Te ueuera’a i te huero nō te pehe

Fa’ahōho’ara’a nā David Malan/Malan Creative

’Ua hina’aro noa na vau e ha’uti i roto i te pupu ’upa’upa a Temple Square, te pupu ’upa’upa a Te ’Ēkālesia a Iesu Mesia i te Feiā Mo’a i te mau Mahana Hope’a nei. Tē ha’uti nei vau i te mapu patapata ’e e parau tū’ite tā’u nō te pehe, e ’ere rā i te mea pāpū e rāve’a nō’u i te hō’ē mahana.

Tē ora nei ho’i au i Niu Terani.

Tē fa’aha’amana’o mai nei te Vārua Maita’i iā’u ē, e nehenehe au e « ’oa’oa » (Alama 29:3) ’ia riro ’ei pionie nō te pehe nā te ’Ēkālesia i Niu Terani ’e i te tahi atu mau tuha’a fenua. Tō’u pi’ira’a mātāmua i te 18ra’a o tō’u matahiti, ’ei arata’i hīmene i roto i te piha fa’ari’ira’a tamari’i. Mai te reira taime, ’ua ha’amaita’ihia vau i te arata’ira’a ’e te fa’atupura’a i te mau hāmanira’a pehe nā te titi ’e te pāroita, ’oia ato’a te ha’utira’a i te piāna i roto i te Paraimere. ’Ua fa’a’ite au i te pehe ’ati a’e ia NiuTerani ’e i Firipino ’e ’ua ’āpe’e atu vau nā te piāna i te hō’ē mahana ’ōpani ’īriti nō te hō’ē mata’eina’a a te ’Ēkālesia i Shanghai, Taina. ’Ua hīmene au i te hō’ē hīmene ’āpiti i te Pū Ha’api’ipi’ira’a Misiōnare i Provo.

’Ua fa’ati’a te pehe iā’u ’ia fa’aea noa i roto i te ’Ēkālesia i te roara’a o te hō’ē ’arora’a fifi nō te ahoaho ’e te ’aravī. I tō’u ’itera’a ē ’aita e ’ohipa ’ē atu tā’u e nehenehe e rave, ’ua ’ite a’era vau e nehenehe noa vau e parau ’ē i te tauturura’a nō te pehe. E tauturu te pehe iā’u ’ia hi’o i te ao nei nā roto i te mata pae vārua.

E nehenehe au e hāmani i te pehe ’e tā’u vahine ’e tā’u nā tamari’i e toru. Mātou pā’āto’a, ’ua ha’uti mātou i roto i te pāroita, ’ua hāmani i te hō’ē tauturu ’ohipa pehe nō te hō’ē ha’apurorora’a misiōnare a te misiōni nō Auckland Niu Terani, ’e ’ua hīmene nō te hō’ē ’āmuira’a titi nā ni’a i te natirara. ’Ua ’ite au nāhea te parau a te Atua, nā roto i te mau hīmene a te ’Ēkālesia e tītau manihini ai i te Vārua Maita’i, ’e e nehenehe e ha’aputapū i te mau ’ā’au o tō tātou ’utuāfare ’e te mau pāroita.

Tē tāmau nei au i te here i te pupu ’upa’upa a te Temple Square nā te ātea, ’ua ’ite rā vau ē, e ha’amaita’ihia tātou ’ia ’imi ana’e tātou i te mau rāve’a nō te tāvini ’e nō te ’ārue i te Fatu i te mau vāhi tei reira tātou ’e nā roto i te mau rāve’a rau e ti’a ai (hi’o Salamo 150:6). Tē māuruuru nei au ē, e nehenehe tātou e fa’a’ite i tō tātou ’itera’a pāpū māoti tā tātou mau hōro’a ’e mau tārēni, te pehe ihoā ra. ’Ua ha’amaita’ihia tātou, ’e e ha’amaita’i tātou ia vetahi ’ē, ’a fa’a’ite ai tātou i teie mau hōro’a ’e mau tārēni i te mau tamari’i a te Atua ’e ’ia « ’amo i te vāhi tei reira tātou i te ti’ara’a ».