Stap Ansa long Bigfala Kwestin: ?Wanem Tingting blong Yufala long Mesaea Ya?

Visen we oli tokbaot long Doktrin mo ol Kavenan 76 i tokbaot plante ol ki trutok abaot Jisas Kraes:

• “Lod Hem i God, mo i gat Hem nomo, mo i no gat narafala Sevya.” (ves 1).

• Hem i “gat sore mo gladhat long olgeta we oli fraet long [Hem],mo i glad tumas blong givim ona long olgeta we oli wok blong [Hem] wetem stret mo gud fasin” (ves 5).

• “Hem i bin kam long wol … blong Hem i tekem ol sin blong wol, mo blong Hem i mekem wol ia i kam tabu, mo blong Hem i klinim wol ia long evri fasin we i no stret mo i no gud; blong mekem se, tru long hemwan, bae Hem i sevem evriwan, evriwan ia we Papa i bin putum anda long paoa blong Hem mo Hem i bin mekem;,” (ves 41–42).

• Mo long en Jisas Kraes “i tekem i kam atonmen ia we i stret gud evriwan tru long blad blong hem we i ron.” (ves 69).

Josef mo Sidni tufala i testifae wetem strong paoa long tingting abaot trutok ia se, Jisas i stap laef mo hamas Hem i impoten tumas :

“!Hem i stap laef!

“From we mitufala i bin luk hem, we i stap long raet han blong God; mo mitufala i bin harem voes we i testifae se hem i Wan Stret Pikinini Ia Nomo blong Papa—

“Se from hem, mo tru long hem, mo aot long hem, ol wol oli stap mo oli bin krietem olgeta, mo ol pipol we oli stap long hem oli ol stret boe mo gel long God” (ves 22–24).

Jisas Kraes bae i sevem “evriwan be no [ol pikinini blong tudak]” (Doktrin mo Ol Kavenan 76:44). Olgeta oli bin ansa fulwan long kwestin ia se “?Wanem Tingting blong Yufala long Mesaea Ya?” blong no stap akseptem Tabu Spirit mo stap tanem baksaed mo go agensem Jisas Kraes mo Paoa blong Hem afta we Hem i soem Hemwan long olgeta (luk long ves 43). Blong stap mekem olsem, oli bin “krusifaem hem, insaed long olgetawan, mo oli bin putum hem i sem long fored blong evriwan.” (ves 35).

Olsem wanem nao olgeta long telestial kingdom oli ansa long kwestin, “?Wanem Tingting blong Yufala long Mesaea Ya?” Oli jusum blong no akseptem gospel mo testemoni long saed blong Jisas” (Doktrin mo Ol Kavenan 76:82, 101), mo oli no akseptem ol komanmen blong Hem, oli “olgeta we oli ol giaman man, ol man blong wokem blak majik, mo ol man blong mekem adaltri, mo olgeta we oli slip wetem man o woman bifo long mared, mo huia man we i laekem mo mekem giaman.” (ves 103).

Nomata long hemia, bae oli kasem wan laef bakegen long ded mo digri blong glori “we i bitim wanem we man i andastanem” (ves 89) Oli stap long wan long wan loa blong telestial kingdom (luk long Doktrin mo Ol Kavenan 88:36) we i nidim evriwan blong “oli benem ni blong olgeta, mo evri tang bae oli konfes long Lod we i sidaon long jea blong oltaem mo oltaem” (Doktrin mo Ol Kavenan 76:110).

Olsem wanem nao olgeta long terestrial kingdom oli ansa long kwestin, “?Wanem Tingting blong Yufala long Mesaea Ya?” Olgeta ia, oli olgeta we “oli no strong” long testemoni long saed blong Jisas; “taswe, oli no kasem hat blong king blong rul long kingdom blong God blong yumi” (ves 79). Oli gat blesing ia blong “luk fes blong Pikinini, be oli no kasem ful paoa mo glori blong Papa.” (ves 77).

