gauna na veika e sega ni vakaibalebale vei vuravura. Au a vakatulewataka vakavinaka na noqu bukete, vakasucu gone, susu gone, draiva ki cakacaka, isoqosoqo lalai, itavi vaka Lotu, vetokoni vei watiqu, kei na noqu sasaga vakacakacaka. Ea dua na ka rekitaki au na sega ni veisautaka. Keirau yalodei ena neirau ilakolako baleta ni keirau a vakatara me qaqa tiko ga na Kalou.

Yalovinaka kua ni nanuma cala. Au sega ni vakatura moni muria kece na noqu ilakolako. Na noda italanoa era sega ni tautauvata. Au wasea na noqu baleta ni oqori na ka au kila. Ia, e tautauvata kece na ka e vakauqeti keda tiko: oya meda vakatara na Kalou me qaqa tiko ga.

Meu dua na tina sa ka bibi duadua vei au. E kauta mai vei au na reki cecere duadua. A vakalougatataki rau na noda itubutubu taumada na Kalou ka vakaroti rau merau “vakaluveni, ka tubu me lewe vuqa, ka vakatawai vuravura” (Nai Vakatekivu 1:28). Na imatai ni ivakaro a soli vei Atama kei Ivi “sa baleta na nodrau rawa ni rawata na bula vakaitubutubu.”

Na veika au vakaliuca taumada e vakanamata kina na bula vakatina. Na vakanamata oqori a sega ni veisaqasaqa kei na noqu sasaga vagumatua ena vuli. Eda sa vakaroti meda vakasaqara na kilaka—ka so e yaco ena noda sasaga ni vuli. E yaco talega mai na bula vakaitubutubu, na vanua eda vulica kina meda vaka na kalou nida bucina na ivakarau ni loloma, yalololoma, kei na vosota.

Na noda vakatara me qaqa tiko ga na Kalou e oka kina na noda sureti Koya me vakaitavi ena gauna ni noda digidigika.

Au vakavinavinaka tawamudu niu a ciqoma na veivakauqeti mai vua na Turaga kei na veidusimaki mai vei ira na parofita me keirau vukei vakaveiwatini ena gauna ni neirau digidigi me sureti ira na gonelalai kina neirau matavuvale ena gauna keirau a cakava kina. Au vakavinavinaka vakalevu niu a cakacakataka na veivakauqeti ka sega ni vakatara na veivakayarayarataki vakavuravura, bula rawarawa, na dokai, se ilavo me vakataotaka na digidigi meu rawata kina na noqu icavacava vakalou ena nodra vakasucumi ka susugi cake na gone.

Women with and without Children [Yalewa era Vakaluveni kei ira e sega], mai vei Caitlin Connolly, e sega ni vakatarai me lavetaki

Na iNaki ni Noda Buli

Kevaka era muduka na tagane kei na yalewa na vakaluveni kei na susu gone, sa na cava na bula oqo. Sa ka bibi sara kina, meda kakua ni vakaweleweletaka se vakawalena na itavi tabu vakaitubutubu.

E levu sara na itukutuku ni vakadidike ni veimaliwai e vakaraitaka na veivakayarayarataki, kei na revurevu ca kina veimatanitu kei na veimatatamata era muduka na vakaluveni. Ena vuqa na veiyasai vuravura, na iwiliwili vakatautauvata ni sucu bula vua edua na yalewa e lailai mai na rua. Kena ibalebale ni sega na keda isosomi.

Vaka iliuliu ni Lotu, keimami kauwai tiko vakalevu kina ivakarau sa yaco tiko oqo ena vakamau kei na vakasucu gone. E Amerika, ena 30 na yabaki sa oti, keimami raica ni lutu ena walu ki na ciwa na pasede na poidi ni lewenivanua era sa bau vakawati oti. Na iwiliwili oqo “e tukuna tiko edua na leqa e vuravura raraba.” Ni ra sega ni vakawati na tamata, era na lewe lailai na gone era na sucu mai.

O Amerika ena dua na gauna lekaleka oqo a yacova kina edua na “ivakatagedegede, vei ira na uabula yabaki 18–55, e levu cake kina na iwliwili ni uabula sega ni vakawati ka sega na luvedra mai vei ira na uabula era vakawati ka vakaluveni.”

