“Kompanionsip Kaonsel: Stap Krietem Stamba Tingting Ia blong Gat Hapines insaed long Mared Laef,” Liahona, Julae 2025.
Kompanionsip Kaonsel: Stap Krietem Stamba Tingting Ia blong Gat Hapines insaed long Mared Laef
Ol kapol, olsem ol misinari, oli save yusum kompanionsip kaonsel blong mekem rilesensip blong olgeta i kam antap.
Olsem wan yang kolej studen we mi stap stadi long pis mo fasin blong raorao, mi bin interes bigwan long eni aksen plan we bae oli save yusum blong stap stretem fasin blong raorao. Wan stori we i bin jenisim laef blong mi, i bin wetem wan fren taem i introdiusum long mi wan aksen plan we mi neva harem bifo: kompanionsip kaonsel.
Taem hem i stap serem abaot misin blong hem, fren blong mi, i talem long mi se kompanionsip kaonsel i wan samting we ol misinari kompanion oli mekem evri taem blong tokbaot olsem wanem tufala i stap wok tugeta mo olsem wanem tufala i save mekem i kam moa gud. Fren blong mi i bin faenem se aksen plan ia i helpem hem bigwan olsem wan misinari mekem se hem i mekem plan blong yusum long mared laef blong hem sam dei. Tingting ia i draon dip insaed long hat blong mi. Mi ridim abaot kompanionsip kaonsel long Prijim Gospel blong Mi mo mi bin toktok wetem ol narafala riten misinari abaot ol eksperiens blong olgeta abaot hemia. Mi bin luk olsem wanem kompanionsip kaonsel, i semmak long ol famli kaonsel, oli save yusum blong tokbaot mo stopem plante raorao we i save spolem ol rilesensip blong yumi tedei.
Hasban blong mi Jemes, mo mi, mitufala i stap gat ol kompanionsip kaonsel iven bifo mitufala i mared. Mi save tingbaot yet fas miting blong mitufala. Jemes hem i gud long evri samting, i kaen, i save andastanem man, mo i glad blong tekem ol tingting blong mi i impoten mekem se mi filim se mi save trastem paoa we mitufala i gat blong bildimap wan hapi mared.
Naoia long laef blong mitufala, tugeta, mitufala i gohed blong mekem kompanionsip kaonsel blong mitufala blong evri wik. Taem rilesensip blong mitufala i no stret gud, mitufala agri se plante long ol kaonsel we mitufala i gat, i bin helpem mitufala blong faenem bigfala glad mo kasem fulap samting we mitufala i ting se i posibol.
Mekem Fasin blong Raorao i kam Wan Janis
God i bin krietem wan wol we Hem i gohed blong divaedem mo mekem i kam moa bigwan, mo “hem i luk we i gud tumas” (Jenesis 1:10, 12, 18, 21, 25). Bigfala mo naesfala ples ia i pulum tingting we i fulap wetem plante kaen eksperiens mo ol lukluk long medel blong ol pikinini blong God. Bae yu filim fraet taem yu kam blong faenemaot se ol patna we oli mared oli gat fulap kaen tingting abaot ol impoten topik, yumi no mas fraet. Wetem Sevya olsem eksampol blong yumi, yumi save wok long ol raorao ia wetem lav, insperesen, ol wei blong bildimap yumi blong lidim yumi i go long evri ansa blong ol problem mo ol rilesensip we oli hapi moa.
Taem yumi wok tugeta long hae mo tabu wei ia, yumi andastanem se i no nid blong gat fasin ia blong raorao o no akseptem tingting blong wanwan long yumi, from se fasin blong wantem winim narawan i no semmak long toktok ia ikwol. Wetem praktis, fasin blong gat wan lukluk we i no stret long narawan bae i nomo kam wan samting we bae blokem yumi be bae i kam ol janis blong joenem yumi. Ol fasin blong raorao bae i kam fasin blong toktok gud tugeta, tras mo soem lav.
Kompanionsip kaonsel, we i fulap wetem lav blong Kraes, bae i help blong jenisim ol raorao i kam ol blesing long rilesensip blong yuwan. Hemia samfala tingting blong helpem yu save stat wetem.
Stap Gat Kompanionsip Kaonsel Blong Yuwan
1. Komitmen
Tingting blong stretem samting tugeta blong mekem rilesensip blong yutufala i kam antap taem yutufala stap gat kompanionsip kaonsel tugeta, iven sapos hem i wan tes blong wan smol taem nomo. Aksen plan ia bae i no save wok gud sapos tufala patna i no tekpat fulwan.
