Kunea te Kimwareirei inanon Mwanangam n te Euangkerio

Ibukina bwa Iesu Kristo e kaoka Ana euangkerio rinanon te Burabeti Iotebwa Timiti, “Ti karekea otara ibukin oin te kantaninga n te maiu, ao n ataia bwa antai ngaira,” e taetae Beretitenti M. Russell Ballard (1928–2023). N ana kabanea ni kakoaua nakon te Ekaretia, Beretitenti Ballard, are te Bonomwi-ngkoa ni Beretitenti n te Kooram n te Tengaun ma Uoman, e taku:

“Ti ataia bwa antai te Atua; antai te Tia Kamaiu, ibukina bwa iai Iotebwa, are e nakon te buakonikai ngke te ataeinimwaane, n ukora kabwaraan ana bure. …

“I mimii, ao I kakoauaa bwa a mwaiti naba mai ibuakomi aika a ataia, ae ti kakabwaiaaki n ata te kantaninga n te maiu, bwa bukin tera ti roko ikai, tera ae ti riai ni karaoia n kakoroa nanona ni katoaa bongin maiura.”

Irouia membwa n ana Ekaretia Iesu Kristo ibukiia Aika Itiaki ni Boong aika Kaitira, te atatai anne n raonaki ma ataakin ana “baire ae kororaoi” te Atua ni kamaiu. E ataaki naba bwa “te babaire ni kakukurei ae korakora,” “te babaire ni kabooira,” ao “te babaire n nanoanga” (Aramwa 42:8, 11, 15), e “ana te bwai ae raba n te maiu ao te nanokokoraki man arora n taai aika a na roko.” Ae kakaawaki nakon te baire anne bon “ana reirei Kristo,” are e boboto nakon te kantaninga ibukin te maiu.

Ibukina bwa ti karekea te euangkerio, ti ataia bwa ngaira natin te Atua, ake a kanakoaki nakon te aonaaba bwa ana kataaki, kanakoraoaki, ao ni katauraoaki bwa ana “uotakirake man mangautiia mate rinanon tokanikain ao mimitongin te Tibu te Teei” (Reirei ao Berita aika Tabu 76:39). Ti ata te tua ao ti kairaki iai “n ae tau bwa [ti na] ataa te raoiroi man te buakaka” (2 Nibwaai 2:5). Ti ataia bwa ti mena n te aonaaba bwa tina bwaina te tangira ao tina beku. Ao ti ataia bwa te Tia Kamaiu e a tia ni weteira bwa tina tokanikai iaon bwain te aonaaba ao tina buokiia aomata bwa ana karaoia naba (taraa Ioane 16:33; Reirei ao Berita aika Tabu 64:2) n te katauraoi ibukin te Kauaoki.

Ngkai ti kabotoi ara iango Iaona, are e aranna Iotebwa Timiti “bwanaan ana Euangkerio te Uea Iesu Kristo are e kaungaira” e na kakorakoraira n tain te kangaanga ao ni kaota nanon ao te kantaninga nakon maiura ao nakon maiuiia aomata.

Ana Bane ni Katorobubua Bubuan Wae, iroun Dan Wilson, e na aki katotongaki

Ongeaba, Kakabwaia, Kimwareirei

Te Atua e a tia n anganiira te inaomata bwa ti aonga ni bon bukintaeka ibukin ara rinerine (taraa Reirei ao Berita aika Tabu 101:78; 2 Nibwaai 2:16). Ni mwakoron “te kakaitara ni bwaai ni kabane” (2 Nibwaai 2:11), e kariaiakaki Tatan bwa e na kataira bwa tina kona n aki kabongana raoi inaomatara.

Ma te Uea Iesu Kristo, “ngkai e ata korakoran te buakaka are e na taona te aonaaba n ara bong, e wetea te burabeti Iotebwa Timiti, “taetae nakoina mai karawa, ao n anganna tuua” (Reirei ao Berita aika Tabu 1:17). Te baeten anne are e kaota iai te Uea ana tua ao ana kantaninga nakoia Ana burabeti e reitinako n ara bong iroun Beretitenti Russell M. Nelson—ao ni bukina naba anne. E kantaningaia te Atua bwa e na kairiira nakon te kukurei n te maiu aei ao mimitongin tiretio n te maiu are imwiina.

