Te mau rāve’a ’ōhie nō te riro rahi atu ā mai te Mesia te huru i roto i tā tātou aupurura’a

Nā Francisco Lázaro Campos de Sousa, Peretīria

I roto i te hō’ē rurura’a a te peresidenira’a pupu peresibutero, ’ua putapū vau i te hina’aro e fārerei atu i te hō’ē melo o te pupu e ’ere i te mea itoito, te hō’ē ta’ata tā’u i ’ore i fārerei a’enei. I te hō’ē mahana i muri a’e i te fare toa, ’ua puta mai te mana’o rahi e haere i tōna fare. ’Ua taiā ri’i au, ’ua pūai roa rā te hina’aro e fārerei atu iāna. ’Ua fa’a’ite atu vau ’o vai au ’e ’ua parau atu i te mau mea tei puta mai i roto i tō’u ferurira’a. ’Ua parau atu vau iāna ē, tē hina’aro nei te Fatu iāna, ’e tē hina’aro nei ’oia i te Fatu.

’Ua fa’a’ite mai ’oia i tōna māuiui nō te vai-’ōtahi-ra’a ’e te tahi atu mau fifi. « E ’ite mai ’oe i te mau hoa i roto i te pupu ’o tē tauturu ’e ’o tē pāturu ia ’oe », tā’u i parau atu iāna. ’Ua fa’ari’i ’ōhie mai ’oia i tā’u anira’a ’e ’ua haere mai i te mau purera’a i te sābati.

’Aita vau i mātau iāna i te ha’amatara’a, ’ua mātau rā te Fatu iāna ’e ’ua ’ite i tōna ’ā’au. ’Ua ha’apāpū-fa’ahou-hia tō’u ti’aturira’a. ’A aupuru ai tātou i te mau tamari’i a tō tātou Metua ’e ’a pure ai nō te ’ite mai i tō rātou mau hina’aro, e arata’i te Fatu ia tātou ia rātou ra. Tē ’āmui nei tātou i roto i te ’ohipa ’oa’oa ’ia « ’āfa’i mai i ni’a te mau rima e tautau ra i raro, ’e ’a fa’a’eta’eta i te mau turi ’āvae paruparu » (Te Ha’api’ira’a Tumu ’e te mau Fafaura’a 81:5).

Nā Ana Rodriguez Ramirez, Pāniora

I te hō’ē mahana i roto i tā’u misiōni, ’ua fa’auruhia māua tō’u hoa misiōnare ’ia haere e fārerei i te hō’ē tuahine i roto i te pāroita. ’Ua tāpūpū māua i te mau māfatu pāpie ’e ’ua pāpa’i atu i ni’a te mau parau poro’i here, nō te fa’aha’amana’o iāna i tōna faufa’a.

’Ua tae atu māua i tōna fare, ma te mana’o ē ’aita ’oia i te fare. ’A tāmaumau noa ai māua i te māfatu pāpie, ’ua tāpe’a tōna pere’o’o i mua maita’i i te fare. ’Ua tāmata māua tō’u hoa misiōnare i te tāpuni, ’ia māere ’oia, ’aita rā māua i manuia. ’Ua ’ite mai ’oia ia māua.

’Ua pou mai te tuahine nā ni’a mai i tōna pere’o’o ma te roimata. ’Ua tauahi mai ’oia ia māua ’e ’ua parau mai : « E melahi ’ōrua nō’u. Tei reira noa ’ōru’a i te mau taime ’ua hina’aro rahi au ia ’ōrua. Māuruuru roa. »

’Ua ani mai ’oia ia māua ’ia tomo i roto i te fare ’e ’ua fa’ati’a mai i te mahana roa tāna i fa’aruru, i te fa’a’āfarora’a i te hō’ē fifi rahi o te ’utuāfare. ’Ua fa’aro’o noa māua iāna. ’Ua parau atu māua iāna ’ua here rahi mau te Atua iāna ’e ’aita i mo’ehia i te Atua te mea tāna i fa’aruru. ’Ua tai’o māua i te mau pāpa’ira’a mo’a ’e ’ōna, ’e ’ua ’ī tōna fare i te Vārua Maita’i i tō māua fa’aru’era’a atu.

