Taro kei na Kena iSau baleta na Bula ni Vakasama

T: E vu beka mai na dua na ivalavala ca na leqa ni noqu vakasama?

K iS: Sa ka bibi me kilai ni nuiqawaqawa e sega ni yaco ena vuku ni malumalumu, se sega ni vuku ni ivalavala ca. Sa rawa ni da botea vata na veio ni bula duadua kei na druka me rawa ni kautani na icolacola ni madua ka yaco na cakamana ni veivakabulai.

T: Na cava au sega ni vinaka cake kina ni’u cakava tiko na ka dodonu?

K iS: Kakua ni nanuma ni o rawa ni cakava kecega, ia cakava mada ga na ka e rawa ni o cakava. Kevaka era qaqa lalai mada ga, vakavinavinakataka ka vosota tu. A veivakaroti vakavica vata ena ivolanikalou na Turaga kivua e dua, “dou tu vakadua” se “tiko lo”—ka wawa. Na kena dau vosoti tu eso na ka sa tiki tu ni noda vuli ena bula oqo.

T: Au na kila vakacava ni’u sa ciqoma tiko na isau ni masu ni dredre me’u kila ena vuku ni tuvaki ni noqu vakasama?

K iS: Ena vuqa na veilecayaki kei na dredre eda sotava tu ena noda bula, sa gadreva na Kalou meda cakava na noda vinaka duadua, meda kitaka ka sega ni tukuni tu vei keda (raica na 2 Nifai 2:26), ka vakabauti Koya tu. … Eda rairai toso wasoma ki liu ena vakanuinui kei na masu—ia e sega na veivakadeitaki matata—ni da sa cakava tiko na loma ni Kalou. Ia ni da rokova na noda veiyalayalati ka talairawarawa ki na ivakaro, ni da segata tikoga meda caka vinaka ka yaco me vinaka cake, eda rawa ni lako ena yalodei ni na tuberi keda na Kalou.

T: Au rawa vakacava ni vakila na reki ena kosipeli ni vakadredretaka tu na lomaleqa na lomavinaka?

K iS: Ni ko vakasaqara na vosa ni Kalou mo kila vakalevu cake kina na ituvatuva tawamudu ni Kalou … ka segata mo lako ena Nona Sala, ko ni na sotava “na vakacegu ni Kalou, sa uasivia na ka kecega e kilai rawa [Filipai 4:7], ena loma sara mada ga ni rarawa. O na vakila e dua na ivakarau cecere cake ni loloma tawalakosiviti rawa ni Kalou ni vure cake mai e lomamu. Na mataka caca ni rarama vakasilesitieli ena curuma na iyaloyalo ni nomuni veivakatovolei, ka oni na qai tekivu tovolea na lagilagi kei na veika veivakurabuitaki e sega ni vakamacalataki rawa ni veika tawalaurai, uasivi sara, ni vuravura vakalomalagi. O na vakila ni sa laveta tani na yalomuni mai na idre ni vuravura oqo.

T: Au rawa vakacava ni vulica me’u vakabauta ka vakararavi vei Karisito ni’u vakila ni’u sa sega ni rawa ni vakabauti au ena vuku ni noqu leqa ni vakasama?

K iS: Na levu ga ni ka o vulica baleta na iVakabula, na rawarawa mo nuitaka na Nona loloma veivueti, Nona loloma tawayalani, kei na Nona kaukauwa mo qaqaco, vakabulai, ka vueti kina.

“… kevaka sa luluqa na ka kece kei na tamata yadua e vuravura o dau vakanuinui kina, o Jisu Karisito kei na Nona Lotu ena sega vakadua ni biuti iko.

T: E kila dina tu li na Karisito na veika au vakila?

K iS: Ena sega beka e dua na lewe ni vuvale, itokani, se iliuliu ni matabete—se cava ga nodra kauwai se lomavinaka—me kila deivaki na ka o sotava tiko se tiko vua na vosa me vukea nomu vakabulai. Ia mo kila oqo: e tiko e dua e kila vinaka tu na veika o sotava tiko, sa “kaukauwa cake ko koya vei ira na kai vuravura kecega” [1 Nifai 4:1], o koya sa “rawata me cakava na ka sa uasivi cake vakalevu sara ena ka kecega [ko] sa kerea se vakasama kina’ [Efeso 3:20].”

T: E se lomani au tiko beka na Kalou dina ga ni’u sotava na leqa ni vakasama?

K iS: De dua beka na rorogo ni veivakayalolailaitaki se butobuto e bika na nomu vakasama, itukutuku e tukuna vei iko nio sa mavoa ka veilecayaki, maumalumu ka beci, sa rui dredre se sega ni gadrevi ena loloma vakalomalagi ena sala dina. Kevaka o rogoca na vakasama vakaoqori yalovinaka rogoca qo: era sa cala sara na domo oya. Eda rawa ni vakawalena dei tu na yaluma ena sala cava ga e vagolei keda tani kina mai na loloma vakalomalagi.”

T: Na cava e sega ni kauta laivi kina na Kalou na bolebole oqo?

