“Ke a Tiko Edua na Lotu ni Kalou e Vuravura,” Liaona, Sepi. 2025.
iYaloyalo ni Vakabauta
Ke a Tiko Edua na Lotu ni Kalou e Vuravura
Au a tukuna vei rau na daukaulotu me rau kakua ni vakaotia nodrau gauna, ni tiko na veika au vakabauta vakai au. Ia au a qai vulica ni nodrau ivakavuvuli e veisotari vata kei na noqu vakabauta me baleta na matavuvale, edua na Tamada mai Lomalagi dauloloma, kei na Lotu ni iVakabula.
Niu se gone, erau dau kauti au na noqu itubutubu ki na duidui veimatalotu. E muri, niu sa yabaki tinivakacaca, au sa tekivu vuki vua na Kalou ka tekivu wilika na iVolatabu. Au a logaloga vinaka.
Niu vakasamataka na Kalou kei na inaki ni bula, au a qai kila ni sa ka bibi meda vakamatavuvale. Au vakabauta ni dodonu vei ira na iliuliu ni lotu mera veivakavulici ena ivakaraitaki, ia ena lotu au a lewena, era sega ni vakawati na bete. Ea sega ni vakaibalebale vei au oya. Au a vakabauta ni ka vinaka na vakawati kei na vakamatavuvale.
Au a se yabaki 16 tiko kina. A dua tiko na noqu itau goneyalewa kau a domoni koya sara vakalevu, ia a biuti au o koya. Oya a dredre dina vei au. Au a kune rarawa vakalevu me voleka ni dua na yabaki. Ena vuku ni veika oya, au a vinakata meu kila na vanua au lako mai kina, na vuna au mai tiko kina e vuravura, na cava na inaki ni bula, kei na cava ena yaco ni oti na mate. Au a vinakata meu kunea ga vakataki au na isau ni veitaro oqo. Ia ni oti na noqu vakasamataka vakabalavu, au vuki vua na Kalou ka kaya e lomaqu, “O Koya ka Bulia na bula e kila vakavinaka cake na bula mai vei au. E dodonu vei au meu na kunea na isau ni taro mai Vua.”
Niu wilika na iVolatabu, au a vulica kina nia kaciva o Jisu e tinikarua na iApositolo. “Ke tiko edua na lotu ni Kalou edaidai,” au a nanuma, “e dodonu mera tiko na kena iApositolo.” Sa yaco meu taleitaka vakalevu cake na lotu, ka vinakata meu papitaiso.
Niu veivosakitaka na Kalou kei tamaqu, e tukuna vei au ni Kalou edau lewa vakadodonu. A kaya o koya nio na papitaiso ga mo vakabulai, se ona cudruvi ki eli me tawamudu. Au a sega ni via vakabauta ni na taleitaka edua na Tama dauloloma mai Lomalagi me vakatalai ira na Luvena ki eli me tawamudu baleta ga nira se bera ni papitaiso. Vakacava o ira a sega ni donumaki ira na madigi mera papitaiso?
E Varanise, e lailai kina na tamata vakabauta. Era a tiko eso na noqu itokani vinaka, ia era se bera ni papitaiso. Au a mani vakasamataka nia sega ni dodonu meu nanuma ni ra na lako kece ki eli.
Au sa mani nanuma meu bulia ga na noqu vakabauta vakai au. Au a vakabauta edua na Kalou ka uasivi sara na Nona loloma ka na cakava na veika kece ena Nona kaukauwa me vakabulai ira na Luvena. Kevaka era sega ni vinakata na Luvena me ra ciqoma na Nona lagilagi, oqori ena vakatau vei ira. Ia ena solia vei ira o Koya edua na madigi.
