Tangutu ʻi he Hala ʻo e Fakamoʻuí

ʻI he taʻu ʻe tolu kuohilí, naʻe ʻilo ai ʻoku ou puke ʻi he mahaki ko e Pākinisoní—ko ha fokoutua ʻokú ne fakatupunga ha tetetete mo e fakakekeva lahi. Ko ha ongoongo fakaloloma ia, pea naʻá ku fakakaukau ko e ngataʻanga ia ʻeku moʻuí.

Lolotonga ʻa e ngaahi māhina siʻi hono hokó, naʻá ku ʻi ha tūkunga fakapoʻuli ʻo e loto-hohaʻá mo e loto-mafasiá. Naʻá ku manavasiʻi ki he ngaahi faingataʻa naʻe hanganaki mai mei muʻá. Naʻá ku fakakaukau he ʻikai ke u lava ʻo moʻui fuoloa mo e mamahi taʻetuku ʻi hoku ongo nimá mo e tetetete hoku ongo laʻinimá. Naʻá ku fakaʻamua naʻá ku tangutu ʻi he hala ʻo e Fakamoʻuí ʻo ala ki Hono kofú, ʻo hangē ko ia naʻe fai ʻe he fefine naʻe ʻau totó!

“He naʻá ne pehē, Kapau te u ala pē ki hono kofú, te u moʻui ai” (Maʻake 5:28).

Neongo ʻa e meʻa fakafaitoʻó mo e ngaahi lotu lahi naʻe fai ʻo kolea ha fakafiemālié, ka naʻe ʻikai pē ke maʻu ha faitoʻo. ʻI ha ʻaho ʻe taha, ʻi heʻeku fakahā hoku lotó ki he Tamai Hēvaní, naʻá ku maʻu ai ha mahino loloto ange. Naʻe ʻosi fakamoʻui au ʻe he ʻEikí—ʻo ʻikai ʻi he fakamoʻui fakatuʻasino naʻá ku ʻamanaki ki aí ka ʻi he fakamoʻui naʻá ku fiemaʻú: ʻa e fakamoʻui fakalaumālié.

Ko e taimi ia naʻá ku fakatokangaʻi ai naʻe tupulaki ʻeku falala ki he “faiako fakalaumālie” ʻa e ʻOtuá. Naʻe toe fakamātoato ange ʻeku lotua mo kaungā-ongoʻi ʻa e niʻihi kehé. Naʻe kamata ke u tuku ha taimi ʻi he ʻaho kotoa ke fakalaulauloto mo mavahe mei he ngaahi fakahohaʻá, ʻo kumi ʻa e ngaahi lēsoni te u lava ʻo ako mei hoku ngaahi faingataʻaʻiá. Naʻe ʻi ai ha ʻuhinga foʻou ʻo e Fakalelei ʻa Sīsū Kalaisí, pea naʻe fakaʻau ke toe vivili ange ʻeku fiemaʻu ke fakatomalá.

Neongo ʻeku mamahí, ka ʻi he taimi naʻá ku ongoʻi ai ʻoku ʻikai ha toe meʻa ke u tokoni aí, naʻá ku ʻohovale ʻi ha ui ke u hoko ko e palesiteni Fineʻofa ʻi he uōtí. Naʻe hoko hono fakangaloki ʻeku ngaahi palopalemá lolotonga ʻeku tokoniʻi ʻa e kakai fefine kehé ko ha tāpuaki ia mei ha Tamai ʻofa, ʻo hangē naʻá Ne folofola mai naʻá Ne kei falala mai pē kiate aú. Ko hono olá, kuó u maʻu ʻa e ʻofa ʻa ha kau fafine angaʻofa ʻoku mahino kiate kinautolu hoku ngaahi faingataʻaʻiá.

ʻI he ʻaho ní, ʻoku ou ongoʻi ai ʻoku ou tangutu ʻi he hala ʻo e Fakamoʻuí. ʻI heʻeku tatali kiate Iá, ʻoku fakaleleiʻi au ʻe hoku ngaahi faingataʻaʻiá.

ʻE lava ke fakamoʻui ʻe he ʻEikí hotau mamahí, ʻo tatau ai pē pe ʻoku fakatuʻasino, fakaeloto, pe fakalaumālie, ka kuo pau ke tau ngāue ʻaki ʻa e tui ki Heʻene fakamoʻuí mo tatali ʻi he faʻa kātaki. ʻE ofi ʻaupito ʻa e Fakamoʻuí ʻi ha potu ʻi he halá, ʻa ia te tau lava ai ʻo ala ki Hono kofú mo fanongo ki Heʻene folofola, “ʻOfefine, kuo fakamoʻui koe ʻe hoʻo tuí; ʻalu ʻi he fiemālie, peá ke moʻui mei hoʻo mahakí” (Maʻake 5:34).