Na Kalou sa Veiliutaki Voli

E nai ka 2 ni Feperueri ni yabaki oqo, keirau a veisiko kei Sisita Meurs ki Warrnambool, Ositerelia, me baleta na kena laki tauyavutaki na Tabana e Warrnambool mai na dua na ilawalawa ni tabanalevu e Geelong. E a dua na siga rekitaki me’u lesu tale ki na vanua au sucu kina ka raica na tabana au a lewena ni’u se gonetagane, ni sa tauyavutaki tale. 

Ni oti e rua na macawa, keirau a laki vosa vei ira na daukaulotu ena KNK ni iWasewase ni Pasifika e Okaladi. Keirau dau taleitaka na sotavi ira na daukaulotu vou ka vakila na nodra nanamaki kei na vakabauta ni ra tekivuna na nodra veiqaravi vakatabui. A duatani sara na gauna oqo baleta ni a sa kacivi na makubui keirau tagane, o Harrison Snow, ki na Tabana ni Kaulotu e Ositerelia Melbourne—ka dua vei ira na daukaulotu oqori. 

A kuria na neirau marau, ni a lesi o Elder Snow ki Warrnambool me imatai ni nona iwasewase. Au a mani nanuma me’u vakauta vua e dua na itukutuku ni neitou a curu ki na Lotu e kea na neitou matavuvale. Oqo e dua na tiki ni veika au a wasea: 

Na tukamu-vakarua, o Frederick Michael Wilhelm Meurs, a sucu mai Holland ena 1926. O koya a dua vei iratou na lewe 12 na gone. O tinana e a dua na Katolika yalodina ka dau kauti iratou na luvena ki na misa ena vei-Sigatabu. A vuli o Fred ena koronivuli ni Katolika ka tara cake na vakabauti Jisu Karisito titobu kei na nona taleitaka na ivolanikalou. 

Na tubumu-vakarua, o Lois Ellen Meurs, a sucu talega ena 1926 mai Warrnambool. E a rua na tacina, o Ralph kei David, ka susugi cake ena dua na vuvale lotu Wesele yalodina. E a dau qoroya o koya na nodrau veiqaravi ni loloma na nona itubutubu ka tara cake e dua na vakabauta va-Karisito kaukauwa. 

Erau a vakamau o Fred kei Lois mai Warrnambool ena Janueri 1954. A sucu o Julie ena mua ni yabaki oya, kei Peter (oi au) ena Tiseba 1956. 

Ena itekivu ni nodrau vakawati, erau a vinakata o Fred kei Lois me rau duavata ena nodrau vakabauta. Erau a dau lakova ruarua na lotu Katolika kei na lotu Wesele ka vulica vata na Veiyalayalati Vou. Ni rau wiliwili voli, erau dau vakavola e vuqa na taro—me baleta na ituvaki ni Lewetolu Vakalou, na tucaketale, lewa ni matabete, na ituvatuva ni Lotu, kei na papitaiso ena tabadromuci. 

Erau a vakasaqara na kena isau mai vei ira na iliuliu ni lotu e kea, ia e vuqa era a kaya ni veika oqori era sa “ka vuni” se dredre me ra sauma rawa. Na nodrau vakasaqara na dina a vakavuna me rau sikova e vica na lotu Vakarisito e Warrnambool. Ni rau se sega tikoga ni vakacegu rawa, erau a vuki vua na Kalou ena masu, ka kerei Koya me vakauta mai vei rau na kena isau. 

Ena gauna o ya, erau a talai mai kina o Elder Jones (mai Utah) kei Elder Erickson (mai Kenada) mai vei Peresitedi Thomas S. Bingham me rau laki dolava na cakacaka ni kaulotu e Warrnambool. Era a vakasalataki ira na lewenivanua na italatala ni vanua oya mera kakua ni vosa vei rau, ka ra kaya ni rau na “vesumonataki ira na luvedra.” 

Erau a tuki katuba ena yalodina o Elder Jones kei Elder Erickson me tolu na vula ka rau a sega sara ga ni bau ciqomi vakadua. Erau a yalolailai ka lomabibi. A yavalati na nodrau vakabauta. Erau a volavola vei Peresitedi Bingham ka kerea me rau tokitaki tani mai Warrnambool. 

Kena itinitini, a qai yaco mai e dua na ivola mai vei Peresitedi Bingham. Ni oti nona vakasamataka ena masumasu, a vola o koya, ni vakila vakaukauwa sara ni ra tu na tamata e Warrnambool era sa vakarau tu me ra ciqoma na Lotu vakalesui mai qo. E a vakayaloqaqataki rau me rau lesu tale ki cakacaka ka sikova na veivanua erau se bera ni bau lakova eliu. 