2. Mekem wan ajenda
Rilesensip blong yutufala i gat ol spesel paoa, ol samting we yutufala i no strong long hem, mo ol nid. Wetem hemia long maen, lukaotem wan topik we yutufala filim se i impoten blong tokbaot long kompanionsip kaonsel, olsem lav laef blong yutufala, ol wei blong stap olsem wan papa mo mama, taem tebol, o ol faenens.
Taem yutufala stap putum ol topik ia olsem ol samting blong tokbaot evri taem, yutufala i save blokem sam spes blong ol tingting mo filing we i save kamaot long taem blong kros o maet bae i no gat nomo.
3. Putum wan stret taem mo stap rere from
Tingting blong putum wan stret taem blong mekem kompanion kaonsel blong yutufala. Jusum wanem taem bae i stret long yutufala mo afta mekem komitmen ia blong stap long taem ia, rere blong lisin gud, serem evri tingting we yu gat, mo stap kaen. Bae i gud tu sapos yutufala i raetemdaon wanem yutufala i tokbaot long kompanionsip kaonsel blong yutufala. Ol not we mitufala i raetemdaon las wik oli helpem mitufala blong rere long nekis kaonsel blong mitufala.
Stap teknot bae i help tu blong mekem yu save tingbaot—long ol toktok blong Presiden Spencer W. Kimball (1895–1985)—“yu winim ol jalenj, kam gud bakegen afta we yu foldaon, fasin blong gohed nomata tudak, [mo] yu glad taem [yu winim].” Jemes mo mi i glad from mitufala i kipim rekod blong ol 800 kompanionsip kaonsel we mitufala i stap gat long ol yia we i pas. !Hem i wan bigfala glad blong stap lukluk i gobak mo luk olsem wanem mitufala i stap kam antap!
4. Mekem evri taem
Fastaem blong gat kompanionsip kaonsel bae yu filim i defren smol o yu fraet smol, be bae i kam moa isi wetem praktis. Blong stap jekem yutufala evri taem, yu mo patna blong yu bae yutufala save poenemaot ol smol problem mo stretem bifo oli kam ol bigfala problem.
I gat wan, long ol raorao blong mitufala we i nogud tumas we mi mo Jemes i bin gat long kompanionsip kaonsel. Kwiktaem raorao i kam antap bigwan bitim wanem we mitufala i stap folem long nomol storian blong mitufala mo tugeta mitufala i harem nogud long proses ia. Be raorao ia we i brekem hat blong mitufala tugeta i stat long kompanionsip kaonsel mo tu mitufala i bin stretem nomo long kompanionsip kaonsel. Mitufala i save se bae mitufala gat wan janis nekis wik mo nara wik.
So afta wan wik blong tingting hevi mo kam kwaet bakegen, mitufala traem bakegen, long en mitufala wok tugeta blong stretem ol samting we mitufala no agri long hem long mitufala wanwan. Mi filim strong “pis blong miwan mo wan bigfala paoa long saed blong spirit” we oli promesem long yumi sapos yumi stretem ol raorao long wei blong Sevya. Evri raorao we yumi stretem wetem insperesen mo lav we bae i tekem yumi go fored mo invaetem moa Tabu Spirit blong stap long ol rilesensip blong yumi.
Bae i gat ol taem we yutufala i filim se i nogat eni raorao long rilesensip blong yutufala, mekem se yutufala wantem skipim kompanionsip kaonsel. Mi mo hasban blong mi, i disaed blong no mekem hemia. Hemia bae i ol taem we kompanionsip kaonsel bae kam ol glad we i gud tumas—taem yumi stap tokbaot wanem we i stap go gud, laflaf tugeta, serem ol tingting we i impoten, mo mekem ol memori.
Promes Ia
Papa long Heven i mekem wanwan long yumi i spesel mo afta i oganaesem yumi i go long ol rilesensip. Hem i wantem yumi stretem ol raorao blong yumi long fasin blong nogat rao (luk long 3 Nifae 11:29) be wetem bigfala lav blong Jisas Kraes, from Hem i save karem yumi kam moa kolosap tugeta mo kolosap moa long Hem (luk long Matiu 5:9; Moronae 7:48).
Presiden Russell M. Nelson i bin givim toktok ia wetem wan promes: “Bae yumi soem se i gat wan wei blong stretem ol jalenj we i had wetem respek mo pis, blong stretem yumi taem i no gat agrimen. Taem yu soem jareti we ol tru man blong folem Jisas Kraes i stap gat, Lod bae i luksave yu moa long wan wei we yu no save tingting long hem..”
Yumi save muv i go fored long kavenan rod ia, fulap long tras mo hop we i kam long profet blong yumi we yumi lavem tumas. Yumi save stretem ol raorao blong yumi wetem ol insperesen mo filing, “wetem hat blong [yumi] i joen tugeta blong kam wan long lav, lav we wan i gat long narawan” (Mosaea 18:21).