“Ira na Veivunikau Bonisai Talei kei na Veiivakadinadina Talei,” Liaona, Sepi. 2025.
Ira na Veivunikau Bonisai Talei kei na Veiivakadinadina Talei
Na veiivakadinadina yadua edua na isolisoli cecere ka gadrevi kina na gugumatua ena yalodina kei na vakabauta me rawa ni tudei kina me vaka edua na ka totoka ka rekitaki.
iLoloma mai vei koya ka volavola
Ena lomadonu kei Tokyo, e Japani, au a raica kina edua na ka ena dua na were totoka ni senikau kau kurabui kina vakalevu. Ena yasa ni dua na sala e loma ni rara a tiko kina edua na lalaga kara vesu tu kina e sivia edua na daseni na vokete lalai, ka tiko yadua kina edua na vuni bonisai. Na veivunikau totoka yadua oya a tiko vata kei na dua na kena ivakatakilakila lailai ka tukuna tiko na nodra yabaki. E levu era sa sivia na 100 na yabaki.
E dua, sa yabaki 390, ia se vuavuai vinaka tikoga. E dua tale a rua tiko na tolona—edua sa mate, ka dua se bula tiko. E veivakurabuitaki ni sa yabaki 590.
Au vakananuma na nodra a tei ka samaki taumada na veivunikau bonisai yadua ena yalo ni cibi kei na reki. E muri, na vunikau era a rairai yaco beka mera iyau vakamareqeti ni matavuvale. Au nanumi ira na itubutubu matua era lesi ira na luvedra mera susuga cake vakamalua na vunikau bonisai ni matavuvale, taqomaka mai na leqa ka maroroya me baleta na itabatamata mai muri.
O ira na veivunikau lalai oqo mai Tokyo era a bula mai na ivalu rerevaki kei na gauna ni sautu, mai na cava lelevu kei na gauna ni draki maravu. Era sa ivakadinadina vakasakiti ni yalodina, itovo vakavanua, kei na veikauwaitaki loloma.
Edua na iSolisoli Talei
Mai na gauna au a raici ira kina na veivunikau bonisai oqo au a qoroqoro niu vakananuma na sala era a tekivu kina na itabatamata ni veimatavuvale e Na Lotu i Jisu Karisito ni Yalododonu Edaidai mai na dua na lewe ni matavuvale painia ka a rawata edua na ivakadinadina kaukaua ni kosipeli vakalesui mai.
Na nodra ivakadinadina na lewenilotu vou yadua ni Lotu e tekivu ena nodra “solia edua na tikina” se teivaka na vosa ni Kalou e lomadra ka qai vakabulabulataka (raica na Alama 32:28). Ni sa tubu cake tiko na ivakadinadina, na nona itovo na lewenilotu vou oya sa na moici ka samaki kina dua tale na ivakarau ni bula e duidui.
Ena vuku ni vuqa na veivakatovolei kei na cava ni bula e sotavi, ena tubu me qaqaco na ivakadinadina kei Jisu Karisito kei na Nona Lotu ni vakabulabulataki. Me vaka edua na vuni bonisai, ena wasei ka vakadewataki sobu edua na ivakadinadina me vaka edua na isolisoli talei vei ira na itabatamata ka tarava, mera vakatubura tale ga ka vakabulabulataka.
Sa nodra itavi cecere na itabatamata yadua mera taukena na ivakadinadina oya. Edua na iloloma isaulevu ia e caca rawarawa. Me na tudei tu me vaka edua na ka totoka ka rekitaki sa na gadrevi kina na yalodina vagumatua kei na vakabauta vakatamata yadua.
Eda sega ni kila se a vakacava na ilevu ni vunikau a raica o Liai ena nona tadra. Ia eda kila ni sa rui totoka sara ka a sega ni via lokuyarataka me wasea na vuana vata kei na nona matavuvale (raica na 1 Nifai 8). A yaco na matavuvale nei Liai me dua na ivakaraitaki matata ni dua na matavuvale ni veitabatamata—so na gauna era gumatua ena kena vakadewataki yani na ivakarau dodonu, ka so na gauna, e ka ni rarawa, ni kunei na ivakadinadina ni ra malai ka mate ni sotavi na veika dredre, talaidredre, kei na veivakatovolei.
Eda rekitaki ira, era sa isevu ni Yalododonu Edaidai ena nodra matavuvale, era susuga cake na nodra ivakadinadina gone ena nodra cakava ka maroroya na veiyalayalati tabu. Ka da vakavinavinakataki ira na painia ni Yalododonu ena sala era a vakadewataka yani kina na nodra lomana na Kalou vei ira na itabatamata mai muri.
O ira na itubutubu, qasenivuli, itabagone, kei ira na itabagone qase cake era vakaliuca na veisoqoni ni Sigatabu, veiqaravi e valetabu, kei na tiko ena semineri, inisitute, kei na veikoniferedi ni itabagone kei na itabagone qase cake—ka ra vakaliuca na iVakabula ena nodra bula—era sa vakarautaka tiko na qele vakayalo kei na kakana bulabula mera tubu cake kina na veiivakadinadina gone.
Me vakataka na veivunikau bonisai au a raica mai Tokyo, na noda ivakadinadina baleti Jisu Karisito kei na Nona kosipeli vakalesui mai era iyau talei ka na vakalougatataki ira na noda daulomani. Era rawa ni yaco me keda idivi ni da susugi ira vakavinaka, vakamareqeta, ka wasei ira mai na dua na itabatamata kina dua tale.