« ’Ua tupu te hau i roto i tō’u ’ā’au », Liahona, Tiurai 2025.
Mau hōho’a o te faʼaroʼo
’Ua tupu te hau i roto i tō’u ’ā’au
’Ei pīahi utuutu ma’i, e au ra iā’u ē ’aita tō’u e taime nō tō’u pi’ira’a i roto i te ’Ēkālesia ’e tā’u ha’api’ira’a. ’Ua ha’api’i mai rā vau i tō’u ’āpīra’a ē, e arata’i te tāvinira’a ’e te ha’apa’ora’a i te mau fa’auera’a a te Atua i te hō’ē orara’a ’oa’oa.
Mau hōho’a nā Christina Smith
I te ’ōmuara’a o tō’u u’i-’āpī-ra’a, ’ua feruri au e fa’aātea iā’u i Te ’Ēkālesia a Iesu Mesia i te Feiā Mo’a i te mau Mahana Hope’a nei. I terā ato’a rā taime, ’ua ’ite au ē ’aita vau i pe’e i te mau ha’api’ira’a ato’a a te ’Ēkālesia. ’Ua fa’aoti au ē, mai te mea e fa’aātea vau iā’u i te ’Ēkālesia, e hina’aro vau ’ia tupu maita’i noa vau.
Nō reira, ’ua fa’aoti au e tāmata i te ha’apa’o i te mau mea ato’a tā te ’evanelia e ha’api’i nei. I muri iho, mai te mea e ’ite au i roto iā’u ’aita tō teie mau ha’api’ira’a e aura’a, e nehenehe au e fa’aru’e ma te tātarahapa ’ore.
Ma tō’u « mana ato’a, te mana’o ato’a, ’e te pūai ato’a » (Te Ha’api’ira’a Tumu ’e te mau Fafaura’a 4:2), ’ua tāmata vau i te ha’apa’o i te mea tā te Fatu i ha’api’i ’e ’ua hi’o e aha tō te reira hope’a. Nā roto i teie ’ohipa i tupu, ’ua hōro’a mai te pu’e tau iā’u te ’oa’oa ’o tā’u i ’ore na i ’ite nā mua a’e nei. Ma te fa’aeara’a i roto i te ’Ēkālesia, ’ua ’ite au i roto iā’u ē e nehenehe au e ora i te hō’ē orara’a ’oa’oa, ma te ’itera’a e aha mau te ’oa’oa.
I muri a’e i teie ’itera’a, ’ua fa’aoti au e haere i te misiōni ’e ’ia fa’a’ite i te hau tā’u i putapū i roto i tō’u ’ā’au. Noa atu te mau tāmatara’a ’o tā’u e fa’aruru atu, ’ua ha’api’i mai au ē mai te mea e pure au i te Atua, e turu mai ’oia iā’u, e hōro’a mai iā’u te tīa’ira’a, ’e e tauturu iā’u ’ia māramarama i te tumu o tō’u mau fifi.
E aha te mea e ti’a iā’u e rave ?
I muri a’e i tā’u misiōni, ’a haere noa ai au i te ha’api’ira’a tūati ma’i, te rahira’a o tō’u taime i te mahana tāta’itahi tei roto ïa i te ha’api’ipi’ira’a i te ’ohipa. I muri mai te reira, e rave au i tā’u ’ohipa ha’api’ira’a i fa’ata’ahia ē tae roa i te hora 2 ’aore rā i te hora 3 i te ’ā’ahiata. ’Ia oti ana’e, e ta’oto ri’i au hou ’a tāmau fa’ahou ai i tā’u ha’api’ipi’ira’a ’ohipa i te mahana nō muri iho.
I taua taime rā, e peresideni au nō te feiā ’āpī tamāroa nō te pāroita. E mea fifi roa nō’u ’ia rave i te ’ohipa ha’api’ira’a ’e ’ia rave i tō’u pi’ira’a i roto i te ’Ēkālesia. ’Ua ’ite pāpū vau mai te mea e vaiiho vau i tō’u pi’ira’a, e’ita roa vau e nehenehe e ha’api’i i te feiā ’āpī tamāroa i te faufa’a rahi ’ia pe’e i te ’ē’a o te Atua ’aore rā, e fa’ari’i i te mau ha’amaita’ira’a tāna i fa’aherehere nō’u.
« E aha te mea e ti’a iā’u e rave ? » ’Ua ani au i te Metua i te ao ra. « Tei roto tō’u tino ’e tō’u ferurira’a i te huehuera’a, ’e ’aita vau e mana’o nei ē tē rave nei au i te ’ohipa tā ’oe e hina’aro ’ia rave au ».
