E dau tu ga na inuinui

Ena neirau a kacivi vakaveiwatini me keirau laki kaulotu e Taiti, keirau a sega vakadua ni vakasamataka na veika sega ni namaki ka totoka a waraki keirau tu mai. Me’u wasea mada e dua ka vakaraitaka na sala e dau cakacaka vuni kina na Turaga. 

Ena sivia na ruasagavulu kalima na yabaki sa oti, ni’u a veiqaravi voli vaka-Bisopi ni Tabanalevu o Aix-en-Provence ka cakacaka tiko ena Semineri kei na Inisitute, au a sotavi Sophronia kina ka a lako mai Taiti me laki vuli e Varanise. O koya a dua na itabagone qase cake ka dei sara na nona kila na kosipeli, ka ni a tubu cake mai ena Lotu. E a ka ni veilecayaki kina ena nona a lako mai ki na noqu valenivolavola me tukuna ni sa na sega tale ni lako mai Lotu. Au a nuitaka ni na lekaleka ga ia, e dina sara, a vakayacora o koya na nona gagadre, ka’u sega tale ni qai raici koya. E sivia e ruasagavulu na yabaki, a bulataka voli kina o Sophronia e dua na bula e yawa mai na Kosipeli. 

Ena 2024, ni keirau a yaco yani ena neirau kaulotu e Taiti, keirau a marautaka me raici koya tale—ka marau vakalevu cake me kila ni a sa lesu tale mai ki na Lotu o koya ena rua na yabaki yani ki liu. A wasea o koya na ka a vakavuna na nona lesu tale mai: 

“E dodonu mo kila ni gauna taucoko au tu tani kina mai na Lotu, au a maroroya tu ga na noqu ivakadinadina ni kosipeli ka dau gadreva vakalevu me tubu cake na luvequ yalewa, o Kahaili, me vakataki au—ena Lotu i Jisu Karisito ni Yalododonu Edaidai. Au a vinakata me kila ni bula tiko na Kalou, ni lomani koya tu, ka sa tiko e dua na Nona ituvatuva vua me lesu tale ka laki tiko vata kei Koya kei na nona matavuvale kevaka e muria na Nona ivakaro. Ia oi au mada ga a sega ni vinakata me’u lesu tale ki lotu. A veisaqasaqa sara, se vakaevei? 

“Ena so na gauna a dau lako vata kei tinaqu o Kahaili, ia na kena dau yaco vagauna ga oqo e sega ni vakarautaki koya vakavinaka ki na papitaiso. Ena 2022, ni sa yabaki ono veimama o Kahaili, au qai kila ni sa vo ga e dua veimama na yabaki me keirau vakavakarau kina. Au kaya tiko ‘keirau’ baleta ni iwalewale oqo a kena ibalebale me’u vakaitavi vakai au ga, ka sega ni vakararavi vei tinaqu se dua tale. 

“Au a tarogi koya, ‘Kahaili, o na vinakata beka mo papitaiso ni ko sa yabaki 8?’ 

Sega tale ni wawa, a sauma mai o koya, ‘Io, nau, au vinakata me’u papitaiso!’ 

Au a kurabui ena nona marautaka, kei na sovaraki ni yalo maqusa oya, au a yaloqaqa kina me’u solibula ka lesu tale ki lotu. 

“Keirau a lako duadua ga ena imatai ni Sigatabu oya. Ia ni oti ga vakalailai, a tomani keirau o Cyril na watiqu, ni vakila ni sa nona itavi me dau tiko vata kei keirau. Ena gauna a vakaraitaka kina o Kahaili na nona gagadre me papitaisotaki koya o tamana, au sauma yani ena matadredredre, ‘Ia, tarogi tamamu ga, o na sega ni kila!’—ka sega ni vakabauta ena dua na gauna ni rawa ni yaco dina. A sauma mai o tamana, ‘Kevaka au rawata, noqu lewa, au na cakava.’” 

A qai curu takoso na Turaga ena bula nei Cyril. A yaco na nona saumaki mai ena nona wilika na Ica 12:4: “Ia ko ira yadua sa vakabauta na Kalou, era sa vakanuinui dei ki na dua na vuravura vinaka cake, io, e dua na tikina ena liga imatau ni Kalou, na inuinui oqo sa rawa ena vakabauta, ka sa dua na ikelekele ki na yalodra na tamata ka vakadeitaki ira me ra tudei sara ka tawayavalati rawa ena cakacaka vinaka kecega, ka sa tuberi ira me ra vakalagilagia kina na Kalou.” 

Na ivolanikalou oqo me baleta na inuinui sa yaco me ikelekele a tarai Cyril vakatitobu ni nanuma lesu na nona a voleka ni luvu ena totobu mai na Yatu Tuamotu ena vica na yabaki sa oti. Ni qoli tiko, a kuitaki tani na nona waqa ni a ququ na kena ikelekele. Dina ga ni qalo vakaukauwa me yacova yani, a oca sara ga o koya. E ka ni kurabui, ni a tao na ikelekele ni waqa ena dua na yamotu, ka tarova na waqa me rawa ni yacova yani o koya. E se dau vakamacalataka tikoga o Cyril ni oqo e dua na cakamana ka a vakabulai koya. 

Me vaka e dua na sucu vou, a papitaiso o Cyril enai ka 28 ni Maji, 2024—nai ka 50 ni nona siganisucu. Ena vula ka tarava, a papitaisotaki Kahaili kina o koya. A yaco mai na gauna cecere enai ka 12 ni Epereli, 2025, ena nodratou a vauci ena Valetabu e Papeete o Sophronia, Cyril, kei Kahaili. A neirau na madigi me keirau tiko ena soqo tabu oqo. 

Au wasea na italanoa oqo me’u vakadinadinataka ni dau tu ga na inuinui ni ra gole tani mai na Lotu na lewe ni matavuvale. Kevaka sara mada ga e taura e dua na ikava ni senijiuri, ena vakabauti Jisu Karisito, ena dau yaco ga e dua na cakamana.