Hō’ē ’ite pāpū nō te fa’anahora’a nō te ’oa’oa ’ūmere mau a te Atua

’Ei taure’are’a, ’ua haere au i te hō’ē ha’api’ira’a e fa’aro’o keresetiano. E ha’api’ira’a maita’i mau, ’e i reira ’ua ’ite au e rave rahi nā hi’ora’a nō te tāvinira’a huru Mesia. I te mau hepetoma ato’a e tītauhia ’ia haere mātou i te hō’ē piha ha’api’ira’a nō te pae fa’aro’o.

I tā’u matahiti hope’a i reira, te tā’āto’ara’a o te tuha’a mātāmua o terā matahiti tei ni’a ïa tā mātou ha’api’ira’a i te tumu parau o te fa’aro’o « Momoni » (mea nā reira tā te ’orometua i parau). Te fā mau o teie piha, ’o te fa’a’itera’a ïa ē, e mea hape te fa’aro’o « Momoni ».

I te ha’amatara’a ihoā, ’ua fa’aara te ’orometua i te tā’āto’a e aha te ’ohipa e rave ’ia fārerei ana’e i te mau « Momoni ». Pauroa te mau pīahi i te fāriura’a i ni’a iā’u ma te parau ē, « e Momoni ho’i ’o Iareta ». I muri iho i te ha’api’ira’a, ’ua tāu’a parau vau e te ’orometua, ’e ’ua parau mai e nehenehe tāna e tauturu iā’u.

’A tahi nei au i hina’aro ai ’ia hāro’aro’a e parau mau ānei te ’evanelia a Iesu Mesia ’aore rā ’aita, ’e Te ’Ēkālesia a Iesu Mesia i te Feiā Mo’a i te Mau Mahana Hope’a nei, ’o te ’Ēkālesia mau ihoā a te Atua i ni’a i te fenua nei. E ’ere fa’ahou teie uira’a e paraparaura’a noa nō’u. ’Ua fa’ari’i mau vau i te Vārua maita’i i tō’u bāpetizora’ahia. Nō atu rā, tē hina’aro pūai nei tō’u ’ā’au ’ia ’ite hōhonu atu ā. E taime fa’atītī’aifarora’a teie nō’u. ’Ua ti’a iā’u ’ia māramarama nō’u iho.

I te mau hepetoma i muri iho, ’ua ’amu pu’upu’u vau i te mau buka ato’a tā’u e nehenehe nō ni’a i te parau ’o te ’evanelia i fa’aho’i-fa’ahou-hia mai. Te mea faufa’a roa a’e, ’ua tai’o vau i te Buka a Moromona ; ’e ’a nā reira ai au, ’ua roa’a iā’u i te māramarama ē, e parau ihoā te reira a te Atua ’e te tahi atu ’ite teie nō Iesu Mesia. ’Aita i maoro roa, ’ua tauturu te hō’ē ’episekōpo here i tō’u taea’e ’e ’o vau iho nei ’ia fa’aineine nō te hiero ’e te misiōni. Mai taua taime ra, ’ua ha’amaita’i rahi mai teie mau fa’aotira’a i tō māua orara’a ’oia ato’a i tō māua nā ’utuāfare. ’Auē ïa tō’u māuruuru i teie ’episekōpo maita’i mau.

I roto i te ’evanelia a Iesu Mesia i fa’aho’ihia mai, e fa’ari’i tātou i te ha’amaita’ira’a ’ia ’ite ē, nō hea mai tātou, nō te aha tātou i ’ō nei, ’e ihea tātou e haere ai. ’Ua ’ite tātou e mau tamari’i ana’e tātou nā te Atua, ’e mea nā roto i te tāra’ehara a tō tātou Fa’aora Iesu Mesia, tātou e ho’i fa’ahou atu ai i mua i te aro ’o te Atua. I roto ia Ioane 3:16 tē tai’o nei tatou :

« I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore. »

I muri noa i tōna tīahira’ahia mai Amoniha, ’ua fā mai te hō’ē melahi ia Alama ma te fa’aue ’ia ho’i fa’ahou ’e ’ia poro i te ta’ata o terā ’oire. ’Ua ho’i fa’ahou ’o Alama.

