“Te Mwakuri n Ibuobuoki nakoia ake iai Rotakiia n te Boiarara,” Riaona, Turai 2025.
Te Mwakuri n Ibuobuoki nakoia iai Rotakiia n te Boiarara
E kakaawaki bwa aomata nako a karinerine ao a atatai ni boutoka imarenaia.
Kamatata n te korotamnei iroun Elia Sampo
Ana kakao ara Tia Kamaiu bon “ni kabane [ngaira] ni kabane bwa ti na nakoina ao ni katoonga raoiroina, ao e aki totokoa te aomata are e nakoina” (2 Nibwaai 26:33). Teuana te kawai ae kakaawaki bwa tina nakon ara Tia Kamaiu bon irirakin te taromauri ao irirakin ana waaki ni kakukurei te ekaretia. N taai tabetai, e kona ni kangaanga irirakin te taromauri ni bukina aika a mwaiti. E na kona n rang kangaanga riki ngkana temanna ae maeka ma te aki toamau, kakai rootaki, ke tein aoraki riki tabeua.
N riki bwa ana reirei Iesu Kristo, ti tangiriia ni kabane bwa a na namakina te butimwaeaki ao ni kona n irii taromauri ao waaki ni kakukurei. Te katoto, ti kaota ara tabeaianga ibukiia aomata ake a rabwarabwataki n amwarake ni katauraoan te toa n amwarake aika aki kona n rabwarabwataki iai. Aio e na karekea aia tai aomata aikai n ana te toa ao ni kaboui aia berita ae tabu ma te Uea.
Tabeman membwa e kangaanga irouia bwa a na iri taromauri ke bobotaki tabeua ibukin kakai rotakiia nakon boin boiarara n aron boiarara ao karoun. Aomata ake iai irouia te kaikeike, kairootaki ni boiarara, ke aekakin nako boiarara ake a kai rootaki iai. Ao n aron rabwarabwataki n te amwarake, ko aki kona n ataia bwa te aomata anne e kakai rootaki n te kemikoro n ti man taraakiia. N tokina, te aro aei n tabetai e kona n aki nooraki, ma e rang korakora rootakin ana konabwai te aomata ni karaoan bwaai ake e taneiai iai ni maiuna.
Kanikina
A bati aekakin kanikinaa ao e kona n kaotaki n te kan mumuta, tanoi, maraki n atu, nimarakiraki, nakonnano, kangangan te ikeike, maraki ni bwabwaa ao ni buua, ao a mwaiti riki.
Kanikina a waaki man ae aki rang kakaiaki nakon are e kakaiaki. Ngkai temanna e kona ni karekea te maraki n atu are e toki imwiin uoua te aoa, temanna e kona n iai rootakina are e kona n tiku inanon irabong ke are n tokina e uotaki iai nakon te onaoraki.
Te kai rootaki n te kemikoro e kona n uruana maiun te aomata ao ni karika te namakin ni kaokoroaki. Temanna te membwa are e korakora ae e a tia n rinanona e kabwarabwara:“Waaki ni kakukurei ni katoabong, n aron te boobwai, kawarakiia rao, irakin bootakin te Ekaretia, ke te amwarake i tinaniku e kona n rang kangaanga kaitarakiia. Aio e reke iai namakinan te unra, te kaokoroaki, ao te maroa e korakora. N reitaki ma anne, n tabetai ti namakinna te aki mwutiakinaki ao ni motikaki taekana irouia tabeman ake irarikina ake aki kona n ‘noori’ aorakira ao n namakinna bwa ti tiorobeke ao n aki boomaongina ibukina bwa ti ‘aki tangira te boi.’”
Temanna te karo ao natina te mwaane e korakora kaikeikeia are e ueke man boin te boiarara. Te nati e katauraoi bwa e na taetae n te bootaki n toa imwain nakona n ana mition. Te wiiki are mai imwaina n ana maroro, te bitiobi e tuangiia membwa bwa te ataeinimwane iai ana kanganga n ikeikenakin boin te boiarara ao e tuangiia membwa bwa a na ururinga anne ngkana a roko n te taromauri n te wiiki are imwiina. E nakoraoi mwiin aei n riki bwa te Tabati ae nakoraoi iroun te karo ma natina.
Tabo ni motirawa
N tein te Ekaretia, te aomata are e aki rang kai rootaki n te kemikoro e kona n rineia bwa e na tekateka ni kararoaia aomata ake tabeman. Irouia tabeman, e riai bwa a na rang kawakiniia riki, n aron bwainakin te bwai n ikeike are te raumea iaon ubuia, uotakin te bwai n raumea n teea nakon te taromauri, kee matakuakinan te bootaki n toa n te aonrain.