Era sa ka bibi sara na gone ena kena maroroi na bula ni kawatamata. Era sa bibi sara kina ituvatuva lagilagi ni marau. Na ivakaro vei keda meda tubu ka vakatawai vuravura “e se dei tiko ga.”

Tiki ni droini mai na Us with Them and Them with Us [O Ira kei Keda kei Keda kei Ira], mai vei Caitlin Connolly, e sega ni vakatarai me lavetaki

Laiva na Turaga me Vola na Kemu iTalanoa

Au kila na nodra gagadre dina e vuqa na tamata mera vakawati ka susugi ira cake na gone. Ia e vuqa era sega ni vakawati se ra sega ni rawa ni kunekunetaki. Na noqu itokani voleka duadua, ka se bera vakadua ni bau vakawati se vakaluveni, edau lomani ka kauwaitaki iratou na luvequ. E sega nira isosomi kei luvena. Sa ivakadinadina ni nona vakanamata tiko ga ki na bula vakatina.

O luvequ tagane kei na vugoqu yalewa erau sotava vakavica vata na bolebole ni veivakasucumi mate. E dodonu tu na nodrau gagadre. Erau vakasaqara tiko me qaqa tiko na Kalou ena nodrau bula. Meda nanuma, nida kerea ena vakabauta meda vakatarai Jisu Karisito me vola ka tinia na noda italanoa, sa dodonu meda tu vakarau meda sotava na veibolebole ena kauta mai na tubu vakayalo ena vakanuinui ni dina ena mosimosi, ia ena cecere ka vakasilesitieli cake mai na kena eda rawa ni vakasamataka.

Vei ira na noqu itokani lomani, erau a tiko kina edua na veiwatini sega ni vakaluveni ka rau a vakawati bera ka sega ni rawa ni vakaluveni. Erau a taroga ena vakabauta se dodonu beka merau susu gone. Erau a vakauqeti merau susugi iratou e va na veitacini yalewa—mai na yabaki 5 ki na 17 ka sega na gone dramidrami. Ea vinaka vakaidina, ia a sega ni italanoa erau a vola me baleti rau. Ia, sa dua dina na italanoa vakasakiti a vola vata kei rau o Koya.

Se cava ga na keda ituvaki yadua, eda sa tiki kece ni matavuvale ni Kalou, lewe ni dua na matavuvale vakavuravura, ka vakavakarau tiko meda itubutubu tawamudu. Na veivakalougatataki ni bula vakacerecerei sa vakarautaki tu vei keda mai vua na iVakabula, o Jisu Karisito, e oka kina na vakawa. O koya gona, se da vauci ka vakaluveni ena bula oqo se na kena e tarava, na noda takete na bula vakacerecerei—ka rawa ni noda kevaka eda cakava ka maroroya na veiyalayalati. Ni da curuma edua na veiwekani ni veiyalayalati kei na Kalou, eda vauci ki lagi vei Koya, ka da na sega vakadua ni tu duadua. Eda vakalougatataki “ena dua tale na ivakarau toro cake ni [Nona] loloma kei na loloma veivueti.”

Ni da tamata ni veiyalayalati, eda tuvanaka ka vakavakarau kina vakawati ka meda vakaluveni ka susugi ira cake na gone. Sa dua dina na veikacivi vakalou ka tabu! Eda loloma ka veiliutaki ka veiqaravi ka bula vakaitubutubu meda vakaraitaka na noda lomana na Kalou kei ira na Luvena—baleta ni da vinakata me qaqa o Koya ena noda bula.

Oqo edua na gauna lagilagi meda bula kina ka caka veiyalayalati e Na Lotu i Jisu Karisito ni Yalododonu Edaidai. Na kilai vakavinaka ni noda ilesilesi, inaki, kei na itavi ena ituvatuva ni bula marau e ka dokai, veivakadeitaki, ka rekitaki. Na kena kilai ni tiko edua na parofita bula ka vakarautaki keda tiko kina veika sa tu mai liu e kauta mai vei au na vakacegu kei na inuinui ena loma ni veilecayaki. Na noqu veiwekani ni veiyalayalati kei na Kalou e solia vei au na yalodei. Na noqu yalodei ena veiyalayalati sa vu mai vei Karisito.

Au vakadinadinataka ni bula tiko o Koya, ni Nona lomani keda e vakaraitaki ena Nona lomasoli me solia na Nona bula ka Veisorovaki ena vukuda yadua.