« ’E tē tomo rā ’oia i roto i te ’oire ra, ’ua po’ia ’oia, ’e ’ua nā ’ō atura i te hō’ē ta’ata : ‘E hōro’a mai ānei ’oe i te mā’a i te hō’ē tāvini ha’eha’a a te Atua’ ? »

’O Amuleka terā ta’ata, tā te Fatu i fa’aineine nō te tāvini nā muri iho ia Alama. Rāua to’opiti, ’ua ha’api’i ma te pūai i te fa’anahora’a nō te tāra’ehara a te Atua.

Mai ia rāua, ’ua ha’api’i te peropheta Iakoba ē, e mea nā roto ana’e i te « maita’i rahi, ’e te aroha, ’e te maita’i o te Mesia mo’a » e ti’a ai ia tātou ’ia ho’i e noho i te aro ’o te Atua.

E fa’ari’i tātou i te mana o te Tāra’ehara a Iesu Mesia nā roto i te pe’era’a i Tāna ha’api’ira’a tumu. ’Ia vai te fa’aro’o Iāna ra i roto ia tātou, ’a pūpū ai i te hō’ē ’ā’au tātarahapa ’e te vārua marū, ’e ’ia haere iāna ra nā roto i te mau ’ōro’a ’o te ’evanelia—ma te rave ’e te ha’apa’o i te mau fafaura’a mo’a—e ha’amo’ahia tātou nā roto i te Vārua Mo’a, ’e e fa’ari’i tātou i tōna mana i roto i tō tātou mau orara’a.

Nō ha’api’i noa mai nei tō tātou peropheta Russell M. Nelson ia tātou nō ni’a i te here fafauhia a te Atua, Hesed. ’Ia fa’ari’i ana’e tātou i te mau ’ōro’a o te ’evanelia a Iesu Mesia, ’e e rave atu ai i te mau fafaura’a e te Atua, e vai tū’ati noa tātou e te Atua nā roto i te tahi tā’amura’a ta’a ’ē ma te fa’ari’i i tāna here i fafauhia.

’Aita i maoro a’enei, ’ua ha’amaita’ihia vau i tō’u arata’ira’a i te mau rātere i te ’opani ’iriti a te hiero nō Auckland Niu Terani. E rave rahi o tā’u i arata’i i roto. Pinepine au i te ui ia rātou i te mea tā rātou i fa’ari’i i muri iho i te tomora’a, i roto ihoā rā i te mau piha mo’a o te hiero. Rave rahi o rātou tei parau nō ni’a i te hau ’e te tū’atira’a e te Atua tā rātou i fa’ari’i. ’Ua fa’a’ite pāpū mai te Vārua Maita’i i teie mau rātere ē, te hiero e fare ihoā teie Nōna.

’Ei melo nō te ’Ēkālesia, ’ua ti’a ia tātou ’ia fa’ari’i i te mana o tō tātou Fa’aora Iesu Mesia ’e i tāna Tāra’ehara nā roto i te haere-pinepine-ra’a i te fare o te Fatu. Nā teie mana e ha’amaita’i i tō tātou orara’a, ’e te orara’a o tā tātou nā tamari’i ’e te mau mo’otua ’a vai ha’apa’o noa ai tātou i te mau fafaura’a i ravehia.

E ti’a atu tātou tāta’itahi, i te hō’ē mahana, i tō tātou iho mahana ’aufaura’a. ’Ua ha’amaita’ihia tātou e te hō’ē Atua tei ’ī i te here, o tē ’ati nei ia tātou, ’e tē ’imi noa nei i te rāve’a nō tātou. I te taime iho tātou e ani ai i te Atua, ma te ’ā’au tae, te hina’aro mau, ’e te fa’aro’o i te Mesia, e fa’a’ite mai ’oia i te parau mau nā roto i te mana ’o te Vārua Maita’i. Mai teie atu mahana e fa’aru’e tātou i te reni rōpū. Tei ni’a iho ia tātou pā’āto’a te mau ha’amaita’ira’a o tōna here fafauhia, ’e te mau fafaura’a o te ao mure ’ore ’e te orara’a mure ’ore, tei mua ïa ia tātou.