Katotobiaki n Uruaki man te Maeiei, Kakorakoraaki man te Onimaki

E moanaki waakin te bong ae Ritembwa 17, 2024, ma aekakin boong nako i Port Vila, Vanuatu. E kakammwakuri te kaawa ibukin te katauraoi nakon te bong ni motirawa, ao I mwakuri n te titoa ni kunikai ae rangi ataaki, ni buokiia taan boobwai ao n niiri bwaai n tangira. Imwiina, n akean te kauring, e a mwaeiei n rangi ni korakora aontano.

Ngkai te mitinare ae I a tibwa oki ae 26 au ririki, ae I beku n te moanrinan n te titeiki, I a tia ni kakataaki ma kakorakoraan au onimaki mai imwaina—ma akea ae katauraoi nakon te mwaeiei aei. Ma, i nanon te tai ae karina aei, I aki maaku. I ongo raoi te bwanaa ae rau, ae wirikiriki n tuangai, “Jane, e na bon akea am kangaanga.”

Te ruru ae uarereke e rikirake ni korakora nakon te mwaeiei ae rangi ni korakora. N akean te iango, a biri aomata ni kamanoia, ma I mwaain ae roko n te mataroa n otinako, e bwakaraki aon angau n te TV n tamnei. I bwaka nako aon te timanti ao ni katobibiaki n te rootongitong.

N te tai anne, e moanna n taonai te maaku, ma e kaona nanou te namakin ae rau. E ngae ngke I a bae, I ataia bwa I aki maroa. Te miniti i mwiina e taku te bwanaa ae uarereke man rau “Raira rabwatam nakon are te iterana!” Ngke I a kataia ni mwaing, I kunea bwa a raoiroi baiu, e raoiroi atu, ao akea te ikoaki n rabwatau. I kona n tekateka teutana ma I aki kona n teirake ibukin te o ae tinebu ae mena i etau.

N te tabo ae kaan ma ngai, I ongo bwanaan te aine ma natina te mwaane, ae a mena naba iaan te umunako. Ti taetae i marenara, n tuangiira i marenara bwa e na bon roko te ibuobuoki. Iai aia tareboon, ma e rang kangaanga karekean temanna ngkai e aki maiu te bwai n reitaki. E a nako iraua te aoa ngke ti tataninga, n aki kona ni kakammwakuri, n ongo tangitangin buun taian kaa mai ke raroa ao aia ngurengure aomata ake a mwakuri mai ietara. I tataro, n onimaki bwa e ata au tabo ae I mena iai Tamau are i Karawa ao bwa E na bon karokoa te ibuobuoki.

Ngke e a bong, e a roko te kakabwaia ae e aki kantaningaaki—ikenakin te eea ae boou. Ngkai ti taunaki i aan te auti ae bwaka, ti teimatoa ni kona ni ikeike raoi, ao I a tia n namakina te rau i aou. E ngae ngke e kakua aron te bwai ae riki aei, I ataia i nanou bwa e atai arora ae ti mena iai te Atua.

N te karangaina are imwiina, ti kona n ongo bwanaa mai ietara. E a roko te tiim ni kamaiu. E wewete n takarua te ataeinimwaane are raou ni bae i nano, ao n te tai ae tawe a kaeka taan kamaiu. Temanna i mwiin temanna, a mwakuria kaitiakan te kawai, n uotarake moa tinana ao imwiina natina te mwaane. Imwain ae a nako, a berita bwa a na manga okirai. I mataku ngke e a tabe n buanako te ota man kawaia are a ibuobuoki iai, ao n te moantai mai imwiin te mwaeiwei, I a tiku n ti ngai.

E bitaki te miniti nakon te aoa ae mwaiti, ao I a manga tataro naba. I tan rikaaki n uringii taian kakabwaia ake I karekei ni maiu: aia tangira au utu, te korakora are I a tia ni karekea man karaoan au mwakuri ni mitinare, ao berita aika a tabu are I a tia ni karaoia ma Tamau are i Karawa. N te tabo are e rau arei, ae tabu, I taonaki n te namakin ni kakoaua nakou bwa E kawakinai ni baina.

Ao imwiina, e wetea arau te tia ibuobuoki. “Titita Jane, ko noora au taura?” I raira atu ao I nora ootan te taura i nanon te rootongitong. “Eng!” I kaeka nakoina, ma rannimatau aika a kaona matau.

A mwkauri ma te karaurau ao te taratara raoi kaain te tiim ni ibuobuoki. A tuangai bwa a na reitanako aia mwakuri ma te karaurau bwa a akea te manga umunako man bwaai ake i aou ae na manga reke. I ataia bwa e rangi ni kakaamaku aia mwakuri, ao I tataro ibukin kamanoaia ao kamanoakiu naba. A kanakoi mwiin te umunako teutana imwiin teutana ni karokoa ae a roko irou. A tabekai rake baai aika a korakora nakon te ota, I rotaki i nanou man noraia aomata aika a mwaiti n tataninga—ni kaungaunga, n tang, ao n tataro. Imwiina ao I ongo te bwanaa ae I a kaman kariariaa riki. “Jane, Aio ngai ae tinam.” E rabwatai ni baina tinau, ao I ataia bwa I a maiu n roko ni mwengau.

Imwiin 27 te aoa ni bae iaan te kateitei are e bwaka, I otirake mai iai n akea ikoakiu. E kaonaki nanou n te kakaaitau—tiaki ti ibukin manon rabwatau ma ibukin kakoauaan Atuau bwa e bon mena i rarikiu i nanon maiu. I kakorakoraaki, I anganaki te raunnao, ao ni kamaiuaki rinanon te tataro ao te onimaki. I rangi ni kakaaitau ibukin ana euangkerio Iesu Kristo, ibukin mwaakan te tataro, ao ibukin te atatai ae ngkana a taoniira kataaki, E na kuneira n taainako Otana.

Ana koroboki te Eteta: E orea Port Vila te mwaeiei ae 7.3 magnitute korakorana irarkin atuun kawan Vanuatu n 12:47:26 n te tawanou n tain Vanuatu n 17 Ritembwa, 2024. A bua maiuia 14 aomata n te mwaeiei aei, ao ni kaikoakiia ae raka i aon 250 te aomata.