Au Vinakata meu Vakataki Iko

Droini mai vei David Malan

Ni oti edua na siga balavu, ka vakasinaiti ena dredre ena nodratou qaravi e tolu na gone lalai, na ka ga au vinakata meu cakava oya meu sisili vinaka ka lai moce.

Au a cegu levu ka gole kina noqu rumu meu vakacegu. Oqori na gauna a curu mai kina na luvei keirau yalewa yabaki lima ka vakananumi au ni sa nona gauna ni veivakatarogi vakavula keirau sa tekivu cakava vakaveiwatini vata kei koya kei na luvei keirau tagane yabaki tolu. Keirau na taroga vei rau na taro me baleta na veika erau taleitaka kei na veika erau taleitaka me baleta na murivuli se lotu. Oti keirau na qai vakananuma vei rau ni rau sa luve ni Kalou ka keirau lomani rau.

Au dau taleitaka na veitalanoa oqo, ia au vakila niu a sega ni veiganiti vakayago se vakavakasama. Au a tekivu tukuna vei luvequ yalewa me keitou na qai veivosaki tiko ena bogi ni mataka, ia au a qai kila e kea na kena bibi vei koya na neitou veitalanoa.

“Sa vinaka,” au a kaya ena oca, “daru kauti Ta mai.”

Keitou a dabe toka na lewe tolu ena idavodavo ka tekivu veivosaki. Ni curu vakalekaleka i tuba o watiqu, au a tarogi luvei keirau yalewa, “Na cava ona vinakata mo cakava nio sa qase cake?”

Au a sega ni vakarau kina nona isau ni taro: “Meu vakataki iko.”

Ea tonawanawa na wai ni mataqu, ka luluvu na lomaqu. A tarai au na sala a raici au kina na luvequ yalewa, ia au a vakila noqu nuiqawaqawa levu ka vu mai na noqu rerevaka niu sega ni veiganiti. Au vakasamataka na vuna kece au sega ni ivakaraitaki vinaka kina vei rau na luvequ, kau kila vakavinaka sara tu ga na noqu malumalumu.

Ena bogi oya niu masu, au a kerea vagumatua vua na Tamada Vakalomalagi me vukei au meu ivakaraitaki vinaka cake vua na luvequ yalewa ka kilikili kaya na nona raici au cake. Vakasauri sara, sa luvuci au edua na yalo ni veivakacegui, inuinui, kei na loloma levu. A yaco meu vakila na vakavinavinaka nei Tamaqu mai Lomalagi kei na iVakabula vei au niu dua ga na tina ka tovolea tiko meu vinaka cake. Erau vakadinadinataka na noqu sasaga ka rau a tu e kea me vukei au meu yaco meu tina ka luvedrau yalewa me vaka erau raica vei au.

Au kila mai vu ni yaloqu ni Kalou e kilai keda ka lomani keda ia ena vuku ni “kaukaua gumatua ni Veisorovaki ni iVakabula,” eda na yaco me vakataki koya eda nuitaka meda vakataka.