Te fa’aro’o o te tuahine Muñoz

Fa’ahōho’ara’a nā David Malan/Malan Creative

I te matahiti 1967, ’ua riro Elder William Danner ’e ’o vau nei e nā e piti o nā 20 misiōnare mātāmua tei tāvini i Toromepia. ’Ua manuia ri’i māua e tae roa i te taime ’ua fa’a’itehia mai ia māua, e te hō’ē ta’ata ’o Raùl te i’oa, ’o tei ha’api’ihia e te tahi atu mau misiōnare, i te ’utuāfare Muñoz. E mea pūai roa te Vārua ’a ha’api’i ai māua i teie ’utuāfare, tē fa’a’ite-pāpū-ra’a nō te peropheta Iosepha Semita ’e te fa’aho’i-fa’ahou-ra’a mai.

« ’Ua ’ite au ē, tē parau nei teie nā feiā ’āpī tamāroa pa’ari i te parau mau », ’ua parau Raùl. « Hō’ē ā tō rātou autahu’ara’a ’e tō Iesu Mesia. E nehenehe rāua e pa’i’uma i te tahua i ni’a i teienei ’e e fa’aora i tā ’oe tamahine matapō, ’o Margarita ».

’Ua hi’o mai te tuahine Muñoz iā’u ’e ’ua ui mai, « e parau mau ānei ? »

’Ua horomi’i au i te huare i roto i tō’u ’arapo’a. ’Aita roa tō’u ’itera’a pāpū i tāmatahia mai teie te huru nā mua a’enei. ’Ua ’ite au ē e tītauhia nō teie huru temeio te hō’ē fa’aro’o pūai mau. ’Ua ’ite mai māua tō’u hoa misiōnare i muri a’e ē, ’ua parau te mau taote mata ’aravihi i te ’utuāfare o Margarita, ’o tei matapōhia e ono ’āva’e i ma’iri nā roto i te hō’ē ’ati ē, e’ita roa atu ’oia e nehenehe e ’ite mata fa’ahou.

« Hō’ē ā autahu’ara’a tō ’ōrua e tō Iesu Mesia », ’ua parau mai te tuahine Muñoz. « E matapō tō tā’u tamāhine. E haere ana’e e fa’aora iāna ».

’Aita roa vau i riro na ’ei ’ite nō te hō’ē fa’aro’o rahi mau. ’Ua riro ’oia mai te vahine a te ari’i Lamoni, ’o tei parau ia Amona, « tē ti’aturi nei au ē, e tupu ïa te reira mai tā ’oe i parau iho nei » (Alama 19:9).

’Ua fa’atāhinu Elder Danner ia Margarita, ’e ’ua ha’amau vau i te fa’atāhinura’a. Ma tō’u māere rahi, te mau parau tei fāura mai nā roto mai i tō’u vaha ’e ’ere ïa nā’u : « E fa’aorahia ’oe ’e e ’ite mata fa’ahou mai ’oe ». ’Ua putapū vau i te hina’aro ’ia fa’ahiti i te tahi atu mau ha’amaita’ira’a, ’oia ho’i e tauturu te mau melo o te ’utuāfare ’ia patu i te ’Ēkālesia i Toromepia. I muri iho, ’ua uiui au iā’u iho ’ua rave ānei au i te fafaura’a ’o te ’ore e fa’atupuhia.

I te mahana nō muri iho, ’ua horo mai te taure’a tamāroa o te ’utuāfare ia māua nā roto i te aroā, ma te tuō « e temeio ! e temeio ! E nehenehe tō’u tuahine e ’ite mata ! »

’Ua bāpetizo māue e 13 ta’ata i terā hepetoma.

’Ua riro te taea’e ’e te tuahine Muñoz ’ei melo ha’apa’o maita’i nō te ’Ēkālesia. Tō rāua fa’aurura’a, te ’ohipa ihoā ra a te taea’e Muñoz ’ei ra’atira nō te hurira’a tao’a i Toromepia, tei tauturu i te ha’aparare i te ’evanelia i reira. Hō’ē tamāhine tei tāvini i te hō’ē misiōni ; ’e tōna taea’e ’ua tāvini ’ei ’episekōpo. ’Ua ’ite mata noa Margarita e tae roa i te hope’a o tōna orara’a.

’Ua parau Iesu Mesia nō te feiā e fa’aro’o tō rātou iāna, « nā roto i tō’u nei i’oa e fa’a’ara’ara ai rātou i te mata o te feiā matapō ra » (Te Ha’api’ira’a Tumu ’e te mau Fafaura’a 84:69). ’Ua ’ite au ē « e ti’a te mau mea ato’a nei i te ta’ata i fa’aro’o » i te Fa’aora (Mareko 9:23).