Erau a ciqoma na daukaultou na ivola ena gauna vata ga erau masulaka tiko kina o Fred kei Lois na isau ni nodrau masu. Ni oti e vica na siga, erau a tukituki ena mata ni katuba ni matavuvale na Meurs ena 68 Jamieson Street, Warrnambool. A dolava mai o Loisi, ka rau kaya na daukaulotu ni tiko vei rau e dua na itukutuku bibi me baleti Jisu Karisito kei na Nona Lotu me rau wasea. 

A sauma o Lois, “Keirau a masulaka tiko mo drau lako mai—ia drau na sega mada ni se ni curu rawa mai ena gauna oqo. Na luvei keirau (o Julie yabaki rua kei Peter vula ono) erau tauvi chickenpox, de na qai dewavi kemudrau.” A kerei rau me rau qai lesu tale mai ena macawa tarava. 

A tukuna o Lois vei Fred me baleta na veisiko oya, ka rau tomana tiko nodrau masulaka me rau kakua ni guilecava na daukaulotu me rau lesu tale mai. Erau a sega ni kila se o cei erau veitaratara kaya tiko. 

Erau a lesu tale mai o Elder Jones kei Elder Erickson ena macawa ka tarava ka tekivu vakavulici Lois kei Fred. Ena nodrau veivakavulici, erau a sauma na taro kece a tu ena nodrau lisi balavu o Fred kei Lois. Erau a vakamacalataka na ituvaki ni Kalou, lewa ni matabete, na Tucaketale kei na bula ni oti na mate, na inaki ni bula, vakatorocaketaki ni vakabauta, kei na cakacaka vakalotu ni papitaiso kei na sakaramede. 

Erau a dolava o Fred kei Lois na nodrau ivolanikalou—sa makataki oti mai na nodrau vuli taumada—ka kunea na veivakadeitaki me baleta na veika kece erau vakavulica tiko na daukaulotu. 

Ena vuqa na yabaki e muri, ni’u a kacivi me’u dua na Vitusagavulu ni iWasewase, au a veivosaki kei Elder Bruce Jones me baleta na veika a sotavi oqo. A tukuna vei au ni nodrau gauna mai Warrnambool, me yacova na gauna erau qai sotavi rau kina na noqu itubutubu, e a dua na veivakatovolei levu ki na nona vakabauta. Ia na nona vakavulici rau o Fred kei Lois, kei na nodrau sauma mai ena ivolanikalou veivakadeitaki mai na Veiyalayalati Vou, a vakacaudreva tale na nona vakabauta ka yaco me dua na gauna ni veisau ena nona bula. 

Erau a papitaiso ka vakadeitaki o Lois kei Fred e nai ka 5 ni Jiulai 1957—ni oti ga e tolu na macawa na nodrau sotavi rau na daukaulotu. Sega ni dede, era a curu mai ki na Lotu eso tale na matavuvale, ka tekivu vakayacori soqoni na tabana vou ena nodratou vale na Meurs e Jamieson Street. 

O keda kece e rawa ni dikeva lesu na noda vakabauta ki na dua na italanoa ni saumaki mai—na noda ga se o ira na lewe ni matavuvale era a ciqoma na kosipeli vakalesui mai i Jisu Karisito. E vakananuma vei au na veivosa oqo mai na imatai ni wase ni Vunautaka na Noqu Kosipeli: 

“Era wavoliti iko tu na tamata . . . era vakasaqara tiko na inaki ni bula. . . . Era gadreva tu na ‘vakacegu ena vuravura oqo kei na bula tawamudu ena vuravura sa bera mai’” (Vunau kei na Veiyalayalati 59:23). 

“E vuqa era sa sega ga ni kila rawa na ka dina ni ra sega ni kila na vanua me ra vakasaqara kina” (Vunau kei na Veiyalayalati 123:12). 

Nikua, eda sa kila ni noda sureti ira ga na noda itokani me ra lako mai ki lotu vata kei keda ena vakarautaka na veika sotavi vinaka duadua e rawa ni ra sotava. Era na vulica e levu tale na ka me baleti Jisu Karisito, kunea na isau ni nodra taro, ka vakila ni ra sa ciqomi mai vei ira na lewenilotu vakataki iko. Era na vakila e dua na yalo uasivi ni ra vakaitavi ena sakaramede. E vuqa era na gadreva me ra vulica eso tale na ka—ka kena itinitini me ra tekivuna na nodra ilakolako ena salatu ni veiyalayalati ena papitaiso. 

Au na dau vakavinavinaka tu ga vei rau o Elder Jones kei Elder Erickson—kei na nodrau marau na noqu itubutubu ni rau sa kunea na Lotu vakalesui mai ni Veiyalayalati Vou, sa ikoya na Lotu i Jisu Karisito ni Yalododonu Edaidai.