“Te Kauntira ni Karekean te Reitaki: Karekean te Kukurei n te Mare,” Riaona, Turai 2025.
Te Kauntira ni Karekean te Reitaki: Karekean te Kukurei n te Mare
Taanga, n aroia mitinare, a kona ni kabonganai aia kauntira n reitaki ni kanakoraoa aia reitaki.
Ngkai ngai ataein te kuura n reirei ibukin kamatebwaian te rau ao waaki n itabaraara, e bane nanou n te waaki ae kona ni kabonganaaki ibukin katokan kangaanga iaon te itabaraara. Teuana te marooro ae korakora mwiina nakon maiun raoraou e kaotai nakon te waaki ae I tuai man ongongo mai imwaina: te kauntira n reitaki.
Ngkai e tabe n tibwaua ana mition, e tuangai raoraou bwa te kauntira n reitaki bon te tutuo ae teimatoa ike a maroroakin iai mitinare ma toaia aron aia mwakuri ao aroia ni kanakoraoia. E a tia raoraou ni kunea te kawai ae rang n ibuobuoki ngkai te mitinare are e a tia ni baireia bwa e na kabongana n ana mare n te bong teuana. E tiku te iango aei inanou. I wareka taekan te kauntira n reitaki inanon Tataekina Au Euangkerio ao n taetae nakoia mitinare tabeman ake a oki n aia taneiai ma ngaia. I noria bwa a kanga kauntira n reitaki, n titebo ma kauntira n utu, ni kona ni kabonganaaki ni maroroakin ao n totokoi itabarara aika a mwaiti aika ti kaitara ma ngaai n ara reitaki n te bong aei.
Ti moanna ngai ma kainabau, ae James, ni karaoi kauntira n reitaki ni katoa wiiki imwain ae ti mare. I teimatoa ni kona n uringa te tai are ti moan kaitibo iai. E rangi ni momoa aomata James, e akoi, e oota, ao e tauraoi ni butimwaai au iango n ae kangaa a kakawaki are I namakina iai te aki nanououa n ara kona ni karaoa ara mare ae kakukurei.
Ngkai inanon maiura, ti a tia n reitanako te katei ni kauntira n reitaki ni katoa wiiki. Ngkai e aki kororaoi ara reitaki, ti uaia ni kariaia bwa waaki ni mamarooro aika a mwaiti ake ti a tia ni karaoi a tia ni buokiira ni karekea te kimwareirei ao te nakoraoi n ara mare nakon are ti kantaningaia.
Norakin taian Kaokoro bwa Reken te Tai
E karika te aonaaba te Atua are E kaokiokia ni bwenauaia ao ni kabubura, ao “e noria bwa e raoiroi” (Karikani Bwaai 1:10, 12, 18, 21, 25). Te bitaki ae raoiroi anne bon te kairoro teuana are e kariki taneiai ao iango aika a mwaiti irouia natin te Atua. Ngkai e na kona n namakinaki te maaku n namakina anne riki irouia raao aika a tia ni kabaeaki a na kona n iai aia iango aika a kaokoro iaon iango aika a kakaawaki, ti riai n aki maaku. Ngkai te Tia Kamaiu bon ara banna ni katooto, ti kona n rineia ni karaoi kakaokoro aikai n te tangira, kakauiango, ao ni kawai aika a ibuobuoki ake a na kairiia nakon katokan kangaanga aika a tabwanin ao reitaki aika a kakukurei riki.
Ngkana ti kabaeaki imarenara n te kawai aei ae rietaata ma ni mimitong riki, ti ataia bwa akea nanon te kakaitara ke te kariaia n aia iango n tatabemaniia, te namakin anne tiaki ti tebo aroia. Ma ni karaoan te kataneiai, ao a na moanna n taraaki taian kaokoro bwa taai ni kakorakora aia reitaki taanga i bon imarenaia ma tiaki taian kangaanga. E na oneaki te kakauntaeka ma te reitaki, te onimakinaki, ao te tangira.
Te kauntira n reitaki, e na reitaki ma ana tangira Kristo, e na buokiko ni bita te itabaraara nakon te kakabwaia n oin am reitaki. Aikai aua iango aika a na buokiko ni waaki ma ngaia.
Kateimatoaan Oin Am Kauntira n Reitaki
1. Karaoia
Iangoia ni bootaki ni karaoia ni kanakoraoa am reitaki man teimatoan karaoan te kauntira n reitaki, e ngae ngkana ti nooran aron wakina n te tai ae e a tia ni baireaki. E na aki kona n nakoraoi te mwakuri n akea te iwawaaki ae bwanin aika roko mairouia itera aika uoua.
2. Karaoa te akenta
Iai n am reitaki korakoram ae onoti, kabwakam, ao kainnanom. N iangoan anne, atai atuun reirei aika ko taku bwa a kakawaki ni maroroakinaki n am kauntira n reitaki, n aron te reitaki, te aro ni kairiiri ni karo, karekean taina, ke mwanenakina.
