Te mau ’api nō pātifita
Te Nabeina Green Market Incorporated
Hō’ē tere nō te fa’aro’o, Tāvinira’a ’e te ha’amaita’ira’a o te huira’atira
’Ua pi’ihia tō’u hoa fa’aipoipo ’o Tuahine Birita, ’e ’o vau iho nei nō te tāvini ’ei misiōnare pa’ari i Nabeina, hō’ē motu na’ina’i i rōpū i te Pātifita. I te taime māua i tāpae ai i reira, ’ua fa’ari’i māua i te hau ’e te mana’o ’ana’anatae. I muri e rave rahi pure, ’ua ani māua i te parau fa’ati’a i te peresideni Kendall, ’ia fa’aea i Nabeina i te roara’a o tā māua tau misiōni. ’Ua fa’ati’ahia tā māua anira’a, mea nā reira tō māua tere i te ha’amatara’a, e tere nō te fa’aro’o, te tāvinira’a ’e te patura’a i te huira’atira o tē taui i tō māua orara’a ’e te orara’a o rātou tā māua i tāvini.
Mau hi’opo’ara’a ’e te mau tāmatara’a
Te rahira’a fa’aro’o i Nabeina ’o te Katorita ’e te ’ēkālesia Porotetani ïa, e ma’a vāhi iti Feiā mo’a noa. E mea fifi ri’i te porora’a ’evanelia, terā rā mea pūai a’e te pi’ira’a nō te tāvini i te ta’ata. ’Ua hi’o māua i tō rātou tūora ’e tā rātou mau rāve’a, te mau tāne ihoā rā tei ’aravihi i te tautai. Terā rā, maumauri’i te fa’aorara’a i tō te ’utuāfare nō te mea tē ’ere rā i te mātēria nō te tautai. I tō māua hāro’aro’ara’a i tō rātou mau fifi, ’ua pūai te mana’o e tauturu.
E fa’aurura’a nō ’ō mai i te Atua : Te anira’a i te ’Āfata tōtauturu nā te ao nei
I te hō’ē pō, ’a feruri noa ai nō ni’a i te mau hina’aro o te huira’atira, ’ua tae mai te fa’aurura’a e tītau i te ’āfata tōtauturu a te ’Ēkālesia. ’Ua hi’o mai māua i te hō’ē ’ōpuara’a e nehenehe e hōro’a i te pūai i roto i te rima o te mau ta’ata tautai nō te fa’atāmā’a i tō rātou ’utuāfare ’e te turura’a i te ha’api’ira’a o tā rātou mau tamari’i. Ma te tauturuhia e Elder ’e te Tuahine Redmond, ’ua fa’aoti māua i te ’ōpuara’a ’ia hōro’a i te mātēria tautai, hō’ē poti rā’au, ’e hō’ē mātini poti. I tō māua maere rahi, ’ua fa’ati’ahia tā māua anira’a, ’e ’ua fa’ata’ahia te tuha’a moni. Mea nā reira te ha’amatara’a o teie ’ōpuara’a i te ti’ara’a.
Te fānaura’a o Te Nabeina Green Market Incorporated
Ma te rohira’a e te peresideni ’āma’a i reira, te peresideni Mweea Mweea, ’ua ha’amau mātou i te hō’ē tā’atira’a tautai nā te huira’atira, pi’ihia te Nabeina Green Market Incorporated. Hau atu i te hō’ē tauto’ora’a fa’arava’ira’a faufa’a, ’ua rōtahihia teie tā’atira’a i ni’a i te tāhō’ē ’e fa’arava’ira’a iāna iho i rotopū i te mau ta’ata nō Nabeina.
Te tāpaera’a mai te mau mātēria tautai ’e te poti
O te mau ’ūpe’a tautai tei tae mātāmua mai, ’e ’ua fa’a’ohipa ’oi’oi te huira’atira i te reira. ’A tīa’i noa ai i te poti rā’au, ’ua hōro’a vau i tā’u poti plastique i te mau ta’ata tautai. I te 9 nō Fepuare 2025, ’ua tae mai te poti rā’au ’e tōna mātini. ’Ua ravehia hō’ē ’ōro’a ta’a ’ē tei ’āmui pā’āto’a mai i te huira’atira nō te ha’amāuruurura’a ’e te pure. E taime hōhonu mau teie i te pae vārua, e ha’apāpūra’a i tō mātou ’itera’a nō te rima o te Fatu i roto i teie ’ōpuara’a.
