Lod I Bin Mekem Hem I Slip Kwaet

Pikja i kam long Deved Malan/Malan Krietiv

Taem fas bon pikinini blong mitufala Caden i bin gat 10 manis, mi mo hasban blong mi Deved, i putum hem i stap wetem papa mo mama blong mi, mo hemia i bin fastaem blong mi putum hem wetem tufala. Mitufala i bin aot blong go dina mo afta go wajem wan muvi long tieta. Taem mitufala i karem ol popkon mo sidaon, mama blong mi i kolem mi.

!Bebi blong mitufala i nomo pulum win mo wan ambulens i stap kam!

Mitufala i draev i go long hom wetem fraet mo ron i go insaed blong luk Caden long ol han blong mama blong mi, we i stap smael long ol paramedik. Hem i bin oraet, be bodi blong hem i eksperiensem sisa [bodi i seksek].

Ol dokta oli no save faenemaot wanem i mekem sisa ia o we i mekem hem i kasem tu taem olsem, be oli bin raetem sam meresin blong hem i tekem we i save help. Olsem fastaem blong mi blong kam olsem wan mama, mi harem nogud tumas. Caden i Oraet nomo, be eksperiens ia i seksekem fet blong mi. Mi bin fulap wetem harem nogud mo wari.

Tu yia afta wan dokta blong bren i talem se bae hem i mekem wan tes blong bren (EEG) long Caden, wan tes blong soem wanem bren blong Caden i stap mekem taem hem i stap slip. Sapos ol risal i gud, bae hem i stop blong tekem ol meresin blong bodi we i stap seksek.

Mi bin wari abaot tes ia from Caden i bin stop blong stap slip smosmol long dei long yia we i pas. ?Olsem wanem nao bae yumi save mekem hem i slip long wan bisi ofis blong dokta wetem ol lektrik rop, i fulap long hed blong hem?

Long naet bifo tes, Deved i givim wan prishud blesing long Caden. Taem blesing i stat, mi filim wan strong filing se Spirit i stap. Mi save se evri samting bae i Oraet. Long fastaem we Caden i kasem sik ia kasem taem ia, hemia i fastaem we mi bin filim pis.

Long nekis dei ol dokta oli putum ol lektrik rop long hed blong Caden. Afta mifala i putum hem i slip long eksam tebol mo ofem ol laet.

Hamas minit nomo i pas be hem slip finis. Hemia bae i no luk olsem wan merikel, be hem i no bin save slip hemwan olsem blong wan yia.

Papa long Heven i no bin fogetem mifala. Spirit blong Hem i bin stap long ofis blong dokta, i stap mekem Caden i stap kwaet mo i stap givim kamfot long mi. Fasin blong mi long saed blong ol hadtaem mo ol prishud blesing i bin jenis long dei ia. Mi save se paoa blong prishud i tru.

Naoia Caden i wan yang adalt. Taem hem i bebi, hem i neva kasem wan sisa. Hem i bin fesem ol narafala jalenj be hem i bin winim fulap long olgeta. Mi save se Lod bae i gohed blong lukaotem hem mo mekem ol fraet blong mi i godaon. (luk long Luk 8:50).