’Ia ineine te mau pipi a Iesu Mesia nō te « tāmāhanahana i te feiā tei hina’aro i te tāmāhanahanara’a » (Mosia 18:9). Tē ti’aturi nei ’oia ia tātou ’ia riro ’ei tuha’a nō tāna ’ohipa rahi—te aupurura’a teitei a’e ’e te mo’a a’e. ’Ia rave ana’e tātou i te taime nō te ha’amātau i te ta’ata ’e nō te fa’aro’o ia rātou, e riro tātou ’ei mauiha’a maita’i a’e nō te riro ’ei melahi nā te Atua i te ao nei.

Nā Talia Rodríguez, Herevetia

E tuha’a pāpū mau te pure nō te aupurura’a mai tā te Fa’aora. E nehenehe te pure e ha’amata i tā tātou mā’imira’a nō te ’ite mai ’o vai tē ha’amaita’i atu. E nehenehe te reira e tauturu ia tātou ’ia māramarama i te hina’aro o te ra’i nō ni’a i te rāve’a nō te ha’amaita’i atu. E ta’ahira’a tumu ato’a te pure nō te ha’api’i e nāhea i te rave fa’aoti i tā tātou hōpoi’a.

’Ua mamae tā’u tāne, ’o Mario, i te COVID i te ’ōmuara’a o te ma’i parare hou te mau pātia arai. ’Ua ani atu te ’episekōpo i te hō’ē peresibutero nō tā mātou pāroita, ’o Moroni, e hōro’a i te hō’ē ha’amaita’ira’a i tā’u tāne.

Nō te mea ’aita ’oia i hina’aro ’ia pe’e te tirotiro i ni’a iāna ’e ’ia hōro’a atu te reira i tōna ’utuāfare, ’ua hina’aro Moroni i te ha’apāpūra’a a te ra’i hou ’a rave ai i te reira. ’Ua tūturi atu ’oia ’e tāna vahine i roto i te pure, ma te tīa’i i te ha’apāpūra’a hau. I tō rāua putapūra’a i te hau, ’ua parau tāna vahine iāna : « ’A haere ma tō ha’ana tama’i e Moroni. »

I tōna tomora’a mai i roto i tō mātou fare, ’ua ’ite atu mātou i te hō’ē ’aito a te Fatu. ’Ua ta’i tō’u hoa fa’aipoipo ma te roimata ’oa’oa i tōna ’itera’a atu i te taea’e i te haerera’a mai ma te itoito, e hōro’a iāna i te ha’amaita’ira’a tāna i hina’aro. ’Ua riro te reira ’ei ’ohipa e’ita e nehenehe e parau.

’Ua haere mai te Fa’aora nā roto mai i tōna tāvini, tō mātou taea’e here ’o Moroni, tei tu’u i tōna rima i ni’a i te upo’o o Mario ’e ’ua ha’amaita’i iāna mai tā te Mesia e nā reira.

Nā Geiziane Morais Freitas Duarte, Peretīria

I te hō’ē taime ’ua aupuru atu vau i te hō’ē tuahine ’o tei fa’aea i te haere mai i te purera’a. I tō’u haerera’a e fārerei iāna, ’ua parau atu vau iāna ’ua here rahi mau te Fa’aora iāna ’e tōna ’utuāfare. E ani noa vau ia rātou ’ia haere mai i te purera’a i te sābati nō muri mai. E mea maoro teie ’ohipa i te ravehia, ’aita rā rātou i haere noa a’e mai. ’Ua tupu te ha’aparuparura’a. E mea pūai mau te fa’ahemara’a e fa’aru’e. Terā rā, i te mau taime ato’a e haere māua tō’u hoa e fārerei ia rātou i te fare, e ’ite atu māua i te hō’ē fāito o te ra’i. E mana’ona’o noa māua ia rātou i te hiero, ma te ’ahuhia i te ’ahu ’uo’uo. ’Ua ’ite māua ē, e mea ti’a ia māua ’ia tāmau noa i te tāmata.