E Dua na Veivagolei Tani mai na Saumaki Mai
Dua na siga erau a vakauqeti erua na daukaulotu tudei ka rau a cakacaka tiko ena noqu koro me rau muria edua na sala takoso ki nodrau vale. Ena nodrau sala i vale, rau a sota kei tinaqu. A tarovi rau o koya ka lokuca edua na gauna meu sota kina kei rau. Au a sega ni marau kina. Au a sega ni via vosa vei rau. Au a nanuma ga ni rau na tukuna, “E dodonu mo vakarorogo vei keirau. E dodonu mo vakabauta na ka keirau na tukuna vei iko.”
Ni rau yaco mai na daukaulotu kina neitou soqoni, au a kaya vei rau, “Drau kakua ni vakaotia nomudrau gauna. E tiko na noqu vakabauta ga vakai au. E vinaka na ka drau cakava tiko, ia au vakabauta ni sa ka bibi sara na matavuvale. Au vakabauta ni dodonu mera vakawati na iliuliu ni lotu. Au vakabauta nidua na lotu e dodonu me tinikarua na kena iApositolo. Au vakabauta ni Kalou ena vakabulai ira e vuqa sara na Luvena ena kena levu ga e rawa. Kau sega ni vakabauta na vakatavako kei na gunu.”
Au kurabui niu kila ni salavata kei na noqu vakabauta na nodrau ivakavuvuli. Rau a solia vei au edua na iVola i Momani ka kerea meu wilika ka masulaka. Au a vakila na Yalo niu wilika na ivola, kau a vakila na Yalo vei rau na daukaulotu. Ia au a vakasamataka, “De rairai au bulia tiko ga vakai au na veiyalovinaka vakaoqo.”
Au a masu ka saumi mai ena dua na tadra. Ena noqu tadra, au a dolava na iVolatabu. Ena loma ni iVolatabu a tiko kina eso na ivakatakilakila ni veiivola yadua ni iVolatabu. Na iotioti ni ivakatakilakila a tukuna “Momani.” Na itukutuku oqo a vukei au meu kila kina ni iVolatabu kei na iVola i Momani e tautauvata ga na kosipeli erau tiko kina (raica na Isikeli 37:15–19).
A vaqaqacotaki tale na noqu ivakadinadina mai na veika tale eso au a sotava ena kena wiliki ka vulici na iVola i Momani. Ni rau sureti au na daukaulotu meu papitaiso, au a ciqoma ena reki. Au a papitaiso ni oti toka ga edua na yabaki mai na nona biuti au na noqu itau goneyalewa. Na noqu papitaiso a vakatakilakilataka edua na veisau levu ena noqu bula. Au a vakayalia eso na noqu itokani niu mai lewena na Lotu, ia au a kunea eso na ka vou ena tabana au lewena.
“Na kosipeli e kauta mai vei au e levu na veivakararamataki kei na marau ,” e kaya o Nicolas. “Na Kalou sa vakalougatataki au. Au a sotava edua na marama vinaka, ka tolu kina na luvei keirau yalewa vinaka.”
Na kosipeli e kauta mai vei au e levu na veivakararamataki kei na marau. Au a vakasinaiti ena Yalo kei na reki. Au a vakasamataka, “Na veika rarawa kece au sa sotava oti sa kauti au mai ike.”
Na Kalou sa vakalougatataki au. Au a sotava edua na marama vinaka, ka tolu kina na luvei keirau yalewa vinaka. E rua erau a lai kaulotu, ka rau a vukei ira tale eso mera kila na veika au a qai mai kila ena vica na yabaki sa oti: “Na matavuvale sa iusutu ni nona ituvatuva na Dauniveibuli me baleta na nodra icavacava tawamudu na Luvena,” “o ira na mate era veivutuni era na vakabulai, ni ra talairawarawa kina veicakacaka vakalotu ena vale ni Kalou” (Vunau kei na Veiyalayalati 138:58), kei na Turaga e kacivi ira na iapositolo ena gauna oqo me ra liutaka na Nona Lotu (raica na Efeso 2:20).