Toʻukupu Tākiekina ʻo e ʻOtuá

Tā fakatātaaʻi ʻe Brian Call

ʻI he taimi naʻe feitama ai hoku uaifí ʻi heʻema tama fika tolú, naʻe ʻiloʻi ʻokú ne ʻi ha tuʻunga naʻe faingataʻa ai ke ne lue. Naʻe hoko ʻa e meʻá ni mo ha ngaahi palopalema kehe ke ne toka mohenga ai ʻi he konga lahi ʻo e vahaʻataimi ʻo ʻene feitamá.

Naʻe faingataʻa ʻa e fāʻelé, pea naʻá ne nofo falemahaki ʻi ha ʻaho ʻe valu. Naʻa mo e hili ʻene foki ki ʻapí, naʻá ne kei ʻi ha tuʻunga tatau pē. Naʻe ʻikai fuoloa kuo ʻilo ʻe he kau toketaá mo ha ngaahi palopalema lahi ange. Naʻe pau ke fakafenāpasi ki ai homau fāmilí mo fokotuʻu ha meʻa foʻou ke mau angamaheni ki ai.

Ko hono olá, naʻá ku fatongia ʻaki ʻa e ʻā poʻulí ke tokangaʻi ʻema kiʻi pēpē toki fāʻeleʻí. Naʻá ku ngāue taimi kakato, pea ko ha pole ia ke u ʻā maʻu pē ʻi he lolotonga ʻa e poʻulí. Naʻe kamata ke u lau ʻa e ngaahi hisitōlia ʻo ʻeku ngaahi kui paioniá lolotonga ʻeku ʻaá, ke ʻoua naʻá ku ongoʻi loto-foʻi. Naʻe ʻi ai ʻa e ngaahi meʻa naʻá ku maheni ai mo kinautolu, ka ʻi heʻeku lau ʻa e ngaahi talanoa ʻo ʻeku ongo kui uá pea mo kinautolu naʻe ʻi muʻa ʻiate kinauá, naʻá ku ʻohovale ʻi he fakaʻau ke mahuʻinga ʻa ʻena moʻuí.

ʻI he lahi ange ʻeku ʻilo ki hoku fāmilí, naʻe fakalotoa fakalaumālie au ʻe heʻenau tuí. Ko e fiefia naʻá ku maʻú naʻá ku ongoʻi ia ʻi he taimi pē ko iá. Naʻe ʻikai ke u toe ongoʻi mafasia ʻi he ʻā poʻulí. Ko hono moʻoní, naʻe pau ke u fakamālohiʻi au ke u mohe ʻi he taimi naʻe nonga ai homa ʻofefiné.

Naʻá ku maʻu ha loto-houngaʻia moʻoni kiate kinautolu naʻe omi ʻi muʻa ʻiate aú. Naʻe liliu moʻoni hoku lotó ki heʻeku ngaahi tamaí (vakai, Tokāteline mo e Ngaahi Fuakava 110:14–15; Malakai 4:6). Naʻe lava ke u sio ki he toʻukupu tākiekina ʻo e ʻOtuá ʻi heʻenau moʻuí, pea naʻe lava ke u ongoʻi ʻenau ʻofa kiate Iá.

Naʻe liliu ʻeku fakakaukau ki he moʻuí ʻi heʻeku vakai ki ha ʻata lahi ange ʻi he meʻa naʻá ku maʻu kimuʻá. ʻI heʻeku laukonga fekauʻaki mo e ngaahi tūkunga faingataʻa naʻe kātekina ʻe heʻeku ngaahi kuí, naʻe hoko ʻenau vilitakí ko ha fakafiemālie kiate au ʻi hoku tūkungá.

Talu mei ai mo ʻeku ongoʻi ʻa e ivi tākiekina ʻo kinautolu naʻa nau muʻomuʻa ʻiate aú ʻi ha ngaahi founga fakataautaha kuó ne ueʻi fakalaumālie au. ʻI heʻeku aʻusia ha faʻahinga ola pehē, kuó u ʻilo ai ha ngaahi founga ke fekumi, fakatahatahaʻi, mo vahevahe ha hisitōlia lahi ange mo hoku fāmilí koeʻuhí ke nau lava ʻo aʻusia ʻa e ngaahi tāpuaki tatau.

Kuo tupulaki ʻeku holi ke ʻalu ki he temipalé. ʻOku ou ongoʻi ʻoku fiemaʻu ke u fakaʻapaʻapaʻi ʻa e tukufakaholo faivelenga ʻo ʻeku ngaahi kuí. ʻOku ou fie ʻoange kiate kinautolu ʻa e faingamālie ke nau fakahoko ai ha ngaahi fuakava mo hotau Fakamoʻuí. ʻI heʻeku ʻave ʻa e ngaahi hingoa ʻo e faʻahinga ko ʻeni kuo pekiá ki he temipalé, kuo fakamālohia ai hoku vā fetuʻutaki fuakava mo e Fakamoʻuí, pea kuó u ongoʻi ai Hono ivi tākiekina faifakamaʻá ʻi heʻeku moʻuí.