K iS: Ni da sasagataka tiko na yalo vakacegu kei na kilaka ena veika dredre oqo, e dodonu me kilai ni da bula tiko—ka da sa digitaka meda bula—ena dua na vuravura lutu ka na vakatovolei ka baci vakatovolei tale kina na noda segata na bula vakalou ena dua na inaki vakalou. Na veivakadeitaki levu duadua ena ituvatuva ni Kalou oya ni sa yalataki e dua na iVakabula, dua na Dauveivueti, ka na laveti keda tu ena vuku ni noda vakabauti Koya mai na dredre kei na veivakatovolei eso, dina ga ni na dredre sara kivua na Tamada ka talai Koya kei na Luvena ka basika mai. Na vakavinavinakataki duadua ga ni loloma vakalou oqo ena vakamamadataka taumada na dredre eda sotava, kena kilai matata, ka veivueti vakaoti.

T: Kevaka au kila ni na vinaka cake na bula e tarava, na cava me’u bulataka tikoga kina na bula oqo?

K iS: “Se cava ga na nomu lomaleqa se dredre, na nomu vakamatei iko e sega ni kena isau. Ena sega ni vakaceguya na mosi ko vakila tiko se o nanuma ni ko vakavuna. Ena vuravura e gadreva vakabibi na rarama kece e rawa ni taura, yalovinaka kakua ni vakalailaitaka na rarama tawamudu sa biuta na Kalou ena yalomu ni bera na vuravura oqo. Vosa vua e dua. Kerea na veivuke. Kakua ni vakarusa na bula sa solia kina na Karisito na Nona bula me maroroi. O rawa ni ulabaleta na veidredre ni bula oqo ni keitou na vukei iko mo rawai ira.“

“Na dredre cava ga o sotava, kemuni na taciqu kei na ganequ—ka ni vakasama se ka ni yalomu se ka ni yagomu se dua ga na ka—kakua ni digitaka mo vakacacana na mareqeti ni bula ena kena muduki koso! Vakararavi vua na Kalou. Taura matua na Nona loloma. Kila tiko ni na rarama mai na malawa ena dua na sigai ka na seavu na yaloyalo ni bula vakayago.

T: Au rawa vakacava ni tokona na noqu daulomani ka sotava tiko na leqa ni vakasama?

K iS: Noda vakatavulici keda baleta na tauvimate ni vakasama e vakarautaki keda ka vukei keda kei ira era kunedredre tiko. Na veitalanoa vakai keda e tadola ka rarama ena vukea na ulutaga bibi oqo me ciqoma na kauwai e ganita. E dina ga, ni itukutuku e liu vua na vakayarayarataki kei na ivakatakila. Na vei bolebole tawarairai tubu-wasoma oqori e rawa ni yaco vei keda kece, ia ni da sotavi ira tiko, sa vaka mera sega ni cabeti rawa.

“Dua na ka e gadrevi taumada meda kila oya ni da sa sega sara ni tiko duadua. Au sureti iko mo vulica na ulutaga ni bulabula ni vakasama ena iwasewase ni Veivuke ni Bula ni Gospel Library app. Na vuli ena mua me levu noda kilamatata, veiciqomi vakalevu, yalololoma vakalevu, loloma vakalevu. E rawa ni vakalailaitaka na leqa ni vukei keda tu ni tara cake ka sasagataka na vakanamata kei na veimaliwai bulabula.

T: E dua vei ira na noqu daulomani a vakamatei koya ena vuku ni leqa ni vakasama. Na cava ena yaco vei ira?

K iS: “E tiko e dua na vakasama makawa ni sa ivalavala ca o koya sa [vakamatei koya] vakai koya ka sa vakatalai vakadua ki eli. Oqori e lasu sara ga. Au vakabauta ni levu sara na kisi era na raica ni o ira oqo era a bulataka na bula qaqa ka na sega ni dua na ivakarau ni nodra bula tawamudu na vakamatei koya.“

Toso ki Liu ka Rai Cake Tu

Eso na isaunitaro e solia vei keda na Kalou e duidui mai na veika eda nuitaka, ka so na isaunitaro ena sega ni yaco mai ena bula oqo. Ni da sega ni kila na veika kece ena gauna oqo me baleta na vuna e vuqa vei keda e sotava kina na bolebole ni bula ni vakasama, e rawa ni da yaloqaqa ena yalayala ni dua na siga eda na kila vakavinaka sara na ka kecega. Na noda sasaga—se vakacava sara na kena tawayaga ena so na gauna—ena yaga taucoko (raica na Kalatia 6:9; Vunau kei na Veiyalayalati 58:3).

A vakatavulica o Elder Dieter F. Uchtdorf ena Kuoramu ni iApositolo Le Tinikarua: “E totoka na vakabauta baleta ni tudei tikoga ena gauna mada ga e sega ni yaco kina na veivakalougatataki e nuitaki tu. Eda na sega ni raica rawa na veisiga ni mataka, eda sega ni kila na isaunitaro kece, ia e rawa ni da ravi ga vei Jisu Karisito ni da toso tikoga ki liu ka rai cake tiko baleta ni o Koya na noda iVakabula ka Dauveivueti.”

Ni o lako curuma kei ira o lomana na dredre ni bulabula ni vakasama, nanuma tiko ni veika kece e sega ni dodonu ena bula ena vakadodonutaki ena vukui Jisu Karisito. Toso tikoga ki liu ka toso cake tikoga—ni tiko e yasamu o Koya, sa rawa mo gugumatua tikoga ena vakanuinui.