I muri a’e i tā’u pure, ’ua tāmāhanahanahia vau. ’Ua putapū vau ē tē parau mai ra te Atua iā’u, « teie taime tā ’oe e rohi itoito nei e mea faufa’a ïa nō ’oe. E mea fifi paha tā ’oe tārena ’ohipa rahi, terā rā mai te mea e upo’oti’a ’oe i teie tāmatara’a i teienei, e fa’a’ohipa vau ia ’oe nō te ha’amaita’i ’e nō te tauturu e rave rahi atu ta’ata i muri nei ».
’Ua hōro’a mai teie pāhonora’a iā’u i te ha’apāpūra’a ē, tē vai rā tā’u fā, ē mai te mea e tāmau māite noa vau, e ti’a roa iā’u ’ia rave fa’aoti i te hō’ē ’ohipa ta’a ’ē i muri nei.
’Ua fa’a’ite hua vau i te feiā ’āpī tamāroa i tō’u fifi rahi nō te ha’api’ira’a tūati. ’Ua parau ato’a rā vau ia rātou ē, e mea faufa’a roa te ’Ēkālesia ’e te ’evanelia ’e e ti’a i te reira ’ia riro te pū mau o tō tātou orara’a, i rōpū ato’a i te mau fifi. ’Ua fa’a’ite au i tō’u here nō rātou ’e ’ua parau atu vau ia rātou, tē rave itoito nei au i tō’u pi’ira’a nō te mea e faufa’a roa rātou nō’u mai tā’u ha’api’ira’a. ’Ua tahe tō rātou roimata i te putapūra’a tō rātou ’ā’au i te parau mau o teie mau mea.
Ha’amaita’ihia nō te tāvinira’a
’A tāmau noa ai au i te tāvini i te feiā ’āpī tamāroa ’e i te ha’api’i ia rātou i te ’evanelia, ’ua feruri rahi au i tō rātou nīno’a mana’o taure’a fifi ’a haere noa ai rātou i te purera’a ’e ’a ha’api’i mai ai i te ’evanelia. ’Ua rōtahi au i ni’a i tō rātou ea o te ferurira’a ’e ’ua tauturu ’ia pāhono i tō rātou mau hina’aro tāta’itahi.
Te tāvinira’a i te feiā ’āpī tamāroa ’ua tauturu iā’u ’ia fa’ananea i te ’aravihi nō te hi’opo’a ’e ’ia hi’o i te mau tauira’a na’ina’i i roto i te ta’ata. I teienei, tē rave nei au i te ’ohipa tūati ma’i ’e tē ha’apa’o nei au ’ahuru ta’ata ma’i, ’ua ha’afaufa’a vau teie ’aravihi i roto i tā’u ravera’a rau ’e vetahi ’ē.
« Tē parau nei teie ta’ata ma’i ē, ’ua māramarama maita’i ’oe i tōna nīno’a mana’o », ’ua parau mai te mau hoa ’ohipa iā’u. ’Aore rā e parau mai te ta’ata ma’i ē, « tē ’ite nei au ē, e mea ’ōhie a’e ’ia paraparau ia ’oe ».
Te tāvinira’a i roto i te ’Ēkālesia ’ua ha’amaita’i ato’a iā’u i te fare. ’Ua ha’api’i mai au ’ia hōro’a i te ti’ara’a mātāmua i tā’u vahine ’e ’ia riro iti mai ’ei ta’ata e ha’apa’o noa iāna iho.
« ’Ahiri ’o vau te Metua i te ao ra », ’ua ui au iā’u iho, « nāhea ’oia i te ha’apūai i teie ’utuāfare, ’e e aha te mea tā’u e ti’a ’ia rave nō te fa’atupu i te reira » ?
Nō te mea ’ua ha’api’i māite au i te ’evanelia ma tō’u ’ā’au ato’a, ’ua ’ite au nāhea ’e nō te aha te ha’api’ira’a i tā’u mau tamari’i ē e mea faufa’a te ’Ēkālesia. ’Ua ’ite māua tā’u vahine nāhea ’ia fa’a’amu i tō māua ’utuāfare i te pae vārua, nō te mea tē fa’atumu nei māua i tā māua mau ha’api’ira’a i ni’a i te mau ha’api’ira’a a te Fa’aora.
Tē putapū nei au i te tīa’ira’a ’e te hau i roto i tō’u ’ā’au ma te pe’era’a i te mau ha’api’ira’a a te Fatu ’e te fa’aro’ora’a i tāna mau muhumuhura’a. ’Ua vai noa ’oia i pīha’i iho iā’u i te roa’ara’a o te ’ē’a, ma te ha’amaita’i iā’u nō tō’u ha’apa’o maita’i ’e te mau pi’ira’a nō te ha’amaita’i ’e nō te tauturu ia vetahi ’ē. Noa atu te huru o te mau tāmatara’a, tē hina’aro nei au e ora i tō’u orara’a ma te ravera’a mai te au i te mea tā Iesu Mesia e hina’aro (hi’o 2 Nephi 32:3).