Kawai aika Bebete n Riki n Aron Kristo n Ara Mwakuri n ibuobuoki

Iroun Francisco Lázaro Campos de Sousa, Brazil

N tain aia bootaki kaain te beretitentii te kooram n unimwaane, I namakina te nano ni kan kaitibo ma te membwa n te kooram ae aki kakaonimaki, temanna ae I tuai man kaitibo mangaia. Te bong teuana imwiin au bobwai ao I namakaina te kairoro bwa n na nakon mwengana. I aki kariaia, ma e rikirake te namakin ni kan kaitibo ma ngaia. I kabwarabwaraai nakoina ao n taekin bwaai aika a roko n au iango. I tuangnga ae e kainnanoia te Uea, ao ngaia e kainnanoa te Uea.

E tibwaua marakina n tiku ni maroa ao ana kangaanga riki tabeua. “Ko na karekeia raoraom n te kooram aika a na nakona n ibuobuoki ao ni boutokaiko,” I tuangnga. E tauraoi ni butimwaea au kakao ao e roroko n bootaki n te Tabati.

I aki kina n te moan n tai, ma e kina te Uea ao e namakina nanona. E a manga kamatoaki riki au onimaki ae korakora. Ngkana ti karaoa te mwakuri n ibuobuoki nakoia natiia Tamara ao n tataro n atai kainnanoia, ao e a kairiira te Uea nakoia. Ti tibwaia n te taneiai ae kakimwareirei n “tabekir[ake] baai aika tine, ao ni kakorako[ai] bubuaniwae aika aki konamaki” (Reirei ao Berita aika Tabu 81:5).

Iroun Ana Rodriguez Ramirez, Spain

N te bong teuna n au mition, toau ao ngai i kawaekoaki bwa n na kawara te titita n te uoote. Ti koroi beeba n aati ao ni koroi rongorongo n tangira i aoia ni kauringa neienne kakawakina ma kororaoina.

Ti roko n ana auti, ti taku n ara iango bwa e na aki mena ni mwengana. Ngke ti tabe ni barongai aati ni beeba, e buti ana kaa ni kaineti nakon te auti. Ti kataia ni karabaira ngai ma toau ni kateimatoa te kakubanako n iraorao, ma e aki korobukina. E noriira.

E otinako te titita man ana ka ma ran ni mata i aon ubuna. E inga ma ngaira ao e taku, “Ngkami uoman bon au anera. Kam mena ikanne n tainako ngkana I kainnanoi ngkami. Kam rabwa.”

E kaoira n rin ao e kaongoira ana bong ae abwabwaki n ana kangaanga ma ana utu ae kakaiaki. Ti ti kakauongo nakoina. E tibwaua aron ana tangira te Atua nakoina ao E aki mwaninga taekan te bwai ae rinanona. Ti wareki koroboki aika tabu ma ngaia, ao e kaonaki mwengana ma te Tamnei ae Raoiroi ngke ti kitanna.

Ana reirei Iesu Kristo a “tauraoi ni… karau nanoia ake a kainnanoa karauan nanoia” (Motiaea 18:9). E onimakiniira bwa ti na riki bwa mwakoron Ana mwakuri ae moan te tamaroa—ae rietata man tabu riki. Ngke ti ana te tai ni kinaia aomata ao n ongora irouia, ti a rangin n tauraoi n riki bwa ana anera te Atua iaon te aba.

Iroun Talia Rodríguez, Switzerland

Te tataro bon mwakoron te mwakuri n ibuobuoki n aron te Tia Kamaiu. E kona te tataro ni moana ara kakaae n ataia bwa antai ae ti na kakabwaia. E kona ni buokiira n mataata n te kantaninga mai karawani kaineti ma arora bwa ti na kanga n anga te kakabwaia. Te tataro bon te mwaneka ae kakaawaki n reiakina aron karaoan tabera.

Kainnabau, ae Mario, e taonaki n te COVID ni moan butinakon te aoraki imwain te iti n totoko. E tuanga te mitinare te mwaane te bitiobier n ara uoote, Moronaai, bwa e na anganna te kakabwaia n te nakoanibonga.

