Tararua: Te Mwakuri ae Waakinaki n te Aonaaba Ibukin Karikirakean Maiuraoia Aine ao Ataei

Mwakoron te Mwakuri ae Kakaawaki

Ngke I (Beretitenti Johnson) mwananga nako Costa Rica n te ririki ae nako, e reke au tai n ibuobuoki n te waaki n anganako amwarake. I riingaki ni kaitiboou ma aine aika a mwaiti ao ataei ake a roko ni karekei amwarake aika kamarurung. I karekea te namakin are ti karaoa are e bon kantaningaira te Tia Kamaiu bwa tina karaoi. I kaitibo ma Yumana ao natina aika boboto ake teniman. E kabonakoi reeben aika rooti te aine aei ake e karaoi ibukin ana karemwane nakoia ana utu. E rang kakaitau neiei ibukin te amwarake ibukiia natina aika a baki. I tuanga neiei bwa I tangiria ao, ae kakaawaki riki, bwa e tangiria te Atua. Yumana e karekea te kamaiu n te maiu n rabwata ao te kamaiu n tamnei ngkai e namakina man butimwaea ana tangira te Atua.

Ti nooria bwa te kakamwakuri n te aonaaba aei e riki bwa mwakoron te mwakuri ni kamaiu ao te karietataaki. Ngkai a karekea te kamaiu n rabwata aomata, ti onimakinna ao ni kantaningaia bwa a na namakina ana tangira te Uea nakoia ao nanoia ni kan karekea te reitaki ae nako n te berita ma Ngaia.

Mwakuri ni katamaroan te marurungia ao maiuraoia aine ao ataei e kakoroa nanon te tibwanga mai karawa n tararua ibukia naake a kainnano. E ngae n anne te waaki aei e kakabwaiaia aomata ni kawai tabeua:

• E karikirakea wanawanaia ao aia konabwai te roro ae rikirake, ni buokiia bwa ana karekei konabwai n te maiu n tamnei.

• E karekea te irekereke nakoia kain rarikira ao raora, a mwaiti ake a tangiria naba n reiakinna bwa a na kanga ni buokiia ake bon oin natiia.

• E katauraoi mwakuri aika a boboto iaon te euangkerio ake a karikirakei mwakuri n ibuobuoki aika kakaawaki ao anga n ibuobuoki ibukiia aine, riki ataeinnaine aika kairake.

Te roro ae ngkai irouia kairake n ikawai a tangiria ni riki bwa mwakoron te mwakuri ae kakaawaki, te mwakuri are e karekea te bitaki ni koaua ao te kaokoro n te aonaaba. Ara kantaninga bwa te burokuraem n te aonaaba aei e na buokiia ara aine n nooria bwa a kaman bwaibwai n te mwakuri ae te kabanea ni kakaawaki iaon te aonaaba, ana bootaki n aine te Uea ibukiia aine n Ana Ekaretia are e kaokaki, te Bootaki n Aine.

Ti kakoaua bwa te kakammwakuri n te aonaaba aei e na kaungai nanoia ara membwa ao raora bwa a na beku n aia komiuniti. Ara kantaninga bwa a na noora anne:

• Ana Ekaretia Iesu Kristo ibukiia Aika Itiaki ni Boong aika Kaitira e moanibwai kangaanga ake a rootaki iai aine ao ataei ao ni bairei bwaai n ibuobuoki bwa e na katamaroai marurungiia ao maiuraoia.

• Te Ekaretia ao ana Bootaki n Aine bon taan kairiiri n te aonaaba ake a karekei buoka nakoia aomata ake iai aia kangaanga.

• Te Bootaki n Aine e kairaki ao e kaainaki irouia aine ake a katamaroa maiuia aomata nako, utu, ao komiuniti.

Aio ai tibwa moan waakinan te bwai ae tamaroa are e na kakabwaiai maiuia aika a mwaiti ake a na anga ao ana karekei ana kamaiu te Tia Kamaiu ni boong aikai, ao n ririki aika a na roko, ngkai e reitinako te burokuraem aei n rikirake.

Inanon Tabo ake Ti Kona ni Karekea te Bitaki Iai

N te tikeera n te aonaaba, te Ekaretia e tei ibukira n tatabemaniira n te aonaaba bwa membwa n ikotiia bootaki aika mwaatai ni katokan kangaanga aika bubura n taabo aika raroanako. E ngae n anne, tao te kabanea ni karoko ni buokaia aomata e karaoaki ni kaan ma te mweenga are ko kona n roko iai ni kaitara ma te oo ke ni kaitara te kawai. Ko maiuakina am berita ao ko ira waakin te mwakuri n te aonaaba ma ana nanoanga Kristo ao n tararua ma te tangira nakoia oin am utu, kain rarikim, ao am komiuniti.

Ko na kona n aki karaoi onobwai nakon taubukin ana auti kain rarikim ke ni mwananga nakon te aba teuana ni kaitiaki mweengaia aomata imwiin ana urubwai te angibuaka, ma ko kona ni wareware nakon natim, ongora iroun raraom ae inimaki, ke n anganano te mwane n aki mamatam? Kekeiaki ni kabane e rang manena ao ni kakaawaki n te mwakuri n tararuakiia naake a kainnano. Kam rabwa ngkai kam kona n riki bwa te kawai are a karekea iai ana buoka te Tia Kamaiu nakoia tabeman ngkai kam riki bwa Baina n akoi; Waena ni biritata, Taningana ni kakauongo, Riana n taekini taeka n akoi.

