Tāmarūhia nō te ta’oto e te Fatu

Fa’ahōho’ara’a nā David Malan/Malan Creative

I te 10ra’a o te ’āva’e o tā māua tamari’i mātāmua ’o Caden, ’ua vaiiho atu māua tā’u tāne fa’aipoipo ’o David iāna nō te taime mātāmua, i tō’u nā metua ra ’ia ha’ap’aohia. ’Ua haere māua i rāpae nō te tāmā’a i te pō, i muri iho ’ua haere atu i te fare teatara’a. I te roa’ara’a mai tā māua popcorn ’e ’a pārahi ai i tō māua pārahira’a, ’ua niuniu mai tō’u māmā.

’Aita tā māua pēpe e huti fa’ahou i te aho, ’e tē tere mai rā te pere’o’o uta ma’i !

’Ua ho’i rū atu māua i te fare ’e ’ua horo atu i roto nō te hi’o ia Caden i roto i te rima ’o tō’u māmā, ma te mata ’ata’ata i te mau utuutu ma’i rū. ’Ua maita’i mai ’oia, e ira rā tōna.

’Aita te mau taote i nehenehe e fa’ata’a mai i te tumu o te ira ’aore rā i nā ira e piti i muri mai, ’ua hōro’a mai rā rātou i te mau rā’au nō te tauturu iāna. ’Ei metua vahine nō te taime mātāmua, ’ua pe’ape’a rahi roa vau. E au ra e mea maita’i roa Caden, ’ua fa’a’āueue rā te ’ohipa i tupu i tō’u fa’aro’o. ’Ua ha’apau te urupu’upu’u ’e te pe’ape’a iā’u.

Piti matahiti i muri mai, ’ua tītau te taote roro ’ia ravehia te hō’ē hi’opo’ara’a hōho’a roro i ni’a ia Caden, e hi’opo’ara’a nō te fāito i te terera’a o tōna roro ’a ta’oto ai ’oia. Mai te peu e mea maita’i te hi’opo’ra’a, e nehenehe ’oia e fa’aea i te rave te mau rā’au nō te ira.

’Ua pe’ape’a roa vau nō teie hi’opo’ara’a, nō te mea ho’i ’ua fa’aea Caden i te tā’oto’oto a hō’ē matahiti i teienei. Nāhea pai mātou ’ia fa’ata’oto iāna i roto i te piha tōro’a a te taote ’e teie mau porouira i ni’a i tōna upo’o tā’āto’a ?

I te pō hou te hi’opo’ara’a, ’ua hōro’a David i te hō’ē ha’amaita’ira’a autahu’ara’a nō Caden. I te ha’amatara’a o te ha’amaitaira’a, ’ua putapū vau te pūai o te aro o te Vārua. ’Ua ti’aturi au ē e maita’i te mau mea ato’a. ’O te taime mātāmua mai te taime ’a tupu ai tōna ira mātāmua ’a putapū ai au i te hau.

I te mahana nō muri iho, ’ua tāmaumau te mau taote i te mau porouira i ni’a i te upo’o o Caden. I muri iho, ’ua fa’atārava mātou iāna i ni’a i te ’iri hi’opo’ara’a ’e ’ua tūpohe i te mau mōrī.

’Ua topahia ’oia i te ta’oto i roto noa tau minuti ri’i. E ’ere paha te reira i riro ’ei hō’ē temeio, ’aita roa nā ’oia i ta’oto’oto ’ōna ana’e ’ua hau i te areā hō’ē matahiti.

’Aita mātou i mo’ehia i te Metua i te ao ra. Tei reira tōna Vārua i roto i te piha tōro’a a te taote, ’ua fa’anā ia Caden ’e ’ua tāmāhanahana iā’u. ’Ua taui roa tō’u huru i mua i te mau tāmatara’a ’e te mau ha’amaita’ira’a o te autahu’ara’a i taua mahana ra. ’Ua ’ite au ē, e mea mau te mana o te autahu’ara’a.

E taure’are’a Caden i teienei. ’Aita ’oia i ira-fa’ahou-hia mai tōna ’aiūra’a mai. ’Ua fa’aruru ’oia i te tahi atu mau tāfifira’a, ’ua ti’a rā iāna ’ia upo’oti’a i ni’a i te rahira’a. ’Ua ’ite au ē, tē tāmau noa nei te Fatu i te ara maita’i i ni’a iāna ’e i te tāmarū i tō’u mau mata’u (hi’o Luka 8:50).