“Ana Tangira te Tia Kamaiu ao Ana Tabeaianga ibukin Temanna,” Riaona, Turai 2025.
Ana Tangira ao ana Tabeaianga te Tia Kamaiu ibukin Temanna
Ti a tia n tuangaki bwa tina tangira ao ni karaoi mwakuri n ibuobuoki imarenara n aron are e karaoia Iesu Kristo nakon—temanna imwiin temanna.
Kamataata n te tamnei iroun Alex Nabaum
Tabeua te tai imwiin au bwabetito inanon Aokati 1984, I ongo taekan te waaki ni kakukurei ae kaunga ma te katangitang ao te bwabwakiu ae aki raroa man maekara i Kwekwe, Zimbabwe. Ngai ma raraou ti ingainga ni kan nako, ma e boo n te Tabati. Raraou bon tiaki membwa n te Ekaretia.
I tuangiia, “N na nako n taromauri ma N na birinako imwiin te taromauri n toa n raoni ngkami.”
Raraou, a bon ata au kabwaka, a taku, “Ngkana ko karaoa anne ane kona tiku. N te tai are ko roko iai, e a bane te bwabwakiu.”
Iai te rinerine ae N na karaoia. N na nako n taromauri ke te bwabwakiu? I rinea te bwabwakiu ma I kunea n ingabongin te Tabati bwa e a tia ni kamaunaaki. N te tai anne, I a rimwi n nako n taromauri, ngaia are I a bon tiku n au ruu are I tangoia.
Ngke e a bwakantaai, I ongo te bwana: “E maeka ikai Eddie Dube?”
Ngaia bon au beretitenti n te mwaanga, John Newbold, ma kainnabana, Jean. I kan karabaai iaan au kainiwene! Ma imwain ae I kona ni karaoa te bwai teuana, a tei irarikin au keeten are e maenako ma au ruu ma nikiran te auti.
“O, Eddie,” a taku, “ti aki nooriki n te taromauri n te bong aei.”
Ti maroro teutana te tai, ao imwina, aia taeka n akoi, “Eddie, ti kan nooriko,” e reitinako inanon au iango. I rang kakaitau ibukin John ao Jean Newbold. Man te bong anne, I a rang kakabwaiaki ibukina bwa a buokai n nooria, n te aro ae bon mairouia, n ana tangira ao ana tabeaianga ara Tia Kamaiu Iesu Kristo ibukin temanna.
Temanna ma Temanna
E roko Iesu are mangauti nakoia Nibwaite imwiin rokona iroun te Tama. E roko ibukin karauan nanoia aomata. E kaoia ma te tangira:
Teirake ao nakomai nakoiu, bwa kam na karin baimi i rarikiu, ao bwa kam aonga naba n namakina mwin te nera i baiu ao i waeu, bwa kam aonga n ataia bwa bon ngai Atuan Iteraera, ao Atuan aonaba ae bwanin, ao I a tia n tiringaki ibukin buren aonaba.
“… Ao a bon karaoa aio, ni mwananga temanna i mwin temanna ni karokoa ae a bane n tia n nako, ma n nooria n oin mataia ma n namakinna ni baia ma n ataia raoi n te kakoaua ao ma ni kakoaua raoi, bwa bon ngaia, are e a tia ni koreaki taekana irouia burabeti, bwa e na roko” (3 Nibwaai 11:14–15; e kairaki katuruturuana).
Imwiina, e kaoia ni kabane te Tia Kamaiu bwa e na uotiia ake a aoraki, ikoaki, “a karawawataki n aekaia nako …ao e katoka aorakiia n tatabemaniia ngke a uotakirake nakoina” (3 Nibwaai 17:7, 9; kairaki katuruturuana). Ao imwiina “e anai aia ataei, temanna imwiin temanna, ao e kakabwaiaia, ao e tataro nakon te Tama i bukiia” (3 Nibwaai 17:21; kairaki katuruturuana).
Ngkana ko iangoia bwa 2,500 aomata ake a mena ikekei bon te nanorinano ni koaua (taraa 3 Nibwaai 17:25). Ngkai I bungiaki ao I ikawairake i Africa, n tabetai I katamneia te Tia Kamaiu n tei n otan te riringa, n tataninga bwa e na kamaiu, karaunano, kaungaunga, ao ni kaota te tangira nakoia ni kabane ake a roko nakoina. Ngkai Ana reirei, ti a tia n tuangaki bwa tina karaoi mwakuri n ibuobuoki nakoia naake irarikira n aron are E karaoia—temanna imwiin temanna.
Waaki ma te Onimaki
Te beretitentii n te Bootaki n Aine ke aia kooram unimwaane n am uoote ke mwaanga, man ana kariaia te bitiobi ke te beretitenti n te mwaang, ake a tia ni katabeko nakon temanna ao utu bwa kona karaoa te mwakuri n ibuobuoki nakoia. Tabeman mai ibuakoia ko aki rang kinaia. Kona bae n namakina te nakonnano ibukin kawarakiia, weteakiia, ke bon karokoan am rongorongo n te koroboki iaon te tareboon. Ko bae n raraoma bwa a na ribaiko n roko ni mweengaia. Ma am taan kairiiri a tia n tataromwaaka n iangoia bwa te katabeaki aei e kona n nanonaki ibukim ao te kakabwaia are e na uotia nakoim ao te utu are ko buokiia. Ngaia are, waaki ma te onimaki.