Tera nako kakaiakin kai rootakin te aomata nakon boin kemikoro, e bon kakaawaki, bwa e na uringaki bwa iao bon te kangaanga ni koaua. E kakaawaki bwa aomata nako a karinerine ao a atatai ni boutoka imarenaia. Aomata a kabonganai boiarara ao booi riki tabeua ni bukina aika a mwaiti, n aron are a tangiria ke ibukin te kakaitiaki. Te uaia n ikarinerine ao ni matata e kakaawaki ibukin katokan kainnano irouia ake a irekereke iai.
Ngkana ko kakai rootaki ni kemikoro, taiaoka taetae ma membwa n am bitiobiriki. Ngkai taabo ni katantan a kona n aki tauraoi ibukin aro nako, e ibuouboki bwa kona kaongoia taan kairiiri n am uoote bwa a na ata kainnanom. Te kauntira n te uoote a kona ni mwakuri ma ngkoe ni kata aia kabanea n tamaroa ni kanakoraoa kakai rootakim ni kemikoro. Karaoana ae eti e na bon nakon arona ao e riai ni baeranti ma ataakina bwa aron bwaai nako e aki kona ni kaaitarai kainnanoia aomata nako ni kabaneia.
Tabeua iango ibukiia taan kairiiri:
-
Buokiia membwa bwa a na matata bwa te kai rootaki ni kemikoro a bon koaua ao e irekereke nakoia ake a rootaki iai.
-
Katauraoi katanoata n tainako ao kauring bwa ti na kanga ni mwamwannano nakoia ake a rinanon te kai rootaki ni kemikoro ao tabeman ake a kaokoroia ibukin aorakiia ao ti na kanga ni kona ni buokiia bwa a na raoniia ni kabane ake a neboa te Uea.
-
Iangoia ni wetea te tia rabakau ibukiia ake aki toamau n te uoote ke te titeiki bwa e na buoka katokan aei ao kanganga tabeua.
-
Iangoia ni baronga te tai ni kataneiai ibukiia taan kairiiri ao membwa iaon kakai rootaki ni kemikoro ao aro riki tabeua ake a kona n roota ana konabwai temanna n ira bootakin te Ekaretia.
Tabeua iango ibukin tabo ni motirawa:
-
Karekea aia tai aomata nako ake iai kai rotakiia ni kemikoro bwa a na tibwa kainnanoia ao raraomaia ma taan kairiiri n te uoote.
-
N tabo ake a kona, karaoa am kabanea n tamaroa ni katei kainibaire ibukin bootaki ao waaki ni kakukurei are e karekea aia tai aomata ake a kakai rootaki ke a rabwarabwataki bwa a na mweengaraoi iai.
-
Iangoia ni katauraoa te bootaki n te aonrain ibukiia naake aki kona n iri ao katauraoi kawai are a na kona iai n iri aomata aikai n ana te toa.
-
Ti kabonganai bwaai ake a kariaiakaki ao a katauraoaki man batiriti n te tiim ibukin autinibootaki n te Ekaretia. Ngkana teuana man bwaai ake a karaoaki n te kainibaire e karika te kanganga, mwakuri ma te manatia n te batiriti ni kakai riki anga. Ngkana membwa a uoti oin aia bwai ni kaboiarara ke bwai ni kaitiaki, bwaai akanne a kona ni kariki kanganga nakoia naake a kairootaki.
-
Iangoi kemikoro ake karekea te kai rootaki ngkana ko bairei waaki ni kakukurei.
-
Ururingnga bwa tabeman aomata ake a kakai rootaki ni kemikoro a tangiria ni beku n te tabo are e mano ibukiia.
Unimwaane Patrick Kearon man te Kooram n Abotoro n te Tengaun ma Uoman e reirei: “Ibukiia naake a namakina te tionako, mwaitoron [ara] butimwaai e rang kakaawaki. Kabaneana, ti kona n titirakiniira bwa tera ae tangiria te Tia Kamaiu nakon aron ara waaki n toa. E kangaa aron ae E tangiria ni butimwaeaia natina nako, tararuakiia, tabeakinaki, ao tangirakiia? E kanga aron ae E tangiriira bwa ti na namakinna ngkana ti roko bwa ti na kaboouaki rinanon ururingakina ao taromauriakina?”
Man karaoan te kamatata iaon te kangaanga aei, aomata ake a kakai rootaki ni kemikoro a kona n namakinna bwa a ongoraeaki aia kangaanga, karineaki, ao a kona riki n irekereke inanon aia uoote ke aia mwaanga. Ngkana kauntira n te bitiobiriki ao uoote a mwakuri ma te mwamwannano ao a tataro mwaaka ibukin te aomata are e rootaki ma aekakin aroaro n te kamaruru, e na mwaiti riki natin Tamara are i Karawa aika ana kakorakoraki ngkai a butimwaai tibwanga ni kaniiaki riki nakon Iesu Kristo. Ngkai e ikotaki te uoote, “ao a na botaki nanoia n te nano ae ti teuana i nanon te tangira imarenaia” (Motiaea 18:21), a riingaki naano ao a kamarurungaki.