Na Matavuvale

O keitou, na Mataveiliutaki Taumada kei na Matabose ni Apositolo Le Tinikarua ni Lotu i Jisu Karisito ni Yalododonu Edaidai, sa vakadeitaka ni sa qisia na Kalou me vakawati na tagane kei na yalewa, ka sa suitu na matavuvale ki na ituvatuva ni Dauniveibuli me baleta na nodra icavacava tawamudu na Luvena.

Na tamata taucoko sara—tagane kei na yalewa—sa buli me ucuya na Kalou. Eda sa luvena tagane se yalewa vakayalo lomani na itubutubu vakalomalagi, ka, vakakina, sa tiko yadua vei keda na ituvaki kei na icavacava vakalou. Na noda yalewa se tagane sa dua na tiki bibi ni keda ivakatakilakila kei na inaki ena bula taumada, bula oqo ka tawamudu.

Ena gauna ni bula taumada era sa kila ka qarava na Kalou me Tamadra Tawamudu na luvena vakayalo tagane kei na yalewa ka vakadonuya na Nona ituvatuva era rawa ni rawata kina na Luvena na bula vakayago ka sotava na veika vakavuravura mera torova kina na ka vinaka sara ka vakasamataka vakaoti na nodra icavacava vakalou vaka itaukei ni bula tawamudu. Na ituvatuva vakalou ni bula marau sa vakatara me da laki tomana tale na noda veiwekani vakamatavuvale ena tai kadua ni ibulubulu. Na cakacaka vakalotu kei na veiyalayalati tabu era tiko ena valetabu sa vakavuna tu mera lesu na tamata yadua ki na iserau ni Kalou ka ra vakaduavatataki tawamudu na matavuvale.

Na isevu ni ivunau a solia na Kalou vei Atama kei Ivi sa baleta na nodrau rawa ni rawata na bula vakaitubutubu ena bula vakawati. Keitou cauraka ni se dei tu ga na ivunau ni Kalou mera vakatubukawa na Luvena ka vakatawai vuravura. Keitou cauraka talega ni sa vakarota na Kalou me rau na vakayagataka duadua ga na kaukauwa tabu ni vakatubukawa na turaga kei na marama sa vakamautaki vakalawa vakaveiwatini.

Keitou cauraka na veika e vakavurea tu na bula vakayago me sa digidigi vakalou. Keitou vakadeitaka na vakatatabu ni bula kei na kena bibi ena yavu tawamudu ni Kalou.

Rau na veiwatini sa nodrau itavi bibi me rau veilomani ka veikaroni vakairau ka vakakina vei ira na luvedrau. “Raica na gone era sa nona isolisoli na Turaga” (Same 127:3). Sa nodrau itavi tabu na itubutubu na susugi ni luvedrau ena loloma kei na buladodonu, me rau vakarautaka na nodra gagadre vakayago ka vakayalo, ka vakatavulici ira mera veilomani ka veivukei vakai ira, muria na ivakaro ni Kalou, ka dau muria na lawa ni vanua cava ga era bula kina. Era na tarogi ena mata ni Kalou na turaga kei na marama vakawati—tama kei na tina—ena vuku ni tavi era sa vakacolati kina.

Na matavuvale e sa lesi mai vua na Kalou. Na vakawati ni tagane kei na yalewa sa veiganiti kaya na Nona ituvatuva tawamudu. Sa dodonu mera vakasucumi na gone ena loma ni ivau ni vakawati, ka ra susugi tu mai na tama kei na tina ka doka vakataucoko sara na yalayala ni vakamau. Ena qai kune na marau ena bula vakamatavuvale ni sa yavutaki ena ivakavuvuli ni Turaga o Jisu Karisito. Na vakawati kei na matavuvale rawati koya sa yavutaki ena ivakavuvuli ni vakabauta, masumasu, veivutuni, veivosoti, veidokai, veilomani, yalololoma, cakacaka, kei na itaviqaravi bulabula eso. Sa lewa vakalou, me ra veiliutaki ena yalololoma kei na yalodina na tama ena nodra matavuvale ka vakarautaka talega na veika me bula ka taqomaki kina na nodra matavuvale. Sa nodra itavi taumada na tina na susugi ni luvedra. Ena vuku ni tavi tabu oqo, era sa vakacolati tu na tama kei na tina me ra veivukei vakatautauvata. Sa rawa ni veiganiti kaya na vakatulewa vakayadua ni yaco na malumalumu, mate, se tuvaki tale eso. Sa dodonu mera veitokoni na ikuri ni matavuvale ni gadrevi tu.

Keitou vakarota o ira vakayadua ka voroka na veiyalayalati ni tiko savasava, vakatotogana na watina se luvena, se sega ni qarava taucoko na nona itavi vakamatavuvale ena saumi taro vua na Kalou ena dua na siga. Kena ikuri, keitou vakarota na kavoro ni matavuvale ena vakavuna ki na tamata yadua, itikotiko, kei na matanitu na cudru waqawaqa era sa tukuna tu na parofita eliu kei ira ena gauna oqo.

Keitou kacivi ira na lewenivanua kauwai kei na vakailesilesi vakamatanitu e veivanua kecega mera vakabekabea na veika sa vakarautaki tu me maroroya ka vaqaqacotaka na matavuvale me sa yavu tudei vakaitikotiko.