Tā’u a’ora’a i te feiā ’āpī pa’ari nō ni’a i te arapaera’a’a ’e te fa’aipoipora’a

Mai te mea ē ’ua ui a’enei ’outou nāhea i te arapae, tē ti’aturi nei au ē « ma te hina’aro mau » ’o te hō’ē ïa o tā ’outou mau pāhonora’a mātāmua. E fa’ahōho’a atu vau i te reira nā roto i te hō’ē hi’ora’a.

’Ua ātea roa te rahira’a o te ’āfara’a o te taime o tō māua tā’u vahine arapaera’a. ’Ua fārerei au ia Catherine ’a haere ai māua i te fare ha’api’ira’a i Santiago, i Tīreni. ’Ua ha’amata māua i te arapae, ’ua ho’i rā ’oia i te fare i Antofagasta hou ’a fa’aoti ai au i tā’u parau tū’ite. Nō te mea ’ua hina’aro māua ’ia tupu tō māua aura’a, hō’ē ’aore rā e piti taime i te ’āva’e, e tere au nā ni’a i te pere’o’o uta ta’ata e 20 hora te maoro nō te ho’i i Antofagasta i te mau avatea mahana maha, e fa’aea vau i te mau hope’a hepetoma e ’o catherine (’oia ato’a te mau purera’a a te ’Ēkālesia), ’e e tere fa’ahou vau nā ni’a i te pere’o’o uta ta’ata e 20 hora te maoro nō te ho’i i Santiago nō te haere i tā’u ha’api’ira’a i te po’ipo’i mōnīrē i te hora 8.

I te mau mahana e’ita māua e nehenehe e ’āmui, ’ua paraparau māua nā roto i te niuniu. Nō te mea ’aita tā māua e niuniu ’āfa’ifa’i i taua taime ra, ’ua ho’o mai au i te hō’ē fa’anahora’a niuniu tei fa’ati’a iā’u ’ia tāniuniu-tā’ōti’a-ore nā roto i te mau fare niuniu paraparau. ’Ua fa’aea vau e rave rahi hora i roto i te hō’ē fare tāniuniura’a, ’e ’ia hina’aro te tahi atu ta’ata e fa’a’ohipa i te reira, e fa’aea vau ’e e tāniuniu fa’ahou vau ia Catherine ’ia oti mai tā terā ta’ata.

I te roara’a o teie ’ohipa, nō te mau fifi e rave rahi i roto i tō māua aura’a, ’ua ti’a iā’u ’ia ha’api’i mai ’ia hina’aro mau e nāhea vau i te paraparau ia Catherine.

Tē ani nei au ia ’outou ’ia ’ōpua ’e ’ia hina’aro mau i te arapaera’a. ’Ua ani mai te Peresideni Russell M. Nelson ia tātou ’ia riro ’ei ta’ata hina’aro mau ’e tō tātou ti’ara’a pipi. E nehenehe ato’a tātou e ’imi ’ia vai hina’aro mau i roto i tā tātou arapaera’a.

E ti’a ia tātou ’ia ui i te mau uira’a faufa’a rahi :

• E aha tō ’outou mana’o nō ni’a i te orara’a, te ’utuāfare, ’e te mea faufa’a roa a’e, te Fa’aora ?

• ’Ua ’ite au e aha te huru ’ohipa tā ’outou e rave ’e ’aita e au ’ia rave, e aha rā tō ’outou mau mana’o nō ni’a i te ’evanelia ?

• E aha tā ’outou mau fā ’e mau moemoeā ?

E ti’a i te mau uira’a hina’aro-mau-hia ’ia ’āpe’ehia nā roto i te ravera’a i te mau ’ātivite huru rau. ’A ’ārearea, ’a ha’apāpū rā ’ia rave ’āmui ato’a i te mau mea pae vārua. ’A rave i te mau ’ātivite ’o tē tauturu ia ’outou ’ia māramarama ’e ’ia ha’amātau mau i te tahi ’e te tahi.

Te fa’aro’o nā ni’a atu i te mata’u

I muri a’e i te hō’ē taime, e nehenehe te mā’itira’a e fa’aipoipo e riro ’ei mea fifi. ’Ua taiā noa vau ē tae roa atu i te taime ’ua fa’aipoipohia māua Catherine !

E riro paha te mā’itira’a e fa’aipoipo ’ei fa’aotira’a pa’ari, e ’ere rā i te fa’aotira’a tā ’outou e rave hō’ē noa taime. Te mā’itira’a e fa’aipoipo, ’o te mā’itira’a ïa ’ia fa’aho’i fa’ahou i tō ’outou hoa mure ’ore i roto i tō ’outou orara’a ’e ’ia ha’apūai ’āmui i te reira fafaura’a.