Te ongotaeka nakon ana tua te Atua e riai n roko man ara kakaonimaki nakoina ao ara tangira ibukina. Te Uea Iesu Kristo bon ngaia are e katanoata bwa tina tangira te Atua “bon te moan ao te tua ae te kabanea ni korakora” (taraa Mataio 22:37–38). E anga riki iango ngke E katanoata, “Ngkana kam tangirai, ao kam na tou mwiin au tua” (Ioane 14:15).

Iai te kaniwanga ngkana ko tangira te Uea ao ko kawakin Ana tua. Ni koron te bong aei E kabwarabwara “Iai te tua, ae aki kona ni bibitaki are e kateaki i karawa i mwaain karikan te aonaba aei, ake a boto i aona kakabwaia ni kabane—

“Ao ngkana ti karekei kakabwaia nako mai iroun te Atua, bon man te ongeaba nakon te tua anne are boto i aona” (Reirei ao Berita aika Tabu 130:20–21).

Ngkanne, imwiin kaotan ara tangira ibukin te Uea man kawakinan Ana tua bon te kakabwaia are e uota te kukurei ao te kimwareirei.

N taraakin te maiu rinnaon te renti n te euangkerio are e kaokaki ao kaotioti n taai aikai e anganiira te kamatata. Ma te nonori ae e itiaki n aron rikira mai karawa ao tokin kawaira, ti ataia bwa “te bwai are e karika maiu [ra] ae mamate te kabanea n tamaroa e kona n riki raoi bwa aekakin bwaai ake ti na karaoi ni maiu [ra] rinanon ni kabane ae akea tokina te kabanea n tamaroa are e kona n riki!”

I toki n are I moan waki mai iai, ni kauring taneiai n ririki aika nako ma temanna are ea tibwa rairaki mai Tiaban. Rinanon ana mwakuri korakora ao aia mwakuri korakora mitinare ao membwa, e kunea ana euangkerio Iesu Kristo are e kaokaki. Ni kuneakin te euangkerio, e kunea naba te kantaninga ibukina, are e karababa riki ana taratara. E kunea naba te baire ni kakukurei ae korakora. Te ongeaba nakon babaire n te berita n te euangkerio e uotii kakabwaia ao kakukurei nakoia, n tabekiarake n te maiu n rabwata ao n tamnei.

Mwanangana ae e kairia bwa e na kaina ana Ekaretia Iesu Kristo e karikia bwa e na riki bwa te tia kakoaua Iesu Kristo. Unimwaane Patrick Kearon man te Kooram n Abotoro n te Tengaun ma Uoman e a tia ni kabwarabwara te kimwareirei are imwiin:

Ibukin ana babaire n tangira Tamara are i Karawa ibukiia natina n tatabemaniia, ao ibukin maiuna n kamaiu ao ana mition ara Tia Kamaiu, Iesu Kristo, ti konaa—ao n riai—n riki bwa aomata aika rang kimwareirei i aon te aba! E ngae ngke e taoniira angibuakan te maiu aei n taainako, ti kona ni kanakoraoa te rikirake ao ni kateimatoa namakinan te kimwareirei ao te rau n nano man ara kaantaninga iroun Kristo ao ootara ni nera i nanon te babaaire ni kakukurei ae tamaroa.”

I anga au kakaitau ibukin, ao au koaua, n ana euangkerio Iesu Kristo, n raonaki ma te babaire ae tamaroa ni kakukurei are e nene inanona. I kaoia Aika Itiaki ni Boong aika Kaitira bwa ana katoonga uaan te euangkerio ao n namakina te kimwareirei n te maiu aei ngkai a waaki nakon te maiu ae akea tokina.