Te Kakoaua Raoi n Kamimiin Ana Babaire ni Kakukurei te Atua

Ngke I kairake, I rin n reirein te aro ma te katei iai ni kiritian n te onimaki. Bon te reirei ae tamaroa, ao n noori n tikuu ikekei mwakuri n ibuobuoki n ana banna ni katooto Kristo. Ti kantaningaaki ni katoa wiiki man te reirei bwa ti na ira buakon te kiraati ibukin kaetieti n te aro.

N au kabanea n ririki n reirei, e bane te tai ni kabanea te teem anne n atuun te reirei ae “waakin te aro ni moomon” (n aron taekana mairoun te minita are e kaira te reirei). Ae turuturu riki iai, bwa e bane te tai n te kiraati iaon ae bwa bukintera e kaairua “waakin te aro ni moomon.

I nanon tain te moan kiraati, e kauringiia ni kabane te minita bwa tera ae a riai ni karaoia ngkana a kaitibo ma “kaain te moomon.” A koteai ni kabane kaain te kiraati ao a taku, “Ma Jared bon kaain te moomon.” Ni bwaran te kiraati, I maroro ma te minita, ao e anga nanona bwa e na karekea buokau.

N te moan tai i nanon maiu, I rangi n kan ataia bwa te koaua ke tiaki ana euangkerio Iesu Kristo, ao ngkana Ana Ekaretia Iesu Kristo ibukiia Aika Itiaki ni Boong aika Kaitira bon ana Ekaretia te Uea are e a tia ni kaokaki nako aon te aonaaba. Tiaki aio te titiraki n raraoma i nanon maiu. I a tia mai imwaina n namakina te Tamnei ae Raoiroi. n tain bwabetitoakiu. Ma, I a namakina ngkai kainnanoan karekean te ataibwai ae nano riki. E roko te tai ni karaoa au kabanea ni babaire i nanon maiu. I riai n ataia bon irou.

I nanon wiiki ake i mwiina, I wareki booki ni kabane ake I taku bwa I kona ni kairekerekea nakon te euangkerio ae e a tia ni kaokaki. Ae rangi ni kakaawaki riki, I wareka Ana Boki Moomon; ao ngke I wareka Ana Boki Moomon, I ataia raoi bwa bon ana taeka te Atua ao te kakoaua ibukin Iesu Kristo. Tabeia te tai imwiina, e buokai ma tariu te bitiobi ae tatangira ni katauraoi ibukin te tembora ao ara mwakuri ni mitinare. A kakabwaiai maiura babaire aikai ao maiuia ara utu. I rangi ni kakaaitau nakon te bitiobi ae kakateke arei.

N ana Ekaretia Iesu Kristo ae e a tia ni kaokaki, ti kakabwaiaaki n ataakina bwa ti nako maiaa, bukin tera ti mena ikai, ao ti na manga nakea. Ti ataia bwa ngaira natin te Atua, ao rinanon ana Mwakuri ni kamaiu Iesu Kristo, ti kona n manga oki nakon matan te Atua. E taekinaki n Ioane 3:16:

“Bwa E tangiriia aomata te Atua n te aro are E anga Natina ae te riki-temanna iai, bwa e aonga n aki mate ane onimakinna, ma e na reke irouna te maiu are e aki toki.”

Imwiin totokoana i Amonia, e kaoti te anera nakon Aramwa n tuangnga bwa e na oki ao n kabwarabwara riki nakoia aomata n te kaawa arei. E oki Aramwa.

Ao ngke e rin n te kaawa ao e roko irouna te baki, ao e taku nakon temanna te mwaane: ‘Ko kona n angan ana toro te Atua ae mangori te bwai ae e na kanna?’”

Te mwaane anne bon Amureki, are e a tia ni katauraoia te Uea bwa e na beku ma Arama. A bootaki n reireia ana babaire ni kaboan te maiu te Atua ae korakora.

E reirei n arona naba anne te burabeti Iakobwa bwa ti man “rinanon mwakuri aika a raraoi, ma ana nanoanga, ao ana akoi te mesia ae Tabu” are ti kona iai n okirakikaaki ni maeka i matan te Atua.

Ti karekea mwaakan Ana Mwakuri ni kamaiu Iesu Kristo man iriiran Ana reirei. Ngkai ti onimaki irouna, anganna nanora aika a uruaki ma raraoman tamneira, ao n nakoina rinanon otenanti n te Euangkerio—ni karaoan ao karinean berita aika a tabu—ti kaitiakaki iroun te Tamnei ae Raoiroi, ao ti karekea Mwaakana i nanon maiura.

E reireiniira ara Burabeti ae Russell M. Nelson ana berita ae tabu n tangira te Atua, Hesed. Ngkana ti karekei taian otenanti n ana euangkerio Iesu Kristo, ao ni karaoi berita ma te Atua, ti na reitaki ma te Atua n te aro ae onoti ma ni karekea Ana berita ae tabu n tangira.

E aki maan n nako, I kakabwaiaaki ni kairiia iruaa n Kaukan Neweabaan te Auckland New Zealand Tembora. I kairiia aomata aika a mwaiti. N taainako, N na bae n titirakiniia irua bwa tera aia namakin imwiin riniia n ruu aika a tabu i nanon te Tembora. A mwaiti aika a taekina namakinan te rau ao te reitaki ni kaan ma te Atua. E kaotia ni kakoaua te Tamnei ae Raoiroi nakoia iruaa aikai bwa te Tembora bon Ana Auti.

Ngaira kaain te Ekaretia, ti kona ni karekea mwaakan ara Tia Kamaiu ae Iesu Kristo ao Ana Mwakuri ni Kamaiu rinanon rorokora n taainako n ana Auti te Uea. E na kakabwaiai maiura te mwaaka anne, ao maiuia natira ma tibura ngkana ti tiku n teimatoa n onimaki nakon berita aika a tabu ake ti karaoi.

Ti na roko n tatabemaniira nako, n te bong teuana, nakon ara bong ni karaoa ara kabanea n babaire. Ti kakabwaiaaki bwa iai Atuara ae tatangira are e kaanira n taainako. Ngkana ti butiia te Atua, ma te nano ni koaua, ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi. Man te tai anne ni waakinako ti karaoi berita aika a tabu ae matoa ma te Atua. Ao a na mena i aora ana kakabwaia n Ana berita ae tabu n tangira, ao a na roko iroura taian berita aika akea tokiia ao te maiu ae akea tokina, rinanon ana babaire ni kakukurei te Atua.