Oli Fomem Nabeina Grin Maket

Bigfala pat blong populesen long Nabeina oli Katolik mo Protesten, wetem hamas Lata-dei Sent nomo. Blong stap serem gospel i bin wan jalenj, be mitufala i filim strong se oli singaotem mitufala blong wok wetem ol pipol ia. Mitufala i luk fasin blong olgeta blong stanap strong mo olsem wanem oli waes blong winim hadtaem, speseli ol top fisaman. Be, fasin blong olgeta blong sapotem ol famli blong olgeta i bin had from oli no gat stret tul blong fising. Blong stap luk ol hadtaem ia, mi filim wan strong filing long hat blong helpem olgeta.

Wan naet, taem we mi stap luklukbak long ol nid blong komuniti ia, mitufala i kasem insperesen blong askem help long LDS Yumaniterian Fand. Mitufala i stap luk wan projek we bae i givim paoa long ol fisaman blong sapotem ol famli blong olgeta wetem edukesen blong ol pikinini blong olgeta. Wetem givhan blong Elda mo Sista Redmond, mitufala i givim tingting ia blong saplaem ol tul blong fising, wan bot we oli mekem long wud, mo wan enjin blong bot. Mifala i glad tumas from oli apruvum tingting blong mitufala ia, mo mane blong projek ia i stap. Hemia i makem wan stat blong wan niu projek.

Taem mitufala i stap wok wetem lokol branj presiden, Presiden Mweea, mifala i statem wan komuniti fising projek we oli rejistarem mo mekem i kam ofisol olsem Nabeina Grin Maket projek. Projek ia i no blong mekem mane nomo aot long hem, be stat blong bildim yuniti mo fasin blong stap dipen long yuwan long medel blong ol pipol blong Nabeina.

Ol fising net oli kam fastaem, mo komuniti i stat blong yusum olgeta. Taem we oli stap wet long bot blong wud, mi bin givim faebaglas bot blong mi long ol fisaman. Long 9 Febwari 2025, bot blong wud i jes kam. Wan spesel dedikesen seremoni i karem komuniti i kam tugeta wetem glad mo tangkyu mo prea. Taem ia, spirit i bin strong tumas, i mekem testemoni blong mifala i kam strong moa abaot han mo wok blong Lod.

Sakses blong Nabeina Grin Maket projek i dipen long tim wok. Evri wik, ol fisaman oli kambak mo fiksim ol net mo semtaem oli miting blong toktok raon long ol aktiviti mo laef blong komuniti blong olgeta. Long taem blong ol kam tugeta blong olgeta, plante oli talemaot olsem wanem projek ia i bin blesem laef blong olgeta. Wan fisaman, i bin talem wetem wota long ae blong hem, “Bot ia i no wan bot nomo olsem; be hem i wan presen we i kam long God. I bin givim mifala hop mo wan fiuja.”

Ol pipol blong Nabeina oli glad mo talem tangkyu tumas long sapot we i kam long LDS Yumaniterian Fand. Ol fising tul mo bot oli bin ansarem ol prea, givim ol famli wetem ol wei blong sastenem olgetawan. Long taem blong ol miting, plante oli bin serem ol testemoni mo olsem wanem sapot ia i mekem fet blong olgeta i kam strong moa. Wan woman i talem, “Mifala i stap prea oltaem blong gat wan wei blong sapotem ol pikinini blong mifala. Naoia, wetem ol bot mo ol net ia, mifala i save luk ol han blong God long laef blong mifala. Hem i no fogetem mifala.”

Nomata se plante pipol long komuniti oli no memba blong jos blong yumi, oltaem mi mo Sista Birita i biliv strong blong stap givim seves long ol pikinini blong God. Gol blong mitufala i no blong fosem olgeta long ol bilif blong yumi, be blong soem fasin olsem hemia blong Kraes tru long aksen. Projek ia i karem ol pipol i kam tugeta nomata wanem relijin, mo mitufala i glad blong bin stap olsem ol tul long han blong Lod.

Nabeina Grin Maket projek i wan testeman abaot paoa blong fet, seves mo komuniti. Tru long givhan blong Lod, Yumaniterian sapot mo dedikesen blong ol pipol blong Nabeina, i mekem se laefstael blong komuniti i gohed blong stap strong. Ol blesing oli moa bitim janis ia blong kasem mane, mo bildim yuniti mo fasin blong stap dipen long yuwan.

Mi mo sista Birita i bin witnesem ol han blong Lod long evri wokbaot, stat wetem fas insperesen i go kasem las dedikesen blong bot. Mitufala i save se hemia i faswan blong Nabeina, mo mitufala i stap lukluk finis long olsem wanem Lod bae i gohed blong blesem olgeta.

“From we taem mi hanggri, yufala i givim kakae, mo taem mi tosta, yufala i givim wota. Taem mi strenja, yufala i tekem mi go long haos blong yufala” (Matiu 25:35).

Projek blong Nabeina Grin Maket i gat skripja ia we oli yusum taem komuniti i yunaet blong leftemap wanwan long olgeta tru long fet mo seves.