Tabeua te ririki n nako, I nako ma te beretitenti n te titeiki nako mainikumaiakin te United States ni kawariia utu tabeua imwain te maungatabu n te titeiki. N rokora ni mweengan temanna, te mwaane ae kunnikaina n onea aika a rauaki e kawariira.
“Tera ae kam tangiria?” e takarua. “I aki tangiriia aomata bwa ana roko n au auti!”
I tabeaianga ngke kaanga e tei ni kakamaku te mwaane aei. I tangiria n taua bain te beretitenti n te titeiki ao ni biri rikaaki nakon te kaa! Ma te beretitenti n te titeiki e rang n rau. “Kabwarai ara bure,” e taku. “Ti taku bwa am bitiobi e a tia n tuangko ae tina roko.”
Ngke a taetaenikawai, I namakina korakoran te Tamnei. I karina angiu, ao I kaineta te mwaane, man taku, “Tariu ae tangiraki, Beretitenti Thomas S. Monson [are e burabeti n te tai anne] e a tia n anganai te katabeaki bwa N na roko ikai. Ti roko ikai bwa tina nooriko. I uota ana tangira te burabeti nakoim.”
I tarai matan te mwane aei ao n nori rannimatana n taonako. E a waaki n tibwai ana kangaanga ma ngaira. Kainnabana e rootaki n te nanokawaki. Ngaia e kabaneaki man ana mwakuri. Akea te amwarake ae na kamwarakeia iai natiia. Te beretitenti n te titeiki e kamatoa nakon teuaei bwa te Ekaretia e na buokia ma ana utu. E rang kakukurei rokora.
Tabeua te wiiki imwiina, I titirakina te beretitenti n te titeiki rongorongona ae ngkai. E tuangai bwa ana bitiobi te tari aei ao te kauntira n te uoote a buoka teuaei ao ngaia ma kainnabana, are tiaki kain te ekaretia, a waaki ni kakawaraki irouia mitinare.
Te mwakuri n ibuobuoki e waaki man te karoko irouia aomata ma te onimaki ao te tangira. Ngkai ti waaki ma te onimaki, onimakina te Uea, ti kona ni karekea te kaotioti mairouia ni kaineti ma Ana babaire ao ana kantaninga ibukin reitakira ma Natina n tatabemaniia. E na buokiira n ataia bwa tera ae tina taekinna ao ni karaoia ao e na kairiira n arora “n tauraoi ni katoka i aomi rawawataia raomi, bwa aonga ni beebete,” “n tauraoi n tang ma ake a tang; … ao ni karau nanoia ake a kainnanoa karauan nanoia” (Motiaea 18:8–9). Ngkai ti karaoia, tina ataia bwa mwaitira ana tangira ni koaua te Tia Kamaiu ibukin temanna.
Ai Korakorara Kukureim
Ni karokoa te bong aei, I teimatoa n rereitaki ma John ao Jean Newbold. Inanon ririki akanne, I namakina te kimwareirei ibukin te tangira are a tia n anganai. Ao a tia n namakina te kimwareirei n nooria bwa I a rikirake inanon te euangkerio. Aio te bwai ae kona n riki ngkana ti karaoa te mwakuri n ibuobuoki—ngaira ao naake ti beku ibukiia tina katiteuanaaki riki ma ngaia ao n reitaki riki ma te Tia Kamaiu.
E reirei te Tia Kamaiu bwa “e korakora kakawakia aomata imatan te Atua. …
“Ao ngkana ngaia bwa ko riai n mwakuri ni bongin maiu n tatakarua te rairannao nakoia aomata aikai, ao uotiia, kamaeua temanna te tamnei nakoiu, ai batira korakoran kukureim ma ngaia n abanuean Tamau!” (Reirei ao Berita aika Tabu 18:10, 15; e kairaki katuruturuana).
Ngkana e aki moanibwai iroum te mwakuri n ibuobuoki, Beretitenti Russell M. Nelson e reirei bwa “ni kabane ngaira ti kona ni karaoa ae tamaroa riki nakon are mai imwaina.” I kaoko bwa kona bitaki ao n raira maium nakon ae boou. I berita bwa ngkai ko kabaeaki inanon te mwakuri n ibuobuoki, kona karekei katokan kangaana ake ko kaitarai n te tai aei.
Ana berita te Tia Kamaiu e bon koaua: “Ba ane e kani kawakina maiuna ao e na boni kabua: ma ane kabua maiuna i bukiu ao e bon karekea” (Mataio 16:25).
Man ana ibuobuoki te Tia Kamaiu, ko kona n riki bwa te tari ni ibuobuoki ke te mwaane are E kainnanoia bwa ko na kona ni karekea te bitaki inanon maiuia natin Tamara are i Karawa—n tatabemaniia ao are e rang kakaawaki are temanna.