Ibukina bwa e aki tangiria bwa e na kabuta te manaorakinakoia ana utu, E kainnanoa ana kamatoa karawa Moronaai imwain ae karaoia. E katorobubua n tataro ma kainnabana, ao n tataningaa te kakoaua ae rau. Ngke a namakina te rau, e tuangaki iroun kainnabana, “Naako ma am otanga, Moronaai.”

Ngke e rin ni mwengara, ti nora ana tia buaka te Uea. A tinako ranin matan kainnabau ma te kukurei ngke e noora te tari n roko nakoina n anganna te kakabwaia. Bon te namakin ae moan te korakora.

E roko te Tia Kamaiu rinanoia Ana toro, tarira ae tangiraki ae Moronaai, are e katokai baina i aon atuun Mario ao e kakabwaiaa n aron are e karaoia Kristo.

Iroun Geiziane Morais Freitas Duarte, Brazil

N te taina ao I buoka te tititta are e a tia ni katoka rorokona n te taromauri. Ngke I kawaria, n na tibwauaia nakoina aron ana tangira te Tia Kamaiu nakoina ao ana utu. N na teimatoa ni kaoia bwa a na roko n taromauri n te Tabati are imwiina. E waaki nako te mwakuri aei n te tai ae maan, ma a teimatoa n aki roko. I namakina te bwarannano. E korakora te kataaki nakon te nano ni bwarannano. Ma n tainako ngkana ti kawara mwengaia ngai ma toau, ti karekea te namakin ma i karawa. Ti na katamneiia n tainako n aron ae a mena n te tembora, ni kunnikaia n te mainaina. Ti ataia ae ti riai n teimatoa ni kataia.

Imwiin tataro ao ara kakawari aika a mwaiti, n tokina e a roko te bong—a roko kaain te utu n te taromauri! A teimatoa n okioki ni katoa wiiki. A rangi ni mwakuri korakora te utu ni karikirakea aia onimaki ao ni waaki nakon kawain te berita. E moanna n oti koauana ae e a tia te euangkerio ni kakorakoraia.

N tokina, ao I karekea te kakao nakon aia kabaebae n te tembora. Ngke I mataku n te otenanti ni kabaebae, akea te bwai ae I kona ni karaoia ma a bon tinako rannimatau ni kukurei. Bon te kakai.

Iai taai ae I tangiria ni kabwara nanou. Ma n tainako ngkana i kawariia, I noora te tembora. Te Atua e kaota te kanikina nakoiu n Ana babaire ibukin te utu aei. E kabonganaai bwa Ana bwai ni mwakuri n reitaki ma ngaia. I kakaitau Nakoina ibukin kaotakin te mii ni burabeti n te ibuobuoki ae koaua nakoiu.

Te kimwareirei ao mwaakan te mwakuri n ibuobuoki a kuneaki ngkana ti riki bwa te kakabwaia ni maiun temanna, ni buokiia n aron ae karaoia te Tia Kamaiu. E reireia te Beretitentii ni Kabuta n te Bootaki n Aine Camille N. Johnson bwa “ngkana ko karaoa te bwai teuana ae uota te kamaiuaki nakoia tabeman—n rabwata ke n tamnei— … ko uota nakoia ana tangira Iesu Kristo. I kakoaua bwa ngkana ko karaoia, ko na kakabwaiaaki ni karekea oin kamaiuam Irouna.”

Ti riki n aron te Tia Kamaiu n ara mwakuri n ibuobuoki ngkana ti rairaki nakon te Uea ibukin te ibuobuoki n ara mwakuri. Ti iriira wirikiriki, ni kinaia naake ti buokiia, tataro ibukiia, buokiia ni karaoa ao ni kawakin berita aika tabu, ao n teimatoa n ara kekeiaki.

Ana mwakuri n ibuobuoki te Tia Kamaiu—temanna ma temanna—bon te banna ae tamaroa bon ibukira (taraa 3 Nibwaai 11:15). N aron are e a tia Unimwaane Juan Pablo Villar man te Itingaun n anga reirei iaona: Ngkana ti ira Iesu Kristo—te Mataniwi n te Ibuobuoki—ao te ibuobuoki nakoia tabeman n aron are E karaoia, E na kakorakoraira ao n anganiira te mwaaka. Rinanon ara mwakuri n ibuobuoki, ti kona ni kakabwaiai maiura ao ni karekea te rau ao te kimwareirei bon ibukira.”