Ngaahi peesi fakalotofonuá
ʻOku ʻOmi ʻe hono Fakamuʻomuʻa ʻo e ʻOtuá ʻa e Melinó mo e Lavameʻá
ʻI he taʻu kuo ʻosí, ʻi he hoko mai ʻa e sivi fakaʻosinga ʻo e taʻú, naʻá ku ongoʻi hohaʻa ʻaupito. ʻI heʻeku hoko ko ha tokotaha ʻoku hohaʻa maʻu peé, naʻe ʻikai ke u lava ʻo mapuleʻi ʻeku ngaahi ongo fakaelotó. ʻI hoku lotó, naʻá ku toutou pehē loto pē, he ʻikai ke u lavameʻa. Te u tō. Naʻe fonu ʻeku fakakaukaú ʻi he loto-veiveiuá, pea kamata ke u ongoʻi hē.
Ka naʻá ku ngāue mālohi—naʻá ku fakaʻaongaʻi ha taimi lahi ke ako mo teuteu—kae mahuʻinga angé, naʻá ku falala kia Kalaisi. Ko ha meʻa ia he ʻikai ke u teitei fakaʻiseʻisa ai. Koeʻuhí naʻá ku fakamuʻomuʻa ʻa e ʻOtuá, naʻá ku maʻu ha meʻa naʻe mahulu ange ia ʻi he lavameʻá. Naʻá ku maʻu ha nonga.
Ko Ha Fakavaʻe ʻOku Fakatefito ʻi he Ongoongoleleí
ʻOku mau toko fā ʻi hoku fāmilí: ko ʻeku ongomātuʻá, ko hoku tuongaʻané, mo au. Kuo mali ʻeku ongomātuʻá ʻi ha taʻu ʻe 35, pea kuo mali hoku tuongaʻané he taimí ni ʻi ha taʻu ʻe nima. Naʻe aʻu ʻo ne fakaului mo papitaiso hono uaifí.
Neongo naʻá ku tupu hake mo hoku tuongaʻané ʻi he Siasí, ka naʻe ʻikai ke ma lava ʻo fakafalala ki he fakamoʻoni ʻa ʻema ongomātuʻá. Naʻe pau ke ma maʻu ʻema tuí ʻo fakafou ʻi heʻema ngaahi aʻusiá, tautautefito ki he lotolotonga ʻo e ngaahi faingataʻa ʻo e moʻuí. Pea kiate aú, ko e taha ʻo e ngaahi aʻusia ko iá ne fakafou mai ia ʻi heʻeku ngaahi siví.
Ko Hono Ikunaʻi ʻo e Manavasiʻí ʻAki ʻa e Tuí
ʻI he ofi mai ʻa e siví, naʻe lava ke u ongoʻi ʻa e tupulaki ʻeku loto-mafasiá. Kapau naʻá ku muimui ʻi heʻeku founga fakakaukau ko ha “tangata fakakakanó,” ne u mei pehē loto pē, te ke tō, he ʻikai ke ke lava ʻo fai ʻeni. Naʻá ku fiemaʻu ke u nonga, ka naʻe ʻikai ke u ʻilo pe ʻe founga fēfē.
ʻI he kamataʻangá, naʻá ku tokanga taha pē ki he akó, toe ako e ngaahi lēsoní, pea ako ki he lahi taha ne u ala lavá. Ka naʻá ku ʻiloʻi he ʻikai feʻunga ia, kimuʻa pea hoko mai ʻa e siví, naʻá ku tūʻulutui ʻo lotu, ne u ʻaukai, peá u ako ʻa e folofolá, ʻo fakakaukau maʻu pē ʻo ope atu ʻi he ngaahi meʻa ʻo e māmani ko ʻení.
Naʻe māmālie pē ʻeku ongoʻi ʻa e liliu hoku lotó. Naʻe ʻikai ke u toe ongoʻi lōmekina ʻi heʻeku manavasiʻí. Ka naʻe fakafonu au ʻaki ha nonga mo ha mālohi.
Mālohi mei he Folofolá
ʻI he taimi tatau pē lolotonga ʻeku teuteu ki heʻeku ngaahi siví, naʻa mau ako ʻa e Fuakava Motuʻá ʻi he seminelí. Ko ha tāpuaki maʻongoʻonga ʻeni he naʻá ku maʻu ha ngaahi tali lahi ki he meʻa naʻá ku fiemaʻú. Ko e potufolofola ʻe taha naʻá ne tokoniʻi aú ko e Lea Fakatātā 3:5–6:
“Falala [ki he ʻEikí] ʻaki ho lotó kotoa; pea ʻoua naʻá ke faʻaki ki ho poto ʻoʻoú. Ke ke Fakaongoongo kiate Ia ʻi ho hala kotoa pē, pea ʻe fakatonutonu ʻe ia ho ngaahi ʻalungá.”