Ngkai te Ekaretia e ikotiia bootaki n kaai ni mwakuri ibukin te kamarurung ao kamaiuraoia aine ao ataei n aba aika kakaokoro, ainen te bootaki n Aine a ikotiia aomata ni kaitarai kangaanga n oin aia komiuniti. Ainen te Bootaki n Aine a noori kainnano, ikoikoti bwaai n ibuobuoki, ao a ibuobuoki ni katoki kangaanga. Ao ti karaoia ma ana ibuobuoki te Tamnei, ni uota ana tangira ao ana kamaiu Iesu Kristo nakoia natin te Atua ni kabane.

Noorakin kainnanoia taan mwamwananga i Milan, Italy, ainen te Bootaki n Aine a baronga aia tai n ibuobuoki ni karekei nakoia kunnikaia ao bwaai ake a kainnanoi ibukin mweengaia. Tabeman aine a anganano ni bwaai ake a tia ni kabonganaaki, ngkai tabeman a barongai anganano aika a itiaki. Aia anganano aine n tatabmaniia e rang kakaawaki. Ainen te Bootaki n Aine a buokiia bwaaroko n namakina ana tangira Iesu Kristo ngke a roko nakon te tienta n anganano. Monia, ainen te tabo man te bootaki n Aine, e taku, “Man bwaai aika a uarereke e uoti bwaai aika bubura. Ao ti a kona ni kakabwaiaia aomata inanon ao i tinanikun te Ekaretia. Bon ana kakamwakuri te euangkerio.”

N ana taetae te Burabeti Iotebwa Timiti nakoia aine n te Bootaki n Aine are e a tibwa kateaki, “Kam a katukaki n te tabo are kam kona ni karaoi mwakuri ni kaineti ma ana nanoanga are e tia ni katikui iroumi te Atua.”

Ngkai i Guadalajara, Mexico, Titita Yee e karekea rongorongon ao n noori banna ni katoto aika a rianako irouia aine ni karaoi nanoanga akanne ngkai a ukoukora katokan kainnanoia kain te tabo.

Temanna te titita anne bon Titita Pulido, are e noora te kainnano n te onaoraki n te tabo bwa e na buokiia utu ao aomata ake a roko man te tabo aika a raroa ao a kainnanoi amwarake ao kunnikai ngkai a tataninga bwainaorakiaia. E ikotiia titita aika 120 n te Bootaki n Aine, tabeman mitinare, ao tabeman man te komiuniti ni kakaei anganano n te amwarake, ran, burangkei, ao kunnikai. E nakon 1,500 aomata ake anganano ni bwaai ao aine ao tabeman a katauraoi katawanou ao amwarake ibukiia e kaniia 1,200 aomata. A anganaki bwaai naake a tataninga aia tai ni bwainaoraki n te onaoraki.

E taku te titita aei bwa e karaoa aei ibukina bwa iai ana nanoanga nakoia aomata aikai. Ma rannimatana, e nanorinano ni kabwarabwara bwa e a tia n riki bwa temanna ibuakoia ake a tataninga n te onaoraki ngkai e roko kainnabana bwa e na bwainaorakiaki ibukin te kaentia. E taku neiei bwa ana kakabwaia ae korakora ao nanona bon te ibuobuoki n aron are e na karaoia te Tia Kamaiu.

Uouota ana Kabeebete te Tia Kamaiu

Aine, ti a tia n onimakinaki ma te mwakuri ae tabu n uotakin te kamaiu te Tia Kamaiu—n te maiu n rabwata ao n tamnei—nakon te aonaaba ni kabane. Ao ti kona ni karaoia nakoia naake a maeka irarikira inanon maiura ni katoabong. Ai tamaroara te kakabwaia aio. Irakin te burokuraem n te aonaaba ni kanakoraoa maiuraoia aine ao ataei bon teuana man aika a mwaiti taneiai are e katikiira ni kaniira nakon te Tia Kamaiu. Karaoan are e na kona ni karaoia, ti namakina Ana tangira, ao nanora ibukiia, ao te reitaki ni kabaeaki ma ngaia e rikirake.

Kam rabwa ngkai kam buokiira n uota ana tangira ao ana kamaiu Iesu Kristo nakoia tarira ma mwanera n taabo nako.

Inanon kataakin katotongan Iesu Kristo, te bwai ae kainnanoia riki mai iroura ngkai Ana reirei bon kinaakin kainnanoia ake irarikira ae waekoa ni kaeka ma te taotaonakin nano ao te tangira.

Beretitenti Russell M. Nelson e taku nakoira n te Bootaki n Taromauri n te Aonaaba ibukin te Bootaki n Aine n 2024, “I kakabwaiai ngkami bwa kam na atai tibwangami mai karawa bwa ngkami natin te Atua aine e angani ngkami te mwaaka tiaki ti ni bitii maiu ma ni bita te aonaaba!”

“Anne tibwangara ae moan te kakaawaki man onoti!

Bon te tai ae mimitong n riki bwa te berita n aine ao ni membwa n te bootaki are e uota ana kamaiu te Tia Kamaiu—n te maiu n rabwata ao n tamnei—nakoia tarira ao mwanera ni katobibia te aonaaba. Te kouru ae te kabanea ni kakaawaki bon te kamaiu ao te riki n toronibwai bon katauraoan te kawai ibukiia tarira ao mwanera bwa a na tangiria ao ni karekea te tangira ao te nanoanga are tauraoi nakoia ake a karaoi ao a kawakin aia berita ma te Atua.

Ti kaota ara koaua bwa Iesu Kristo bon te kamaiu ao te kamaiu are E anga bon akea tokina.