“Ana Onimaki Titita Muñoz” Riaona, Turai 2025.
Bwanaaia Aika Itiaki ni Boong aika Kaitira
Ana Onimaki Titita Muñoz
“Te Kakai! Te Kakai!” e takarua te ataeinimwaane ngke e biri rikaaki iaon te kawai.
Kamataata n te tamnei iroun David Malan/Malan Creative
N 1967, Elder William Danner ao ngai uoman mai ibuakoia 20 mitinare ake a moan beku i Colombia. E rang karako tokanikaira ni karokoa te mwaane ae arana Raúl, are e reireinaki irouia mitinare ake tabeman, e kairiira nakoia te utu ae Muñoz. E korakora te Tamnei ngke ti reirei ma te utu aei, ni kakoaua ibukin te Burabeti Iotebwa Timiti ao Kaokakan bwai.
“I ataia bwa ataeinimwaane aikai a taekina te koaua,” e taku Raúl. “Iai irouia te nakoanibonga are iroun naba Iesu Kristo. A kona n tamwarake n te tai aei ni kamarurunga natim te aine ae mataki, Margarita.”
Titita Muñoz e taraai ao e titiraki, “E koaua anne?”
E waerake te korobun i buau. E tuai ni kataaki au koaua n aron aei mai imwaina. I ataia bwa te aekaki ni kakai anne e kainanoa te onimaki ae korakora. Ngai ma toaua ti kunea imwiina bwa te tia rabakau iaon te mata e tuangiia te utu bwa Margarita, are e a aki nooraba onoua te namwakaina n nako imwiin te kabuanibwai, e aki kona ni manga nooraba.
“Iai iroumi te nakoanibonga are iroun naba Iesu Kristo,” e taku Titita Muñoz. “E mataki natiu te aine. Tia nako ni waerake ni kamarurunga.”
I tuai man kakoaua n te aekaki n onimaki ae korakora. Kanga ai aron neiei buun te Uea are Ramonaai, are e tuanga Ammon, “I kakoaua bwa e na koro bukina n aron are ko taekinna” (Aramwa 19:9).
E kabira Margarita Elder Danner, ao ngai I kabaea te kabiraki. Ni mimiiu, taeka ake a otinako mai wiiu bon tiaki mai irou: “Kona marurung ao e na oki am taratara.” I namakinna naba bwa nna taekin kakabwaia riki tabeua, n raonaki ma aroia kain te utu aio n buoka katean te Ekaretia iaon Colombia. Ao imwiina, I kan ataia ngkana I a tia ni karaoa te berita are e na aki koro bukina.
Te bong are imwiina, te ataeinimwaane ae tebwitabun te ririki e biri nakoira iaon te kawai, n takarua, “Te kakai! Te kakai! E a nooraba mwaneu!”
Ti bwabetitoia 13 aomata n te wiiki anne.
Te Tari ao Titita Muñoz a riki bwa membwa aika a kakaonimaki n te Ekaretia. Bitakiia, n raonaki ma ana mwakuri te Tari Muñoz ngkai atuun te katei i Colombia, e buoka butanakon te euangkerio ikekei. E nako ni mitinare te nati te aine, mwanena e riki bwa te bitiobi. Margarita e a oki ana taratara inanon bongin maiuna.
E a tia n taekinna Iesu Kristo irouia ake a onimakinna, “N arau a na kauki mataia mataki” (Reirei ao Berita aika Tabu 84:69). I ataia bwa “a bon konaaki bwaai ni kabane iroun are onimaki” na te Tia Kamaiu (Mareko 9:23).