O Sa Vakamarautaki Nomu Bubu

Mai vei Shirley Ann Slade Brown, Arizona, Amerika

A sega ni kila o tavalei buqu na bibi ni nona isolisoli kei na nona itukutuku vei au.

itaba ni vakamau ni bubu nei koya ka volavola

Niu tubu cake vata kei rau na itubutubu didivara, au a kila vinaka nia duatani na noqu matavuvale. Niu se gone, a sega ni dua me vakadewa vei rau na noqu itubutubu ena soqoni se itaviqaravi ni Lotu, ka vakavuna me keitou sega ni dau tiko vakawasoma.

Au dau vakila niu vaka edua e tiko mai taudaku ka rai tiko yani ki loma, ka vinakata na veika e tiko vei ira na lewe ni noqu tabanalevu tale eso—oya edua na matavuvale eratou dau masu ka vuli vata.

Ni voleka ni cava na iotioti ni noqu yabaki ena koronivuli torocake, keitou sa tekivu vakaitavi sara vakalevu ena Lotu. Erau a vauci vata na noqu itubutubu ena valetabu na Mesa Arizona Temple, ka rua vei iratou na va na taciqu keitou a vauci vei rau.

Ni oti e lima na yabaki, au a vakavakarau tiko meu vakaedaumeni ka vakamau ena valetabu. Ena bogi ni bera na noqu vauci e valetabu, erau a lako ki valetabu o ganequ kei watina merau lai qarava na cakacaka veisosomitaki vei rau na itubutubu nei tinaqu ena nodrau vakavakarau kina nodrau vauci ena siga ka tarava. A saumaki mai o tinaqu ka volekata na 20 na yabaki ena gauna oya, ka sa maqusa sara me tekivutaka na cakacaka ni valetabu kei na tuva kawa ni nona matavuvale.

Ena siga ka tarava, erau a vauci vata o rau na tubuqu, ka rau tucake tale tu vakaveisosomitaki o ganequ kei watina. Oqo na siga ni noqu vakamau, io, ia ea vakaibalebale cake vakalevu sara vei au. O rau na tubuqu, kau se bera ni bau sotavi rau, erau a wasea vata kei au na siga talei oqo.

Ni oti e vica na siga, ni keirau dolava vakaveiwatini na iloloma ni vakamau, keirau a dolava edua na iloloma talei mai vua na tavalei noqu bubu. O koya edua na marama lotu ka dau voleka sara vei noqu bubu. Na iloloma oya edua na itaba kei noqu bubu ena siga ni nona vakamau. A volai toka ena kadi ka tiko e loma, “E marautaki iko sara vakalevu o nomu bubu ka raici iko sobu tiko mai.”

A sega ni kila na tavalei noqu bubu oqo na bibi ni nona itukutuku vei au. Se a sega tale ga ni kila o koya na cakacaka ni valetabu ka se qai vakayacori wale ga oqo vei bubu. Au a kila e lomaqu ena gauna oya nia marautaki au o bubu ka marau ni sa tekivuna na neitou matavuvale na ilakolako bibi ni cakacaka ni valetabu kei na tuva kawa.

Keitou sa dua na matavuvale tawamudu ena gauna oqo, ena salatu ni nodra vakasoqoni vata na neitou qase e liu ka a liutaka o tinaqu me vakalougatataki kina na neitou matavuvale ena tai kadua ni ilati.