“I Namakina te Rau Inanou,” Riaona, Turai 2025.
Bannan te Onimaki
I Namakina te Rau i Nanou
Ngke ataein te reirei n te neeti ngai, I namakinna bwa akea au tai ibukin weteau n te Ekaretia ao ma au kamatebwai. Ma I a tia n reiakinaki ngke I kairake bwa te ibuobuoki ao te karinerine nakon ana tua te Atua e na kairiko nakon te maiu ae kakukurei.
Korotamnei iroun Christina Smith
Inanon kairakeu, I iangoa kitanan Ana Ekaretia Iesu Kristo ibukiia Aika Itiaki ni Boong aika Kaitira. Ma n te tai naba anne, I namakinna bwa I tuai n iri ana reirei te Ekaretia. I baireia bwa n na kitana te Ekaretia, I tangiria n namakina te nakoraoi iai.
Ngaia, ae I a baireia bwa n na kataia ni irii ana reirei te euangkerio. Ngaia are, ngkana I namakinna bwa aki nakoraoi reirei, ao n na kitanna n akea au kangaanga.
Ma “nanou, au iango ao korakorau” (Doctrine and Covenants 4:2), I kataia n ongotaeka ni bwaai aika e reirei te Uea ao n taraia bwa tera mwiina. Rinanon te taneiai anne, I anganaki te tai ni kukurei nakon te bwai ae I tuai man rinanona mai imwaina. Man te timatoa inanon te Ekaretia, I namakinna bwa I kona ni maiuakina te maiu ae kakukurei, n ataia bwa tera raoi te kukurei ni koaua.
Imwiin te taneiai anne, I baireia bwa n nako ni mitinare ao n tibwaua te rau ae I namakinna inanou. N aki tabe ma kataaki aika n na kaitara mangaai, I a tia n reiakinna bwa ngkana I tataro nakon te Atua, E na kamatoaai, anganai te kantaninga, ao ni buokai n ata bukin au kangaanga.
Tera ae I Riai ni Karaoia?
I mwiin au mition, ngkai I tabe ni kamatebwai n riki bwa te neeti, I kabanea te tai ae bati ni katoabong ni karaoa au kataneiai iaon te mwakuri. Imwiina riki, N na karaoi au bwai n reirei n te mweenga ni karokoa 2:00 ke 3:00 n te karangaina. Ngkanne N na matu teutana imwain karaoan te kataneiai iaon te mwakuri n te bong are imwiina.
N te tai are, I riki bwa te beretitenti ibukiia Ataeinimwaane n te uoote. E bon rangi ni kangaanga irou bwa n na kamatebwai ao ni kakoroa nanon weteau n te Ekaretia. I ataia bwa ngkana I katuka weteau, ao, N na aki kona n reireiniia ataeinimwaane taekan kakawakin irirakin kawain te Atua ke ni karekei kakabwaia aika E kawakin ibukiu.
Tera ae I riai ni karaoia?” I tuanga Tamau are i Karawa. “A mangaongao rabwatau ma au iango, ao I taku n au iango bwa I aki karaoa te mwakuri ae Tangirai bwa n na karaoia.”
Imwiin au tataro, I a mwengaraoi. I namakinna bwa e tuangai te Atua, “N te tai aei ko kabanea am tai ni mwakuri korakora e kakawaki ibukim. Am tai ae rangi n tatabetabe e kona ni kangaanga, ma ngkana ko tokanikai iaon te kataaki aei ngkai, ao n na kabonganako ni kakabwaiaia ao ni buokiia aika a mwaiti n taai aika a na roko.”
Te kaeka aei e anganai te koaua ae iai oin te kaantaninga ibukiu, bwa ngkana I karaoia, ao n na kona ni karaoa te mwakuri ae onoti n te tai ae na roko.
I taekinna nakon te ataeinimwaane aron kangaangan te reirei. Ma I tuangiia naba bwa te Ekaretia ao te euangkerio a kakawaki ao e riai bwa boton maiura e ngae ngke ko kaitara ma kangaanga. I kaota au tangira ibukiia ao n tuangiia ae I kataia ni kakoroa nanon weteau ibukina bwa a bon kakawaki nakoiu n aron naba au kamatebwai. A bwaro ranin mataia ngkai koauan bwaai aikai a riingaki iai nanoia.
Te Kakabwaia n te Beku
Ngkai I reitinako ni beku ibukiia ataeinimwaane ao n reireiniia te euangkerio, I iangoa n tainako aia kangaanga n aia namakin n ataei ngkana a ira te taromauri ao n reirei taekan te euangkerio. I kabanea au iango riki iaon marurungin aia iango ao ni buokiia ma kainnanoia n tatabemaniia.
Buokaia ataeinimwaane e buokai ni karikirakea au konabwai n atai ao noori bitaki irouia aomata aika a uarereke. Ngkai I a mwakuri bwa te neeti ao n tabe ibukiia aika a mwaiti, I a tia ni katinea te konabwai anne ngke I tabe ma ake tabeman.
“E taku te aoraki anne bwa ko rangi n atai ana namakin,” a tuangai taan ibuobuoki. Ke e kona te aoraki n taekina, “I kunea bwa e rangi ni bebete te taetae nakoim.”
E a tia te beku inanon wewete te Ekaretia ni kakabwaiaai naba ni mwengau. I a tia n reiakinna ni karimoaa kainabau ngkai I a tia n reiakinna bwa n na aki ti taraai moa.
“Ngke arona bwa ngai te Tamara are i Karawa,” I titirakinai, “Tera ae n na karaoia ni kakorakora te utu aei, ao tera ae I riai ni karaoia ni kakoroa nanon anne?”
Ibukina bwa I a tia ni kamatebwaia te euangkerio ma nanou ni kabane, I ataia bwa n na kanga ao bukintera n na reireiniia au ataei bwa e kakawaki te Ekaretia. Kainabau ao ngai ti ataia bwa ti na kanga ni kakorakoraia ara utu n te maiu n tamnei ibukina bwa ti kabotoa ara reirei iaon ana reirei te Tia Kamaiu.
I namakina te kaantaninga ao te rau inanou man irakin ana reirei te Uea ao ni kakauongo nakon Ana wirikiriki. E a tia ni mena irarikiu ni kawaiu ni kabane, ni kakabwaiaai rinanon au ongotaeka ao weteau ni kakabwaiaia ao ni buokiia tabeman. N aki tabe ma kataaki, I tangiria ni maiuakina te maiu n te kawai ae I kona ni karaoa iai te bwai ae tangiria Iesu Kristo (taraa 2 Nibwaai 32:3).