Ko e meʻa tofu pē ia naʻá ku fakahokó. Naʻe ʻikai ke u fakafalala ki hoku mālohi ʻoʻokú, ka naʻá ku tuku ke tataki au ʻe he ʻOtuá. Pea naʻá ku fakatokangaʻi kuó Ne ʻosi ʻafioʻi hoku tuʻunga malavá—naʻá Ne ʻafioʻi te u lava ʻo ikuna.
Ko e Mālohi ʻo e Fakahā Fakatāutahá
Ko e meʻa ʻe taha naʻá ne ʻomi kiate au ʻa e nongá ko hono maʻu hoku tāpuaki fakapēteliaké. ʻI heʻeku lau iá, naʻá ku ongoʻi ʻa e ʻofa ʻa ʻeku Tamai Hēvaní, pea naʻá ku ʻiloʻi naʻá Ne tokangaʻi au. Naʻe ʻomi ʻe hoku tāpuakí ha fakafiemālie, mālohi, mo ha loto-toʻa ke u laka atu ki muʻa.
Naʻe ʻi ai ha ngaahi momeniti naʻá ku kei ongoʻi veiveiua ai ʻi heʻeku feinga ke foki maí, ka ʻi he taimi kotoa pē, naʻá ku fakamanatu kiate au ʻa e ngaahi talaʻofa ʻi hoku tāpuakí. Naʻá ku pikitai ki he ngaahi talaʻofá, pea naʻa nau hoko ko ha fakamaʻunga ʻo ʻeku tuí. Naʻá ku ʻiloʻi te u lava ʻo fai ha faʻahinga meʻa pē mo e ʻOtuá.
Lavameʻa ʻo Fakafou ʻia Kalaisí
Ne faifai pea aʻu ki he ʻaho siví. Naʻe ʻikai ke u toe fonu ʻi he manavasiʻi, ka naʻá ku maʻu ha ongo kehe—naʻá ku ongoʻi nonga. Naʻe ʻikai ke u hohaʻa ki heʻeku ngaahi olá. Kuó u fai ʻa e meʻa kotoa pē naʻá ku lavá, pea naʻá ku tekaki e toengá ki he toʻukupu ʻo e ʻOtuá.
ʻI he taimi ne maʻu ai e olá, naʻá ku fiefia ke sio kuó u fakahoko lelei ia, ʻo lelei ange ʻi he sai peé! Kae mahulu hake ʻi heʻeku lavameʻá, naʻá ku houngaʻia ʻi he meʻa kotoa pē kuo fai ʻe he ʻOtuá maʻaku ʻi he taʻú kakato, ki he mālohi naʻá Ne foaki maʻakú, pea mo e nonga naʻe ʻikai ke u teitei fakakaukau te u lava ʻo maʻú.
Ko e taimi ia naʻe mahino ai kiate au ha meʻa mahuʻinga: ʻoku ʻikai ngata pē ʻi hono tuku ke lāngilangiʻia ʻa e ʻOtuá ʻi heʻetau moʻuí ke tau lavameʻá—ka ʻoku tokoni ia ke tau laka atu ki muʻa ʻi he nonga mo e loto-falala.
Ko ha Lēsoni Tuʻuloa ʻi he Falala ki he ʻOtuá
ʻI heʻeku manatu ki aí, ʻoku ou ʻiloʻi naʻe mahulu hake ʻa e aʻusia ko ʻení ʻi ha sivi pē ʻi he akó—ka ko hano siviʻi ia ʻo e tuí. Naʻá ku ako ko e taimi ʻoku ou falala ai ki he ʻEikí, ʻokú Ne fakamālohia au. Hangē ko ʻene hā ʻi he Filipai 4:13, “ʻOku ou faʻa fai ʻa e ngaahi meʻa kotoa pē ʻia Kalaisi ʻokú ne [fakamālohia aú}.”
Ka ko e meʻa mahuʻinga taha naʻá ku akó ko e tokanga moʻoni mai ʻa e ʻOtuá kiate kitautolú. ʻOkú Ne ʻafioʻi ʻetau ngaahi feingá, ʻokú Ne ʻafioʻi ʻetau ngaahi hohaʻá, pea ʻokú Ne finangalo ke tokoniʻi kitautolu. ʻI he taimi ʻe niʻihi, ʻoku ʻikai ke tau lava ʻo vakai ki hotau tuʻunga malavá, ka ʻokú Ne ʻafioʻi ia. ʻOku fakamanatu mai ʻe he Tokāteline mo e Ngaahi Fuakava 18:10: “Manatu, ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá.” ʻOku kau heni au mo koe.
Koeʻuhí naʻá ku fakamuʻomuʻa Ia, naʻá Ne tataki au, foaki mai ha nonga, mo tokoniʻi au ke u lavameʻa. Pea ʻoku ou ʻiloʻi te Ne fai maʻu pē ʻa e meʻa tatau ki ha taha pē ʻoku falala kiate Ia.