E fafaura’a nā te huira’atira ’e e ’ohipa pupu
Te manuiara’a o teie ’ōpuara’a Nabeina Green Market Incorporated ’ua fa’atumuhia ïa i ni’a i te ’ohipa ’āmui. I te mau hepetoma ato’a, e fa’aho’i mai te mau ta’ata tautai i te mau ’ūpe’a ’e e tātā’i i te reira ’a ruru noa ai nō te ’āparau i ni’a i te ’ohipa tāi’a ’e te maita’i ’o te huira’atira. I te reira mau rurura’a e fa’a’ite rātou i tō rātou māuruuru nō teie ’ōpuara’a ’e nāhea te reira i te ha’amaita’ira’a i tō rātou orara’a. ’Ua parau mai te hō’ē ta’ata tautai, ma te roimata tahe, « E ’ere teie poti ē poti noa ; e ō nō ’ō mai i te Atua ra. ’Ua roa’a fa’ahou te ti’aturira’a ’e te hō’ē ananahira’a ».
Te ’ā’au māuruuru ’e te mau ’itera’a pāpū
Tē māuruuru nei te huira’atira nō Nabeina nō te turu a te ’Āfata tōtauturu nā te ao a te ’Ēkālesia. E pāhonora’a te mātēria tautai ’e te poti i tā rātou mau pure, tei hōro’a i tō rātou ’utuāfare i te rāve’a ’ia ora rātou. ’Ua fa’a’ite ato’a, nāhea teie tauturu i te ha’apūaira’a i tō rātou fa’aro’o. Hō’ē vahine tei parau ē, « ’ua pure noa na mātou ’ia roa’a te tahi rāve’a nō te fa’atāmā’a i te mau tamari’i. Teienei rā, ’aua’e teie poti ’e te mau ’ūpe’a, e ’ite ai mātou i te rima ’o te Atua i roto i tō mātou orara’a. ’Aita ’oia i ha’amo’e roa a’e ia mātou ».
Te Here ’e te Tāvinira’a hau a’e i te Fa’aro’o
Noa atu te rahira’a o te huira’atira e ’ere nō tā tātou ha’apa’ora’a, te Tuahine Birita ’e ’o vau iho nei ’ua fa’atumu māua i tō māua ti’aturira’a i ni’a i te tāvinira’a i te mau tamari’i ato’a a te Atua. Tā māua fā, e ’ere i te fa’ahepora’a i tā māua ha’apa’ora’a terā rā, nō te fa’a’itera’a i te here huru Mesia nā roto i te tāvinira’a. ’Ua tāhō’ē teie ’ōpuara’a i te mau ta’ata noa atu te ha’apa’ora’a fa’aro’o ’e’ē, ’e tē māuruuru nei ’ia riro ’ei mauiha’a i roto i te rima ’o te Atua.
Te ’ōpuara’a The Nabeina Green Market Incorporated, e fa’a’itera’a terā nō te mana o te fa’aro’o, te tāvinira’a ’e te huira’atira. ’Aua’e maoti te arata’ira’a a te Fatu, te tōtauturu nā te ao nei, ’e te nūna’a nō Nabeina, ’ua fa’atupuhia te orara’a manuia tau roa. ’Ua hau atu te mau ha’amaita’ira’a i te rāve’a fa’arava’ira’a faufa’a, rōtahihia i ni’a i te tāhō’ēra’a ’e te fa’arava’ira’a iāna iho.
’Ua ’ite mata māua te Tuahine Birita i te rima ’o te Fatu, mai te fa’aurura’a mātāmua ē tae atu i te ha’amaita’ira’a o te poti. ’Ua pāpū ia māua teie te ha’amatara’a nō Nabeina, ’e tē tīa’i nei māua ’ia ’ite nāhea te Fatu e tāmau i tāna tauturu nō rātou.
« I po’ia na ho’i au, ’e ’ua hōro’a mai ’outou i te mā’a nā’u : i po’ihā na vau e ’ua fa’ainu mai ’outou iā’u ; e ta’ata ’ē au, ’e ’ua ’ite mai ’outou iā’u » (Mataio 25:35).
Te ’ōpuara’a The Nabeina Green Market Incorporated, e fa’ati’ara’a teie nō te pāpai’ra’a mo’a e tāhō’ē nei i te huira’atira nō te amo tahi e te tahi nā roto i te fa’aro’o ’e te tāvinira’a.