Jisas Kraes mo gospel blong Hem we i no save finis i no jalenjem yumi blong save nomo be blong mekem mo blong kam olsem. Blong kasem fulnes blong Papa mo blong Pikinini, wan i mas kasem ol tempol odinens mo stap fetful long ol kavenan ia. Profet Josef Smit i mekem i klia se: Sapos wan man i kasem fulnes blong prishud blong God, hem i mas mekem folem semmak wei olsem we Jisas Kraes i bin kasem, mo hemia i hapen tru kipim evri komanmen mo stap obei evri komanmen long haos blong Lod.” Olgeta long terestrial, oli no wantem akseptem blong kasem fulnes blong Papa.

Olsem wanem nao olgeta long selestial kingdom oli ansa long kwestin, “?Wanem Tingting blong Yufala long Mesaea Ya?” Oli olgeta we oli bin kasem “testemoni long saed blong Jisas”; oli bin biliv “long nem blong hem;” mo oli bin baptaes folem fasin we oli bin berem hem, taem oli berem yumi andanit long wota long nem blong hem” (ves 51). Oli stap obei long ol “komanmen, [mekem se] bae oli wasemaot mo oli klinim aot evri sin blong olgeta, mo oli kasem Tabu Spirit tru long fasin blong putum han antap long hed blong man, tru long hem we oli odenem hem mo oli silim hem long paoa ia” (ves 52). Oli “win tru long fet, mo Tabu Spirit blong promes i silim olgeta” (ves 53). Oli “ kam stret gud evriwan tru long Jisas, we i man blong toktok from niu kavenan, we i tekem i kam atonmen ia we i stret gud evriwan tru long blad blong Hemwan we i ron.” (ves 69).

Jisas Kraes i andastanem Wok blong Hem insaed long Plan blong Hapines blong Papa long Heven: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi sipos mi mi no tekem hem i kam.” (John 14:6). I no gat wan i kasem selestial glori o fulnes blong Papa sapos i no akseptem evri samting we Sevya i givim tru long Atonmen blong Hem(luk long Doktrin mo Ol Kavenan 84:37–38): Lav, paoa, sore, ol gud samting, ol wokman, jastis, ol komanmen, ol odinens mo ol kavenan blong Hem.

Presiden Russell M. Nelson i bin eksplenem wok blong Jos Ia blong Jisas Kraes blong stap helpem ol pikinini blong God blong kasem laef we i no save finis: “Stamba tingting blong Jos we i bin stap longtaem finis i kam, i blong helpem evri memba blong kam antap long fet blong olgeta long Lod Jisas Kraes, mo long Atonmen blong Hem; blong helpem olgeta blong mekem mo kipim ol kavenan we oli mekem wetem God, mo blong mekem ol famli oli kam strong moa, mo silim olgeta.”

Presiden Russell M. Nelson i bin leftemap tingting blong yumi blong mekem selestial kingdom i gol blong yumi we i no save finis mo afta, “tingting gud long weaples wanwan desisen blong [yumi] long laef ia bae i putum [yumi] long hem long nekis wol.” Taem yumi stap ansa long invitesen ia, bae yumi rere blong save ansa long bigfala kwestin, “?Wanem Tingting blong Yufala long Mesaea Ya?”

Visen blong ol glori ia i no givim hop nomo se fridom blong joes i ril be i soemaot tu se ol joes oli impoten. I rimaenem yumi tu se, tru Jisas Kraes, yumi “kam fri aot long foldaon” mo kam fri blong oltaem blong jusum fridom mo laef we i no save finis, tru long bigfala Man blong Toktok blong evri man, o blong jusum blong kam prisena mo ded” (2 Nifae 2:26–27). ?Bae yumi jusum wanem? Fiuja blong yumi long laef ia mo ples we yumi stap go from we i no save finis i saen strong olsem fet blong yumi long Jisas Kraes.