Wan Leta i go long Olgeta we Oli Stap Traehad blong Fogiv

Dia fren,

Harem nogud o sem from wan i mekem nogud long yu i wan eksperiens we evri wan i fesem. Ol pipol raon long yumi plante taem oli talem o mekem ol samting we i mekem yumi kros, no luksave yumi, mekem yumi harem nogud, lukluk daon long yumi, o no glad long yumi.

Plante yia i pas, wan man long jos i bin mekem mi harem nogud. Mi bin kros mo harem nogud, mo wantem se man ia i mas talem sore long mi, be hem i neva mekem. Mi traem blong fogetem wanem we i bin hapen, mo stap tingting se harem nogud mo kros ia we mi stap filim bae i lus nomo.

Be mi bin karem ol filing blong kros ia wetem mi blong sam yia. Filing ia we mi gat long man ia i no save kamaot nomo long mi.

Wan dei mi stap toktok wetem wan fren abaot situesen ia. Wan tingting i kam long hat blong mi:

Fogiv.

Spirit i talem long mi blong fogivim man ia we mi stap kros long hem tumas. Mi bin sapraes.

?Olsem wanem nao bae mi fogivim man ia? Hem nao i mekem nogud long mi, so, hem nao i nidim blong askem long mi blong fogivim hem, hemia i tru o no?

Mi faet wetem kwaet toktok blong spirit ia long tingting blong mi blong wan longfala taem. Be, mi bin tingting hevi long eksampol blong Sevya blong mi mo ol tijing blong Hem abaot fasin blong fogiv:

“Sapos yufala i stap fogivim ol man we oli stap mekem nogud long yufala, bae Papa blong yufala long heven bae i fogivim yufala tu:

“Be sapos yufala i no fogivim ol man we oli stap mekem nogud long yufala, bambae Papa blong yufala i no save fogivim yufala from ol sin blong yufala” (Matiu 6:14–15).

Iven taem i stap long kros, Sevya i askem strong long Papa blong Hem blong fogivim ol soldia we oli bin hangem Hem long kros (luk long Luk 23:34).

Mo tu mi bin tingbaot invitesen blong Presiden Russell M. Nelson we i se “Praktis blong gat tingting i stap daon, gat paoa long tingting mo paoa we i nid blong save fogiv mo askem fogivnes.…

“… Sapos fogivnes naoia i no posibol, askem strong paoa tru long blad blong Jisas Kraes we i pemaot man, blong i helpem yu.”

Wetem evri tingting ia long maen blong mi, mi bin prea fulap. Mi bin prea long Papa long Heven, mo talem, “Sapos hemia i wanem we Yu wantem blong mi fogivim man ia, openem ol doa mo helpem mi mekem hemia i hapen, from se mi no gat paoa blong mekem hemia miwan.”

Long nekis dei long jos, mi mitim man ia we i mekem nogud long mi, fes tu fes. Spirit i bin lidim mi, mi filim se mi mas askem olgeta blong fogivim mi. Mi bin talem sore from mi no bin stap olsem wan gud fren blong sam taem mo mi bin askem olgeta sapos oli save fogivim mi. Oli i bin mekem, mo afta oli bin askem mi blong fogivim olgeta from wanem oli bin mekem. Mi fogivim olgeta.

Mi glad from eksperiens ia. Ol filing blong harem nogud ia oli no go evriwan yet, be mi bin filim gud. Mi bin kam fri from harem nogud mo kros ia we i stap wetem mi blong wan longfala taem. Mi save muv i go fored wetem pis.

Samtaem i no isi nating blong fogiv. Be blong holemtaet wan kros i mekem yu harem moa nogud. Papa long Heven i no wantem yumi blong stap gohed blong safa long harem nogud, mo filing blong kros we Jisas i pemaot mo mekem yumi i fri long hem. From se Hem i lavem yumi, Hem i wantem yumi blong stap glad.

Fren blong mi, plis yu mas glad blong lego ol hevi samting we yu stap holem i stap wetem yu. Givim olgeta long Sevya mo letem lav blong Hem i kam long laef blong yu No jusum blong stap gohed blong harem nogud. Jusum Hem nomata wanem.

Sista Kristin M. Yee, Seken Kaonsela insaed long Rilif Sosaeti Jeneral Presidensi, i bin testifae: “Lod i wantem yumi blong fogivim ol man from gud blong yumiwan. Be Hem i talem se yumi mekem hemia wetem help blong Hem, lav blong Hem, mo andastaning blong Hem. Tru long ol kavenan blong yumi wetem Lod, yumi wanwan i save kasem paoa blong kam moa strong, kasem daereksen, mo help we yumi nidim blong tugeta, fogiv mo kasem fogivnes.”

Dia fren blong mi, oli lavem yu tumas. Rod blong fasin blong fogiv blong yu maet bae i no semmak long hemia blong mi. Be from se yumi evriwan i ol pikinini blong God mo Hem i lavem yumi tumas, Hem bae i lukaot gud wanwan long yumi, folem wanwan nid blong yumi. Hem bae i soem rod long yumi blong kam oraet, iven sapos i tekem taem.

Mi hop se yu kasem fogivnes ia we sol blong yu i nidim tumas. Mi hop se ol toktok blong mi i bin helpem yu, be moa impoten, mi hop se Spirit i testifae long yu abaot ol trutok ia mo se Sevya bae i save givim pis long yu, help, mo mekem yu kam oraet bakegen.

Lav,

Fren blong yu,