“Stap Mekem Ol Saon blong Miusik I Go Evri Ples” Liahona, Julae 2025.
Ol Voes blong Ol Lata–dei Sent
Stap Mekem Ol Saon blong Miusik I Go Evri Ples
Yumi save lukaotem ol wei blong serem ol presen we God i givim long yumi mo ol talen, blong leftemap ples we yumi stap stanap long hem.
Pikja i kam long Deved Malan/Malan Krietiv
Oltaem mi wantem plei long Okestra long Tempol Skwea, okestra blong Jos Ia blong Jisas Kraes blong Ol Lata-Dei Sent. Mi plei long klarinet mo mi gat wan digri long miusik, be i olsem se bae mi no save kasem wan janis.
From nomo se, mi stap long Niu Silan.
Tabu Spirit i rimaenem mi, nomata wanem, mi save “gat pis” (Alma 29:3) olsem wan paeonia blong miusik blong Jos long Niu Silan mo ol narafala eria. Fas koling blong mi taem mi gat 18 yia, mi stap olsem miusik lida blong neseri. Long taem ia i kam, mi bin kasem blesing blong daerektem mo prodiusum ol miusik blong stek mo wod, mo plei piano long Praemeri tu. Mi bin serem miusik raon long Niu Silan mo long Filipin mo stap olsem man blong plei piano blong wan open haos blong wan distrik blong Jos long Sangkae, Jaena. Mi bin singsing wetem wan moa man long Provo Misinari Senta.
Miusik i bin kipim mi i stap long Jos truaot wan taem we mi stap faet wetem filing blong wari tumas mo harem nogud. Taem mi filim se mi nomo save mekem wan samting, mi save talem yes blong help long saed blong miusik. Miusik i helpem mi blong luk wol wetem ol ae long saed blong spirit.
Mi save krietem miusik wetem waef mo ol tri pikinini blong mi. Tugeta, mifala i bin plei long wod, krietem wan miusik kontribusen blong wan misinari program long Oklan Niu Silan Misin, mo singsing long wan onlaen stek konfrens. Mi save olsem wanem toktok blong God, tru ol Jos Hym, i invaetem Tabu Spirit mo i save tajem hat blong ol famli mo ol wod blong yumi.
Mi gohed blong lavem Okestra long Tempol Skwea blong longwe, be mi save yumi kasem blesing taem yumi lukaotem ol janis blong givim seves mo presem Lod long weaples yumi stap mo long wanem wei yumi save mekem (luk long Sam 150:6). Mi glad we yumi save serem ol testemoni blong yumi tru long ol presen mo talen we yumi gat, we i tekem tu miusik. Yumi kasem blesing ia, mo yumi blesem ol narawan, taem yumi serem ol presen ia mo talen wetem ol pikinini blong God mo “leftemap ples we yumi stap stanap long hem.”