Ana Iteraniba te Aono
Waakinan te Mwakete i Nabeina ae te Green Market Incorporated
Te mwananga n te onimaki, te beku, ao Karikirakean te Kaawa
I weteaki ma kainnabau ae Titita Birita bwa ti na mwakuri bwa mitinare n te kawa ae uarereke i Nabeina, te atimwakoro ae uarereke n te Tebetebeke. N te tai are ti moan roko iai, ti namakina iai te rau ao bukin rokora ni mwakuri iai. Imwiin ara tataro ae mwaiti, ti karekea te kariaia mairoun ara beretitenti n te mition, ae Beretitenti Kendall bwa ti na kabanea teuana te ririki n ara beku i Nabeina. E kariaiakaki ara bubuti, ao ni moana mwanangara n te onimaki, te beku, ao katean te kaawa ae na bita maiura n aki toki ao te koraki ae ti beku i bukiia.
Te Taratara ao Kangaanga
E rangi n taotira kaain te Katorika ao te Aro ni Boretetanti, ma ti tabeman kaain te Ekaretia ibukiia Aika Itiaki ni Boong aika Kaitira i Nabeina. Bon te kangaanga aron tibwaan te euangkerio, ma ti namakina weteakira ni koaua bwa ti na beku ibukiia aomata. Ti taratarai aroia nako ni maiu ma rabakuia, riki mwaane ake a bon taan akawa aika a rangi n rianako rabakuia iai. Ma, e aki nakoraoi rabakauia ni karekei maiuia aia utu man akean bwaai n akawa raoi. N noorakin korakaia, ti namakinna i nanora ae korakora bwa ti na ibuobuoki.
Te Kairaki mai Karawa: Bubuti te Buoka Ibukiia Aomata
N te tairiki teuana, n ara tai n iangoa kainnanoia kaain ara kaawa, ti namakina kairara bwa ti na kakaea te buoka man te LDS Humanitarian Fund ke te Ibuobuoki Ibukin Kainnanoia Aomata man te LDS. Ti katamneia te karikirake ae na kakorakoraia taan akawa mwaane bwa a aonga ni kona ni karekei maiuia aia utu ao ni boutokaa reireia natiia. Man aia kairiiri Unimwaane ao Titita Redmond, taan tararua te itera aei, ti bubuti iangoan karekean bwaai ni katebe ke n akawa, te booti, ao te intin. Ti rangi ni kukurei ngke e kariaiakaki ara tabeka ni bubuti aei, ao e katauraoaki mwanena. Aio are e a mwakena moanakin te bitaki n te karikirake.
Karikan Matan te Mwakete i Nabeina
Ti mwakuri ma te beretitenti n te mwaanga n ara tabo ae Beretitenti Mweea Mweea, ike ti katea iai te tabo ibukin te tabo n te kaawa, ao ni kinaaki n te tua bwa Nabeina Green Market Incorporated. Tiaki ti te tabo ni kareke raka, ma te waaki aio e karekea te boonnano ao te toronibwai irouia kaain Nabeina.
Rokon te Bwai ni Katebe Ika ke Bwaai n Akawa ao te Booti
E moan roko te booti te kai, ao e waekoa ni kabonganaaki irouia kaain te kaawa. N tataningaakin te booti te kai, I anganako moa au booti ae te bwaibwakiraati bwa e na tangoaki. A roko imwiina te booti te kai ao te intin n 9 Beberuare, 2025. E karaoaki te bootaki ni katekeraoi ke ni katabu are a bootaki iai kaain te kaawa n anga aia kakaaitau ao aia tataro. E rangi n namakinaki ana mwakuri te tamnei n te tai anne, ni manga kamatoa ara koaua ni bain te Uea n te mwakuri aei.
Aia Mwakuri Mwaaka ao Inanoi kaain te Kaawa
E waakiraoi man tokanikai te Nabeina Green Market Incorporated man te kaai ni mwakuri. Ni katoa wiiki, a mwakuria man bonota aia karaun taan akawa ao ni kakaraoa aia boowi ni marooroa aroia n akawa ao maiuraoia kaain aia kaawa. I nanon tain taian bobowi, a mwaiti ake a kaota reken te kakabwaia ni maiuia man te karikirake. E taku temanna te tia akawa, ma raninmatana, “Te booti aio tiaki ti te booti; bon te bwain tangira mairoun te Atua. E karekea nakoira te kaantaninga ao aron maiura n taai aika a na roko.”
Marooro ao Taian Koaua
A rangi ni kakaaitau kaain Nabeina ibukin te boutoka n te buoka man te Waaki ni Ibuobuoki man te LDS. A kaekai taian tataro bwaai n akawa ao te booti, are e karekea nakoia utu buokaia ni karekean kanaia. I nanon marooro, a mwaiti ake a tibwai aia koaua n aron kamatoaan aia koaua man te buoka aei. E taku temanna te aine, “Ti tataro n taainako ibukin te kawai ae na buokiira ibukiia natira. Ngkai, ma te booti aei ao karaun aikai, ti kona n noora iai bain te Atua i nanon maiura. E bon aki mwanuokiniira.”
Te Tangira ao te Beku i aon Riki te Onimaki
E ngae ngke tiaki angiia kain ara kaawa kain te aro, ti kakoaua n taainako ngai ma Titita Birita te beku ibukiia natin te Atua ni kabane. Tiaki ara kouru bwa ti na kaumaka ara kakoaua irouia tabeman ma ti kaota aron ana tangira Kristo rinanon te mwakuri. E booti aomata te karikirake aio n aki taraia bwa tera aia aro, ao ti kakaaitau ngkai ti riki bwa tabonibain te Uea.
Te karikirake ae Nabeina Green Market Incorporated bon te kakoaua nakon mwaakan te onimaki, te beku, ao te kaawa. N ana kairiiri te Uea, waaki ni ibuobuoki ibukiia aomata man te aro, ao nanomatoaia kaain Nabeina, e a tei te reitanimaiu. A raka kakabwaia i aon riki taian waaki ni karekemwane, kateimatoaan te katiteuanaaki ao te toronibwai.
Ti kakoauaa bain te Uea ngai ma Titita Birita i nanon te waaki, man moanan iangoana ni karokoa katabuan te booti. Ti ataia bwa aio ai tibwa moan te waaki ibukin Nabeina, ao ti kantaningaia n noora aron te Uea n teimatoa ni kakabwaiaia kaain Nabeina.
“Ba I baki, ao kam kaamarakeai: I kanimoi, ao kam kamoai: te iruwa Ngai, ao kam akoai” (Mataio 25:35).
Te karikirake ae Nabeina Green Market Incorporated e nooraki iai te koroboki ae tabu ngke a bootaki ni katiteuanaki iai kaain te kaawa ni karikirakeia i bon irouia rinanon te onimaki ao te beku.