Faenem Glad Tru long Gospel Wokbaot blong Yu

From se Jisas Kraes i putumbak gospel blong Hem tru Profet Josef Smit, “yumi gat wan andastaning abaot stamba tingting blong laef, mo huia yumi,” olsem we Presiden M. Russell Ballard i bin talemaot (1928–2023). Long las testemoni blong hem i go long Jos, Presiden Ballard, we i bin stap olsem Akting-Presiden blong Kworom blong Olgeta Twelef Aposol i talem se:

Yumi save huia i God; yumi save huia i Sevya, from se yumi gat Josef, we i bin go long bus olsem wan boe we i stap lukaotem blong kasem fogivnes long ol sin blong hem. …

Mi sapraes, mo mi sua se plante long yufala i sapraes tu, long olsem wanem yumi gat blesing ia blong save wanem yumi save abaot stamba tingting blong yumi long laef ia, from wanem yumi stap ia, wanem yumi mas stap traem blong mekem mo winim long evri dei laef blong yumi.”

Blong ol memba blong Jos Ia blong Jisas Kraes blong Ol Lata-dei Sent, save ia tekem tu wan andastaning abaot “plan ia blong God we i stret gud evriwan,” blong fasin blong sevem man. Oli save tu olsem “bigfala plan blong stap glad,” mo “plan blong pemaot man,” mo “plan blong sore” (Alma 42:8, 11, 15), “i karemaot ol samting we i sikret long laef mo ol samting we yumi no sua blong fiuja blong yumi. Impoten pat blong plan ia i “doktrin blong Kraes,” we i stap long medel blong stamba tingting blong laef.

From se yumi gat gospel, yumi save se yumi, yumi ol pikinini blong God, we Hem i sendem yumi kam long wol ia blong kasem tes, mekem gud yumi, mo rere “blong girap tru long laef bakegen long ded blong olgeta dedman, tru long win mo glori blong Smol Sipsip ” (Doktrin mo Ol Kavenan 76:39). Yumi save ol komanmen mo folem instraksen blong “kasem inaf tijing blong mekem se oli save gud aot long nogud.” (2 Nifae 2:5). Yumi save se yumi stap long wol ia blong lavem mo givim seves. Mo yumi save se Sevya i bin singaot yumi blong winim wol ia mo blong helpem ol narawan i mekem semmak samting (luk long Jon 16:33; Doktrin mo Ol Kavenan 64:2) blong rere from Seken Kaming blong Hem.

Taem yumi lukluk nomo long Hem, wanem we Josef Smit i singaotem, “saon blong glad blong Gospel blong Lod Jisas Kraes blong yumi” bae i givim paoa long yumi long ol dei blong yumi we i had mo tekem mining mo stamba tingting i kam long laef blong yumi mo long laef blong ol narawan.

Evri Ni Bae Oli Ben i Bodaon, i kam long Dan Wilson, oli no mas mekem kopi

Fasin blong stap Obei, Ol Blesing, Glad

God i bin givim long yumi fridom blong mekem joes mekem se bae yumi stap akaontebol folem ol joes blong yumi (luk long Doktrin mo ol Kavenan 101:78; 2 Nifae 2:16). Olsem pat blong “wan fasin blong go agens long evri samting.” (2 Nifae2:11), oli letem Setan blong temtem yumi blong mekem se yumi no yusum gud fridom blong joes blong yumi.

Be Lod, Jisas Kraes, “i save bigfala trabol we bae i kam long ol man we oli stap laef long wol, i bin singaotem Profet Josef Smit, “mo mi stap long heven mo toktok long hem, mo givim ol komanmen long hem(Doktrin mo Ol Kavenan 1:17). Paten we Lod i stap yusum blong talemaot ol komanmen blong hem mo tingting blong Hem long ol Profet i gohed long dei blong yumi wetem Presiden Russell M. Nelson—mo from semmak risen. God i wantem tumas blong lidim yumi i go long hapines blong laef ia mo i go long selestial glori long nekis laef.

Fasin blong stap obei long ol komanmen blong God, i mas kam tru long komitmen mo lav blong yumi long Hem. Lod Jisas Kraes Hemwan i talemaot se blong lavem God “i fas mo bigfala komanmen” (luk long Matiu 22:37–38). Hem i givim sam moa niu tingting taem Hem i talemaot se: “Sapos yufala i lavem mi, bambae yufala i save obei long ol tok blong mi” (Jon 14:15).

I gat wan riwod blong stap lavem Lod mo stap kipim ol komanmen blong Hem. Long dispensesen ia, Hem i bin tokbaot “wan loa, we i no save jenis we i kam long heven … , evri blesing i folem loa ia—

“Mo taem yumi kasem eni blesing we i kam long God, hem i from fasin blong yumi blong stap obei long loa ia we blesing ia i folem” (Doktrin mo ol Kavenan 130:20–21).

Ansa we i moa hae i blong soem lav blong yumi long Lod mo kipim ol komanmen blong Hem, ol blesing we i givim hapines mo glad.

Stap lukluk long laef tru ol glas blong lukluk blong gospel we i kambak mo revelesen blong tedei we i givim klia tingting mo lukluk long yumi. Wetem wan klia lukluk long ples we yumi kamaot long hem we i tabu mo ples we yumi stap go long hem, yumi save se: “ol stret samting we bae i mekem laef blong yu long wol i moa gud olsem we i stap, oli ol stret semmak samting we bae i mekem laef blong yu truaot taem we i no save finis i moa gud olsem we i stap!”

Mi en long ples we mi stat, mi tingtingbak long eksperiens blong mi sam yia i pas wetem wan niu konvet long Japan. Tru long fasin blong hadwok wetem strong tingting blong hem mo hadwok blong ol misinari mo ol memba, hem i faenem gospel blong Jisas Kraes we i bin kambak. Taem we i stap lukaotem gospel, hem i kam tu blong faenemaot hemwan, stamba tingting blong hem, we i mekem visen blong hem i go moa bigwan. Hem i bin faenem tu bigfala plan ia blong hapines. Blong stap obei long plan blong ol kavenan blong gospel ia, i givim hem ol blesing mo glad, stap leftemap hem long saed blong ol samting long wol ia mo long spirit.

Wokabaot blong hem we i lid i kam long membasip blong hem insaed long Jos blong Jisas Kraes i givim hem janis blong kam wan witnes blong Jisas Kraes. Elda Patrick Kearon blong Kworom blong Olgeta Twelef Aposol i bin tokbaot glad olsem ia:

From se tru long plan ia blong Papa blong yumi long Heven we i gat lav from wanwan long ol pikinini blong Hem, mo tru long laef blong Hem we i pemaot yumi mo misin blong Sevya blong yumi, Jisas Kraes, yumi save—mo mas—!stap ol pipol we oli stap glad bigwan long wol ia! Nomata ol hadtaem blong laef we oltaem bae i mekem yumi stap harem nogud bigwan, yumi save wokhad blong gat glad we i gohed blong stastap mo pis, tru hop blong yumi long Kraes mo save ia abaot ples blong yumiwan long naesfala plan ia blong hapines.”

Mi talemaot tangkyu blong mi from, mo testemoni abaot, gospel blong Jisas Kraes we i bin kambak, wetem bigfala plan ia blong hapines we i stap dip insaed long gospel ia. Mi invaetem yu blong tekpat long ol frut [blesing] blong gospel mo filim moa glad long laef ia taem yu stap wokabaot i go from laef we i no save finis.