Evei na Noqu Veivakalougatataki Yalataki ni Saumi Ikatini?

Na loma ni Kalou e sega ni dau tautauvata kei na noda (raica na Aisea 55:8–9). Ena vuku ni ka oqori, ena sega beka ni dau yaco mai vei keda na veivakalougatataki ni Kalou ena sala eda gadreva se namaka. Me kena ivakaraitaki, a vakarautaka o Elder Bednar eso na ivakaraitaki ni veivakalougatataki sega ni namaki e rawa ni yaco mai ena saumi ikatini: “Ena so na gauna eda na kerea beka vua na Kalou na rawaka, ka solia vei keda o Koya na igu vakayago kei na vakasama. Eda na kerea beka na bula sautu, ka soli mai na rabailevu ni rai kei na vosota vakadede cake, se da kerea beka na tubu ka qai vakalougatataki mai ena isolisoli ni loloma soliwale. Ena vakasobura beka mai vei keda o Koya na yalodina kei na yalodei ni da segata me da rawata na veika yaga eso. Ia ni da kerea na veivakacegui mai na veika dredre vakayago, vakasama, kei na dredre vakayalo, ena rawa ni vakalevutaka o Koya na noda sasaga kei na igu.”

E vakatura o Elder Bednar “Ia na veivakalougatataki e yaco mai vei keda mai na katuba ni lomalagi sai koya me vakalevutaki cake na kaukauwa me da cakacaka ka veisautaka na ituvaki eda sotava ka sega ni namaka me veisautaka na ituvaki eda sotava e dua tale na tamata se dua na ka. Raica, me kena ivakaraitaki, na nodrau vakila oqo e dua na veiwatini mai Argentina ena nodrau bula ena nodrau italanoa “Cava na Vuna O Se Soli Katini Tiko Kina?“ (Liahona, Maji 2013, 37).

E rawa talega ni da vulica me da vakabauta ni veivakalougatataki e yaco mai ena nona gauna ga na Kalou kei na Nona sala.

E kaya o Elder Michael John U. Teh ena Vitusagavulu: “Ni da talairawarawa ki na lawa ni katini, e sega ni dodonu meda solia vua na Turaga e dua na gauna yalataki. Eso era dau namaka me yaco mai na veivakalougatataki vakayago ena dua na gauna era nanuma. Oqo na sala era vakayalia kina eso na nodra vakabauta na Nona yalayala. Era yalodina ena ivakatekivu ia sa mudu mai nodra talairawarawa ni oti e dua na gauna ni sega ni sotavi na veika era namaka. E dodonu me da kila ni veika kece e vakayacori me vaka na lewa kei na ituvatuva ni Turaga ka sega ni noda.”

Ni da kila vakavinaka ni duidui na ituvatuva ni Kalou mai na noda ena vukei keda me da kila vakavinaka cake ni baleta ga ni se bera ni yaco e dua na cakamana totolo, e sega ni kena ibalebale ni da sa sega ni vakalougatataki.

A vakatavulica o Peresitedi Dallin H. Oaks, iMatai ni Daunivakasala ena Mataveiliutaki Taumada: ”E dua e kaya ni bula sa ikoya na ka e yaco vei keda ni da cakava tiko eso tale na ituvatuva. Ena vuku ni veika eda sega ni lewa rawa, eda na sega ni rawa ni tuvanaka ka vakayacora na veika kece eda gadreva ena noda bula. E vuqa sara na veika bibi ena yaco ena noda bula eda a sega ni tuvatuva kina, ka sega ni o ira kece era na marautaki.”

Ena noda ilakolako ni bula oqo, o ira sara mada ga era talairawarawa ki na lawa ni ikatini era na sotava na dredre vakailavo ni sega ni cakacaka, leqa tubukoso sega ni namaki, sega ni lewai vakamatau na veika vakailavo, se sega ni toso na isau. Ni da kila ni lewa tiko na Kalou e rawa ni vukei keda me da tubu ena vakabauta kei na vosota ni da vakasaqara na veivakalougatataki bibi ka matailalai ni ikatini. Ena rairai so vei ira na dredre oqo era veivakalougatataki dina ka na vukei keda meda tubu curuma na veivakatovolei vakaikoya.

A wasea ena dua na gauna o Elder Hugh B. Brown ena Kuoramu ni iApositolo Le Tinikarua (1883–1975) e dua na lesoni vakaoqo a vulica ena nona samaka tiko e dua na vuniberi ena dua na vanua ni teitei mai Kenada.

Ni sa tekivu samaka ka vakavinakataka na nona itikotiko oqo, sa laki yaco sara ki na so na vuniberi makawa e ono na fiti (1.8 na mita) na kena balavu ka sega na vuadra. O koya gona, a samaka sara vakalevu, ka biuta tu ga mai na vuna lalai vaka na turu ni wainimata. Na ka e raica oqo e vaka me tagi tiko na vuniberi, ka nanuma o Elder Brown ni rogoca ni kaya mai na logana:

“O rawa vakacava ni cakava oqo vei au? Sa vakasakiti na noqu tubu cake mai. … Ia oqo o sa musuki au sobu. … Au nanuma ga ni o iko na dauteitei eke.”

E sauma o Elder Brown, “Raica, vuniberi lailai, oi au na dauteitei eke, kau kila na cava me yaco vei iko. Kevaka me‘u laivi iko mo lako ena sala o vinakata mo lako kina, o na sega ni rawata e dua na ka. Ia ena dua na siga, ni ko sa vakasinaiti tu ena vuata, o na vakananuma lesu ka kaya, ‘Vinaka vakalevu, Mr. Dauteitei, ena nona musuki au sobu, ena nomu lomani au mo vakamavoataki au.’”

Ni da sotava na dredre vakailavo ka sega ni raica na veivakalougatataki yalataki ni saumi ikatini, eda na taroga beka vua na Kalou ena sala vata oya, “O rawa vakacava ni cakava oqo vei au? Au sa cakava tiko na veika kece o kerea. Ia oqo o sa musuki au sobu.”

Ena gauna vakaoqo, e rawa ni da taura e dua na gauna me da vakasamataka kevaka ena kauta mai na veivakalougatataki cecere na veivakatovolei eda sotava tiko mai na lesoni eda vulica ena ilakolako. E rawa ni da vulica me da vakararavi vakalevu sara kivua na Dauteitei kei na veivakalougatataki sa tiko Vua me baleti keda ni da volekati Koya tu.

Na veivakalougatataki lalai ka bibi e solia vei keda na Kalou mai na saumi ikatini e rawa ni vukei keda meda lako sivita e vuqa na dredre ni vuravura. Na Tamada Vakalomalagi dauloloma ena tuvanaka vakavinaka sara na veivakalougatataki oqo me vukei keda meda tubu ka yaco meda vakataki Koya vakalevu cake. Ni da vakatovotovotaka na vakabauta ena kilai kei na ciqomi ni veivakalougatataki kece sara e yaco mai, eda na raica na vakataucokotaki ni yalayala i Malakai.

Ni tubu mai na vakatitiqa kei na yaluma mai na dredre vakailavo, kevaka eda vakataroga ena luluvu se da sa vakalougatataki, eda na sega ni soro ena noda vakanuinui! Ia, e rawa ni da masulaka me da raica na veivakalougatataki lalai ka bibi sa solia vei keda na Turaga ka vakabauta na ituvatuva nei Tamada Vakalomalagi ena vukuda.

Me vaka sa vakadinadinataka o Elder Andersen, ”Au yalataka ni ko ni sa vakararavi vua na na Turaga, ena salamuria mai na veivakalougataki mai lomalagi.”