E fārerei fa’ahou ānei māua i tā māua mo’otua tamāhine ?

Fa’ahōho’ara’a nā David Malan/Malan Creative

I te matahiti 1999 ’ua pohe tā māua tamaiti matahiapo. ’Ua vaiiho mai ’oia i muri iāna hō’ē vahine ’e hō’ē tamāhine hō’ē matahiti, e aura’a maita’i ’e te fa’ahiahia mau tō mātou, te mau fārereira’a i te mau hepetoma.

Nō teie mau tupura’a fifi, i te torura’a o te matahiti i te mahana fānaura’a o tā māua mo’otua tamāhine, ’o te taime hope’a ïa tō māua paraparaura’a iāna. E rave rahi matahiti tō māua purera’a, te ha’apaera’a i te mā’a ’e te ti’aturira’a ē, e fārerei fa’ahou māua iāna noa atu te huru o te rāve’a.

I roto i te ’āmuira’a rahi nō ’Ātopa 2018, ’ua hōro’a mai te peresideni Russell M. Nelson i te hō’ē anira’a manihini ma te hō’ē parau fafau : « Tē a’o nei au ia ’outou ’ia ’imi i te rāve’a nō te fa’ata’a i te hō’ē taime fārereira’a tāmau noa ’e te Fatu—nō te ti’a i roto i tōna fare mo’a—i muri iho e tāpe’a ti’a noa i terā taime fārereira’a ma te ’oa’oa. Tē parau fafau atu nei au ē, e fa’atae mai te Fatu i te mau semeio ’o tāna i ’ite e mea tītauhia nō ’outou, ’ia fa’atusia rā ’outou nō te tāvini ’e nō te ha’amori i roto i tōna mau hiero ».

I tō’u fa’aro’ora’a i teie mau parau, ’ua ’ite au ē tē paraparau mai nei te Metua i te ao ra iā’u nā roto i tāna peropheta. Nō reira, ’ua fafau māua tā’u tāne ’ia ha’amata i te haere i te hiero i te mau mahana piti ato’a ’e ’ia ha’apa’o i teie fafaura’a « ma te ti’a ’e te ’oa’oa ».

I te hō’ē mahana i te matahiti 2019, ’ua hāpono mai tā māua mo’otua tamāhine e 21 matahiti tōna i terā taime, i te hō’ē poro’i ma te mana’o-’ore-hia. ’Ua tae marū noa mai tāna poro’i i te ha’amatara’a, terā rā ’a tāmau noa ai tāna mau poro’i i te tae mai, ’ua ha’amata ’oia i te ui mai i te mau uira’a ’o tei ’īriti i te hō’ē rēni māere o te ’āparaura’a. ’Ua fa’ati’a ’oia ’ia tomo atu māua i roto i tōna orara’a, ma te fē’a’a i te ha’amatara’a ’e i muri iho ma te pinepine.

I te matahiti 2021, ’ua ani manihini māua iāna ’ia haere mai nā muri i tō mātou ’utuāfare nō te ’ōro’a Thanksgiving [ha’amāuruurura’a]. ’Ua fa’ari’i ’oia, ’e ’ua riro ’ei taime fa’ahiahia mau nō mātou i te ha’amātaura’a iāna. ’Ua ’ōhie roa nōna ’ia fa’ahoa atu i tōna mau metua vahine ’e mau metua tāne feti’i, te mau tamāhine ’e te mau tamāroa feti’i. ’Ua hina’aro ’oia ’ia riro tōna haerera’a mai i te ’ōro’a Thanksgiving ’ei peu tumu.

Hō’ē matahiti i muri mai, ’ua ’āmui mai ia mātou te hō’ē tamaiti tei ātea ’ē. I te ’āva’e Māti 2024, nō te taime mātāmua roa i roto i tō mātou ’utuāfare, ’ua fa’atupu mātou i te hō’ē rurura’a ’utuāfare, tē vai ra i roto te mau tamari’i ora ato’a, tō rātou mau hoa fa’aipoipo ’e nā 16 mo’otua.

’Ua ti’aturi noa na vau ē, tē paraparau nei te peropheta nō te Fatu. Tē ti’aturi nei au ē, teie temeio tei hina’aro-mau-hia ’ua tae mai maoti te arata’ira’a ’e te fafaura’a tei heheuhia mai a te peresideni Nelson.

E ’ere ’e aita roa tō’u ’itera’a pāpū ’e tō’u here nō tō’u Metua i te ao ra ’e tāna Tamaiti, i tupu maoti teie temeio. Teie rā tē māere nei au i te huru o tō Rāua iho here nō’u, ’e te huru o tā Rāua mau fafaura’a tei fa’ataehia i te peropheta e mea mana mau.