Te Reta nakoia Ake Iai aia Kangaanga ni Kabwarabure

Nakon Raoraou,

E taraa n ae namakinan te maraki ke te kaitaraaki bon te taneiai ae kabuta n te aonaaba. Aki toki aomata irarikira n taekin ke ni karaoi bwaai aika ti na un, tarariaoaki, aki mwengaraoi, kamangoraki, ke n aki kakaitauaki.

Ririki aika a mwaiti n nako, ao I kammarakaki iroun temanna kaain te taromauri. I rangi n un ao n rotaki iai, ao I tangira te aomata arei bwa e na kabwaraa ana bure, ma e aki te roko ni karaoia. I kataia ni mwaninga taekan te bwai are e a tia n riki, n iangoia bwa te maraki ao te un are I namakinna e na bua.

Ma I uoti namakin n un aikanne inanon ririki aika a mwaiti. Ma e teimatoa namakinan riribakin te aomata aei irou.

N te bong teuana ao I taetae nakon raoraou temanna iaon au kangaanga aei. E roko te iango teuana i nanou:

Kabwarabure.

E kairoroai te Tamnei bwa n na kabwara ana bure te aomata aei ae I karaba riribakina irou. I rangi ni mimi.

I kanga ni kataua bwa N na kabwara ana bure te aomata aei? Ngai ae I a tia ni kammarakaki, ngaia are I kantaningaia bwa a na roko ni kabwaraa aia bure, tiaki ngaia anne?

I korakai ma te wirikiriki aei n te tai ae maan. E ngae n anne, I iangoa ana banna ni katooto ao Ana reirei au Tia Kamaiu iaon te kabwarabure:

“Ba ngkana kam kabwara aia bure aomata mai rouia, ao E na kabara naba ami bure Tamami are i karawa:

“Ma ngkana kam aki kabara aia bure aomata mai rouia, ao E aki kabara naba ami bure Tamami” (Mataio 6:14–15).

E ngae ngke iaon te kaibangaki, te Tia Kamaiu e butiia Tamana bwa e na kabwara aia bure tautia ake a Tauria (taraa Ruka 23:34).

I uringa naba ana kakao Beretitenti Russell M. Nelson “ni karekea te nanorinano, te ninikoria, ao te korakora ae kainnanoaki ibukin te kabwarabure ao ni ukora kabwaraan buure. …

“… Ngkana e matoa kabwaraan aia bure aomata, karekea korakoram mairoun Iesu Kristo bwa e na buokiko.”

Ma aikai ni kabane n au iango, I kabatia au tataro. I tataro nakon Tamau are i Karawa ni kangai, “Ngkana bon Nanom bwa N na kabwara ana bure te aomata aei, kauki mataroa ao buokai bwa e na riki, ibukina bwa akea korakorau ni karaoia i bon irou.”

N te bong are imwiina n te taromauri, I a bon itaramata ma te aomata are e a tia ni kammarakai arei. Man ana kairiiri te Tamnei, I namakinna bwa N na riai n tuangiia ibukin te kabwarabure. I kabwara au bure ngkai I a tia n aki riki bwa raoraomi ae raoiroi n taai akekei ao ni bubutiia ngkana a kona ni kabwaraa au bure. A kabwara, ao a manga kabwara aia bure nakoiu ibukin te bwai are a tia ni karaoia. I kabwara aia bure.

I katuka te kangaanga arei bwa e a itiaki. E aki bane n nako namakinan te maraki arei ni kabane n te tai naba arei, ma I namakinna ae I a nakoraoi riki. I a inaomata man te maraki ao te nanokawaki are e a tia n rotai n te tai ae maan. I a kona ni waaki nako ma te rau.

N tabetai e kona n taraa ni kangaanga te kabwarabure. Ma tauakin te un e na ti kateimatoa te maraki iroura. E aki tangiria Tamara are i Karawa bwa ti na reitanako rawawatara ni maraki, n nanokawaki, ao n un are e a tia Iesu ni kaboa ma te tangira ibukin inaomatara mai iai. Ibukina bwa E tangiriira, E tangiriira bwa ti na namakina te kimwareirei.

Raoraou, taiaoka ni kukurei ni kanakoi rawawata aika iai iroum ngkai. Angan te Tia Kamaiu ao kariaia Ana tangira i nanon maium. Tai rineia ni kateimatoa te maraki. Rineia.

Titita Kristin M. Yee, te Kauoman ni Kauntira n te Beretitentii ni Kabuta n te Bootaki n Aine, e kakoaua ae: “E kantaningaira te Uea bwa ti na ikakabwarabure ibon ibukira. Ma E aki tuangiira bwa ti na karaoia n akean Ana ibuobuoki, Ana tangira, ao Ootana. Rinanon ara berita aika tabu ma te Uea, ti kona n tatabemaniira ni karekea te mwaaka ni kakorakora, ni kairi, ao te ibuobuoki are ti kainanoia nakon te kabwara bure ao ni kabwaraaki ara bure.”

Tariu aika kam tangira, kam rangi n tangiraki. Kawaimi nakon te kabwarabure e aki titebo tarakina ma ae irou. Ma bukina bwa ngaira natin te Atua ao n rangi n tangiraki, E na tabe ibukira ni kabane, ni kaineti ma kainnanora n tatabemaniira nako. E na kaota nakoira kawain te kamaiu, e ngae ngke e na taraa ni maan te tai.

Au kantaninga bwa ko ukora aron te kabwarabure ae rangi ni kainnanoia tamneim. Au kantaninga bwa a tia au taeka n rangi ni ibuobuoki nakoimi, ma ae kakawaki riki, au kantaninga bwa e a tia te Tamnei ni kakoaua nakoimi te koaua ae e kona te Tia Kamaiu ni uota nakoira te rau, te kamaiuaki, ao te katiteuanaki.

Te tangira,

Raraom