Au Reirei nakoia Kairake n Ikawai iaon te Kareketangira ao te Mare

Ngkana ko a tia n titirakinaki bwa e uara am marooro ni kareketangira, au kantaninga bwa “ni karaoia ma nanom” bon teuana man am moa ni kaeka. N na kataia ni kamataata te bwai aei ma te katooto.

Angiin au tai ma kaainabau ni kareketangira bon man taabo aika a raroanako. I kaitibo ma Catherine ngke ti mena n te reirei i Santiago, Chile. Ti moana ara kareketangira, ma e a manga okira mwengana nako Antofagasta imwain ae I kabanea au degree. Ibukina bwa ti tangira ara reitaki bwa e na rikirake, tetaina ke uatai n te namwakaina, I ira te mwananga ae 20-te aoa te buti n te bwati n oki nako Antofagasta n tawanoun te Kabong, ni kabanea au wiikiente ma Catherine (n raonaki ma mwakuri n ibuobuoki n te ekaretia), ao ni manga mwananga n te bwati ibukin manga 20 riki te aoa n oki nako Santiago ni kataia n roko n au kiraati ni moaningabongin te Moanibong n te aoa 8:00.

Ni boong aika tiaki kona iai ni kaitibo, ti taetae iaon te tareboon. Ibukina ngkai akea te tareboon n te tai anne, I kaboa te babaire n te tarebon are e anganai au tai n tareboon ae akea taina iaon tarebonin are e kakabonganaaki irouia te botanaomata. I kabanea te tai ae maan n te tabo n tareboon, ao ngkana iai ae tangiria ni kabongana, n na tataninga ao n tareboniia Catherine n te tai naba ae a tia iai.

Rinanon te taneiai aei, ibukin kangaanga aika mwaiti n ara reitaki, I riai n reiakinna bwa n na kanga ni kona n reitaki ma Catherine.

I kaoko bwa ko na karaoa te kareketangira ma te karaurau ao n nanom ni koaua. E a tia Beretitenti Russell M. Nelson n tuangiira bwa ti riai ni bwaina te kokoaua ma ara angareirei. Ti kona naba ni ukoria ni bwaina te kokoaua n arora ni kareketangira iai.

Ti riai ni kabonganai titiraki aika a kakawaki:

• Tera am iango ibukin te maiu, te utu, ao ae kakawaki riki, te Tia Kamaiu?

• I atai aekan bwaai aika ko karaoi ao n aki tangiria ni karaoi, ma tera am namakin ibukin te euangkerio?

• Tera am kainibaire ao arom aika riai?

A riai titiraki ni karaoaki ma te nano ae itiaki n irianaki ma karaoan waaki ni kakukurei aika a kakaokoro aika a nako mai inanom. Karaoi waaki ni kakukurei, ma kakoaua bwa kam botaki ni karaoi bwaai aika iai te tamnei naba iai. Karaoi waaki ni kakukurei aika a na buoki ngkami n ataia ao ni kinai raoi ngkami.

Te onimaki iaon te Maaku

Imwiin ae kam a tia ni kareketangira n te tai ae maan, e na tara ni kona riki bwa te babaire ae kangaanga n rineia bwa kam na mare. I bon teimatoa n raraoma ni karokoa te tai are I mareaki iai ma Catherine!

E kona te babaire n rineakina bwa kam na mareaki ni matoatoa, ma tiaki te babaire ae ko karaoia inanon te tai ae ti teuana. Rineakina bwa kam na mareaki nanona bwa ko na manga motikia nakon raom ae akea tokina ni kabanea maium ao ni botaki ni kakorakora te motinnano anne.

Ngkana iai am titiraki iaon te mare ke te euangkerio, ko riai ni “kamatebwaia n am iango; ngkanne ko riai n titirakina [te Uea] ngkana e bon eti” (Reirei ao Berita aika Tabu 9:8) Ko riai naba n titirakiniko, “Iai nanou n rineia n riki bwa mwakoron te bwai aei ni kabutaa maiu?”

Ngke I a tia ni mareaki, tabeman aomata a titirakinai ngkana e nako nanou are n tokina ao n na raure n aroia au karo. Au kaeka n taainako bon tiaki. Ngke I a tia ni mare, I baireia bwa n na karaoa te bwai ae I taku bwa e na kanakoraoa au mare. Nanon anne bwa n na rineia ni katoabong n ira te Tia Kamaiu ao ni kimwareirei ni mareaki nakon kainabau. I rineia bwa n na aki kariaia makakin te raure bwa e na uotai nako man te babaire ae raoiroi ao n eti.

E taku Beretitenti Jeffrey R. Holland, te Bonomwi ni Beretitenti n te Kooram n Abotoro n te Tengaun ma Uoman: “N te tai are e a tia ni karaoaki iai te kamataata n te tamnei, tarataraiko man te kaririaki ni kitanan te bwai ae raoiroi. Ngkana e eti ngke ko tataroakinna ao n onimakinna ao ni maiuakinna, e bon eti n te tai aei. … Kaitarai raraomam. Kaina maakum. ‘Ma ngaia ae kam na tai kaki ami aki maku.’”

Koauana bwa a mwaiti mai ibuakomi aika iai nanoia aika a raoiroi ao n tangiria ni karekea toam. Ko ataia ae aio te nano ae raoiroi ao n etieti, ma ngkana ko korakai ni kakaea temanna ae bon aitaram, ko na namakinna ae ko aki kona ni waaki ni kawain te berita ae tabu.

Ni kaineti ma aei, ao e taku Titita Kristen M. Oaks: “Ngkana ko ataiko bwa ko tautaua arom ma am tai ni kariaria bwa e na bon roko n taina te mare, katoka am tataninga ao moana am katauraoi. Katauraoiko ibukin te maiu—man karaoan am reirei, rinanon waaki, ao katauraoa am babaire. Tai taninga te kukurei bwa e na karokoaki iroum. Ukori waaki ibukin te mwakuri ni ibuobuoki ao karekean te rabakau. Ao ae kakawaki riki, onimakina te Uea, ‘wetea aran te Uea ni katoabong, ao teimatoa n nene n te onimaki bwa a na bon koro nanon bwaai’[Motiaea 4:11]. Ao I berita bwa ngkana ko karaoa aio, ao e na roko te kukurei iroum.”

Mwanangam ni kawain te berita e tuai katokaki ibukina bwa kam tuai ni mare. Ko teimatoa n iai am reitaki n te berita ae tabu ma te Tia Kamaiu. Ngkana iai am kangaanga ma te teweaki nako, te maroa, ke te maku, Uotia nakon am kangaanga. E na kairiko. E na buokiko.

Ibukiia tabeman, te kareketangira ma te nano ni kakaea toam ae akea tokina e na aki kona n reke n te tai ae waekoa. E na kona n reke irouia tabeman. N aki tabe bwa tera, I ataia ae e na kakoroi nanon berita ni kabane te Atua aika E a tia ni karaoi ibukira ngkana iai nanora ae korakora ao ara onimaki Irouna.

N aki tabe bwa ko mena ia n te aonaaba ke tera te bwai ae riki ke ae aki riki inanon maium, ibukin Iesu Kristo, ko kona ni karekea te kimwareirei n am kangaanga ni kabane. Ngaia ao Ana reirei bon kaeka n tainako.