Mai te mea e uira’a tā ’outou nō ni’a i te fa’aipoipora’a ’aore rā te ’evanelia, e ti’a ia ’outou ’ia « tuatāpapa i te reira i roto i tō ’outou ferurira’a ; ’ei reira e ti’a ai ia ’outou ’ia ui [i te Fatu] ē ’ua ti’a ānei » (Te Ha’api’ira’a Tumu ’e te mau Fafaura’a 9:8) E ti’a ato’a ia ’outou ’ia ui ia ’outou iho ē, « ’Ua hina’aro ānei au ’ia mā’iti ’ia riro ’ei tuha’a nō te reira nō te toe’a o tō’u orara’a ? »

I tō’u fa’aipoipora’ahia, ’ua ani mai te tahi mau ta’ata iā’u ē tē taiā ra ānei au ’ia fa’ata’ahia vau mai tō’u nā metua. Tā’u pāhonora’a i te mau taime ato’a ’oia ho’i ’aita. I tō’u fa’aipoipora’a, ’ua fa’aoti au ē e rave i te mau mea ato’a e tītauhia ’ia manuia tō’u fa’aipoipora’a. Te aura’a ’o te mā’itira’a ïa i te mau mahana ato’a ’ia pe’e i te Fa’aora ’e ’ia fa’aipoipo ’oa’oa i tā’u vahine. ’Ua mā’iti au ’eiaha e vaiiho i te mata’u nō te fa’ata’ara’a ’ia fa’aātea ’ē iā’u i te hō’ē fa’aotira’a maita’i ’e te parauti’a.

’Ua parau te Peresideni Jeffrey R. Holland, Peresideni mono nō te pupu nō te Tino ’Ahuru Ma Piti ’āpōsetolo ē : « ’Ia tupu ana’e mai te māramarama mau, ’a ara i te fa’ahemara’a ’ia tātara ’outou i te hō’ē ’ohipa maita’i. Mai te peu e mea ti’a te reira i te taime ’a pure ai ’outou, ’e ’a ti’aturi ai ’outou i te reira ’e ’a ora ai ’outou i te reira, e mea ti’a ato’a ïa i teienei. ’A fa’aruru i tō ’outou mau fē’a’ara’a. ’A ha’avī i tō ’outou mau mata’u. ‘Nō reira, ’eiaha e fa’aru’e atu i tō ’outou ti’aturira’a.’ »

Te ti’ara’a mau ’oia ho’i e rave rahi o ’outou e hina’aro maita’i ’e te ’ā’au tae mau ’ia ’imi i te hō’ē hoa. ’Ua ’ite ’outou ē e hina’aro maita’i ’e te parauti’a te reira, terā rā ’ia tāfifi ana’e ’outou i te ’imi i te hō’ē ta’ata tā ’outou e tū’ati ra, e mana’o ’outou ē tē mau ra ’outou i roto i tō ’outou haerera’a i mua i ni’a i te ’ē’a nō te fafaura’a.

Nō ni’a i te reira, ’ua parau te tuahine Kristen M. Oaks : « Mai te mea e tāpa’opa’o ’outou i te taime nō te tīa’ira’a i te fa’aipoipora’a, ’a fa’aea i te tīa’i ’e ’a ha’amata i te fa’aineine. ’A fa’aineine ia ’outou iho nō te orara’a—nā roto i te ha’api’ira’a, te ’itera’a, ’e te fa’anahora’a. ’Eiaha e tīa’i i te ’oa’oa ’ia tu’uhia mai i ni’a ia ’outou. ’A ’imi i te mau rāve’a nō te tāvini ’e nō te ha’api’i mai. ’E te mea faufa’a roa a’e, ’a ti’aturi i te Fatu, ‘ma te pi’i i te i’oa o te Fatu i te mau mahana ato’a, ’e ma te ti’a pāpū i roto i te fa’aro’o i te mea e tae mai’ [Mosia 4:11]. ’E tē fafau nei au mai te mea e na reira outou, e tae mai te ’oa’oa ia ’outou. »

’Aita tō ’outou tere i ni’a i te ’ē’a nō te fafaura’a i fa’aea nō te mea ’aita ā ’outou i fa’aipoipohia. Tē vai noa ra tō ’outou tū’atira’a fafaura’a ’e te Fa’aora. Mai te mea tē ’aro ra ’outou i te pāto’ira’a, te vai-’ōtahi-ra’a, ’aore rā te mata’u, ’a ’āfa’i mai iāna i roto i tā ’outou mau ’arora’a. E arata’i ’oia ia ’outou. E tauturu ’oia ia ’outou.

Nō vetahi, e’ita te arapaera’a ’e te hina’aro ’ia ’itehia mai te hō’ē hoa mure ’ore e hōro’a ’oi’oi i te hotu. Nō vetahi ’ē e nā reira ïa. Noa atu te huru, ’ua ’ite au e fa’atupu te Atua i te mau fafaura’a ato’a tāna i fafau mai ia tātou mai te mea e hina’aro mau ’e e ti’aturi pāpū tātou iāna.

Noa atu te vāhi tei reira ’outou i te ao nei ’aore rā te mea e tupu ra ’aore rā ’aita e tupu ra i roto i tō ’outou orara’a, maoti Iesu Mesia, e nehenehe ’outou e fa’ari’i i te ’oa’oa i roto i te mau huru orara’a ato’a. ’O ’oia ’e tāna mau ha’api’ira’a te pāhonora’a i te mau taime ato’a.