Man karinakin taobiki aikai n am akenta, ko na karekea te tai ibukin iango ao namakin aika a na kona n ti ibuobuoki n taai aika ko aki nakoraoi iai ke ni bon akea.
3. Bairea te tai ae onoti ao tauraoi nako iai
Iangoia ni karekea te tai ae onoti ma am kaurntira n reitaki. Iangoia bwa tera ae na nakoraoi ibukim ao motikia inanom bwa ko na mena ikekei, n tauraoi ni kakauongo ma te nano ni kan reitaki, n tibwatibwa, ao n akoi. Ko na bae n tangiria naba ni kawakina te rekooti are e koreaki n am kauntira n reitaki. Bwaai ake ti koroi n te wiiki ae nako a rangi n ibuobuoki nakoira n ara tai ni katauraoi nakon te tietion ae na roko.
Koreakin mwiin bwaai a na buokiko naba n uring—inanon ana taeka Beretitenti Spencer W. Kimball (1895–1985)—“am tokanikai iaon te kariiri, teirakem man te bwaka, am botumwaaka inanon tain te rawawata, [ao] kimwareireim inanon reken te [tokanikai] iroum.” James ao Ngai ti rangi ni kakaitau bwa ti a tia ni kawakina te rekooti ae kaniia 800 tietion n te kauntira n reitaki aika ti a tia ni karaoi inanon ririki aika a bwakanako. I karekea te kimwareirei n tanrikaaki ao n taraia bwa ti a roko ia!
4. Bwaina te teimatoa
E kona te kauntira n reitaki n namakina te aki nakoraoi ke te maaku n te moantai, ma e na kona ni bebete man te kataneiai. Man tuoakina n tainako, ngkoe ma kainabam kam na kunei kangaanga aika a bebete imwain ae a na riki bwa kangaanga aika a bubura.
Ae matoana riki, teuana mai ibuakon kauntaeka aika a kamaraki ae I tuai man karekea imarenau ma James n tain ara marooro ni kauntira. E waekoa te kauntaeka ae aki kantaningaaki n riaon te iango iaon te marooro ni karekean te nakoraoi, ao ti uaia n rotaki n te bwai ae riki. Ma te itabarara n te uruakinnano are moanaki n te kauntira n reitaki e buokaki naba inanon te kauntira n reitaki. Ti ataia ae na manga reke riki ara tai n te wiiki are imwiina ao are mwiina.
Ngaia are imwiin te wiiki n iango ao ni kabebete, ti a manga kataia riki, ao imwiina ti a kona ni kanakoraoi ara itabarara. I namakinna n ae korakora “te rau ao rikiraken korakoran te tamnei” are e beritanaki nakoira ngkana ti kanakoraoi itabaraara n ana kawai te Tia Kamaiu. Itabaraara ni kabane ake ti a tia ni buoki ma te iango raoi ao te tangira a na kairiira ni waaki nako ao ni karekea riki te kairoro mairoun te Tamnei ae Raoiroi n ara reitaki.
E na iai taai aika ko na namakinna ae kanga akea am itabarara n am reitaki, bwa e aonga n anaaki nanom bwa ko na aki ira te kauntira n reitaki. Ti a tia n iangoia ngai ma kainabau bwa ti na aki karaoa anne. Aikanne taai are e kona iai n riki te kauntira n iraorao bwa te kimwareirei ae itiaki—ngkana ti taekina te bwai ae eti, bootaki ni ngarengare, tibwauai ara iango aika a kakaawaki, ao ni karaoi ururing.
Te Berita
Tamara are i Karawa e karaoira n tatabemaniira nako bwa ti na onoti ao e baireira inanon ara reitaki. E kantaningaira bwa ti na mwakurii ara itabarara, tiaki n te kakauntaeka (taraa 3 Nibwaai 11:29) ma n ana tangira ae itiaki Iesu Kristo, ibukina bwa E ataia ae e na uotiira ni kabane ni kaniira riki ao ni kaniira riki Nakoina (taraa Mataio 5:9; Moronaai 7:48).
E a tia Beretitenti Russell M. Nelson n angananiira tabera aikai ma te berita: “Ti a kaotia ae iai te kawai ae rau, karineaki ao n rine ni katoki kangaanga aika a matoatoa ao te kawai ae bebete ni mwakurii itabarara. Ngkana ko kamataata te akoi are a kakoauaa taan iriira ni koaua Iesu Kristo, ao te Uea e na kakorakora am mwakuri iaon ae ko kona n iangoia.”
Ti kona ni waaki nako iaon kawain te berita ae tabu, ae onrake n te aki nanokokoraki n te koaua anne mairoun ara burabeti ae tangiraki. Ti kona ni katoki ara itabarara ma te wanawana ao te nanoanga, “ao a na botaki [nanora] n te nano ae ti teuana i nanon te tangira imarenara” (Motiaea 18:21).