“Karikirakean Tangiraoin Katangtang” Riaona, Turai 2025.
Bwanaaia Aika Itiaki ni Boong aika Kaitira
Karikirakean Tangiraoin Katangtang
Ti bane ni kona ni kakaei kawai n tibwaua ara bwaintituaraoi ao ara tarena are e a tia n anganiira te Atua, n tabekia n te tabo are ti tei iai.
Te kamataata n te tamnei iroun David Malan/Malan Creative
I tangiria bwa n tainako N na kakatangtang i nanon te Orchestra n te Tembora Tikuea, ana orchestra Ana Ekaretia Iesu Kristo ibukiia Aika Itiaki ni Boong aika Kaitira. I katanga te bwai ni katangtang ae te clarinet ao iai au degree n te katangitang, ma e taraa n ae e na bon aki kona n reke au tai.
Imwiina, I maeka i New Zealand.
E kauringai te Tamnei ae Raoiroi, e ngae n anne, ao I kona n “rauaki” (Aramwa 29:3) n riki bwa te bwaeoniia n te katangitang ibukin te Ekaretia i New Zealand ao n aono riki tabeua. Moan weteau ngke 18 au ririki bon te tia kairiiri n te netiuri. Man te tai anne, I a tia ni kakabwaiaaki ni kaira ao ni karekei bwaai ni katangitang n te titeiki ao n te uoote, n raonaki ma katangan te biano n te Moanrinan. I a tia n tibwaua te katangitang ni kabutaa New Zealand ao i Biribin. I a tia n anene n te kaai uoman n te Tienta ni Kataneiai ibukiia Mitinare i Provo.
E a tia te katangitang ni kateimatoaai n te Ekaretia rinanon taai ni kangaanga ma te kukurei ao te rawawata. Ngkana I namakinna ae I aki kona ni karaoa riki te bwai teuana, I ataia ae I kona ni kangai eng ni ibuobuoki ma te katangitang. E buokai te katangitang n noora te aonaaba man te taratara n tamnei.
E reke au tai ni karaoi katangitang ma kainnabau ao teniman natiu. Ti a tia ni karaoa te kamataku n te uoote, karaoa te katangitang ibukin aia kanakobwana mitinare i Auckland New Zealand Mission, ao n anene ibukin te maungatabu n te titeiki iaon rain. I ataa aron ana taeka te Atua, rinanon ana anene te Ekaretia, ni kaoa te Tamnei ae Raoiroi ao ni kona n riing naano inanon ara utu ao ara uoote.
I teimatoa n tangira te Orchestra n te Tembora Tikuea mai keraroa, ma I ataia ae ti a kakabwaiaki ngkana ti ukori taai ni beku ao ni kamoamoa te Uea n te tabo ae ti mena iai ao i nanon te kawai ae ti kona (taraa Taian Areru 150:6). I rangi ni kakaitau bwa ti kona n tibwaua ana koaua rinanon ara bwaintituaraoi ao ara tarena, n raonaki ma te katangitang. Ti kakabwaiaaki, ao ti kakabwaiaia tabeman, ngkai ti tibwauai bwaintituaraoi ao tarena aikanne ma natin te Atua ao “n tabekia n te tabo ae ti tei iai.”