I muri a’e e rave rahi pure ’e te fārereira’a, ’ua tae mai taua mahana ra—’ua haere mai te ’utuāfare i te purera’a ! ’Ua ho’i mai te ’utuāfare i te hepetoma ato’a. ’Ua rave itoito te ’utuāfare ’ia tupu i te rahi tō rātou fa’aro’o ’e nō te fa’aea i ni’a i te ’ē’a nō te fafaura’a. ’Ua ’ite-pāpū-hia ē ’ua ha’apūai te ’evanelia ia rātou.

I te hope’a, ’ua fa’ari’i au i te hō’ē tītaura’a manihini i tō rātou tā’atira’a i te hiero. ’A māta’ita’i ai au i te ’ōro’a mo’a, e’ita e nehenehe e tāpe’a i te roimata o te ’oa’oa. E temeio teie.

I te tahi taime, ’ua hina’aro vau e fa’aru’e. Terā rā i te mau taime ato’a e haere au e fārerei ia rātou, e ’ite au i te hiero. ’Ua fa’a’ite mai te Atua iā’u i te hō’ē tuha’a o tāna fa’anahora’a nō teie ’utuāfare. ’Ua fa’a’ohipa ’oia iā’u ’ei mauiha’a nāna nō te fārerei noa ia rātou. ’Ua māuruuru roa vau iāna [te Fatu] i te fa’a’itera’a mai iā’u i te hi’ora’a mau nō te aupurura’a.

E ’itehia te ’oa’oa ’e te mana o te aupurura’a ’ia riro ana’e tātou ’ei ha’amaita’ira’a i roto i te orara’a o te hō’ē ta’ata, i te tāvinira’a mai tā te Fa’aora e nā reira. ’Ua ha’api’i te peresideni rahi nō te Sōtaiete Tauturu, ’o Camille N. Johnson ē, « i te mau taime ato’a e rave ’outou i te hō’ē ’ohipa nō te tāmarū ia vetahi ’ē—i te pae mātēria ’aore rā i te pae vārua […] tē ’āfa’i atu ’outou ia rātou i te here o Iesu Mesia. Tē fa’a’ite pāpū nei au ē ’a rave ai ’outou i te reira, e ha’amaita’ihia ’outou nō te ’ite mai i tō ’outou iho tāmarūra’a iāna ».

E riro rahi atu ā tātou mai te Fa’aora i roto i tā tātou aupurura’a, ’a fāriu ai tātou i ni’a i te Fatu nō te tauturu i roto i tā tātou mau tauto’ora’a. E pe’e tātou i te mau muhumuhu, e ha’amātau i te feiā tā tātou e tāvini nei, e pure nō rātou, e tauturu ia rātou ’ia rave ’e ’ia ha’apa’o i te mau fafaura’a, ’e e tāmau noa tātou i roto i tā tātou mau tauto’ora’a.

Te aupurura’a a te Fa’aora—hō’ē hō’ē—e hi’ora’a maita’i ïa nō tātou iho (hi’o 3 Nephi 11:15). Mai tā Elder Juan Pablo Villar nō te Hitu ’Ahuru i ha’api’i : « Mai te mea e pe’e tātou ia Iesu Mesia—te Fatu nō te aupuru—’e mai te mea e aupuru tātou ia vetahi ’ē mai tāna e hina’aro, e ha’apūai ’oia ’e e fa’a’aravihi ’oia ia tātou. Nā roto i tā tātou aupurura’a, e nehenehe tātou e ha’amaita’i i te orara’a o vetahi ’ē ma te ’ite mai i te hau ’e te ’oa’oa nō tātou iho. »