Ol Simpol Wei blong Kam Moa Olsem Kraes long Givhan Wok blong Yumi

I kam long Francisco Lázaro Campos de Sousa, Bresil

Long wan miting blong ol presidensi blong kworom blong ol elda, mi filim se mi wantem tumas blong mit wetem wan memba blong kworom we i no aktiv, wan man we mi no mitim yet. Wan dei afta long soping, mi gat wan strong filing se mi mas go long haos blong hem. Mi bin gat tu tingting, be filing ia blong mitim hem i bin strong tumas. Mi bin introdiusum miwan mo talem ol samting we i kam long maen blong mi. Mi bin talem long hem se Lod i nidim hem, mo hem i nidim Lod.

Hem i bin serem harem nogud blong stastap hemwan mo ol nara hadtaem blong hem. “Bae yu faenem ol fren long kworom we bae oli helpem mo sapotem yu,” mi bin talem long hem. Wetem gladhat hem i akseptem invitesen blong mi mo i bin atendem ol Sabat miting.

Mi no bin save hem long fas ples, be Lod i bin save mo filim save hat blong hem. Tingting blong mi ia, i bin wan tru tingting. Taem yumi givhan long ol pikinini blong Papa long Heven mo prea blong save ol nid blong olgeta, Lod bae i lidim yumi i go long olgeta. Yumi serem tugeta glad eksperiens ia blong “leftemap ol han we oli hang i kamdaon, mo mekem ol ni ia we oli no strong oli kam strong moa” (Doktrin mo Ol Kavenan 81:5).

I kam long Ana Rodriguez Ramirez, Spein

Wan dei long misin blong mi, kompanion blong mi mo mi i bin kasem insperesen blong visitim wan sista long wod. Mitufala i katem ol pepa long sep blong hat mo raetem ol naesfala mesej long hem blong rimaenem hem se hem i i impoten.

Mitufala i kasem haos blong hem, mo ting se bae hem i no stap. Taem mitufala i stap putum gud ol pepa hat ia, trak blong hem i kam stop long raet saed blong haos. Kompanion blong mi mo mi i traem blong haed blong mekem se hem i no luk gudfala sapraes ia, be mitufala no save mekem. Hem i bin luk mitufala.

Sista ia i kamaot long trak blong hem wetem wota blong ae long fes blong hem. Hem i bin haggem mitufala mo talem, “Yutufala i ol enjel blong mi. Oltaem yutufala i stap taem mi nidim yutufala bigwan. Tangkyu.”

Hem i bin invaetem mitufala i go insaed mo talem long mitufala abaot longfala dei we hem i bin gat blong stap wok wetem wan series situesen blong famli. Mitufala i lisin nomo long hem. Mitufala serem hamas God i lavem hem mo se Hem i no fogetem wanem we hem(sista) i stap go tru long hem. Mitufala i ridim ol skripja wetem hem, mo hom blong hem i bin fulap wetem Tabu Spirit taem mitufala i aot.

Ol disaepol blong Jisas Kraes oli “glad blong leftemap tingting blong olgeta we oli nidim fasin blong leftemap tingting” (Mosaea 18:9). Hem i trastem yumi blong tekpat long bigfala wok blong Hem—hae mo tabu wok blong givhan. Taem yumi tekem taem blong save pipol mo lisin long olgeta, yumi rere blong kam ol enjel blong God long wol ia.

I kam long Talia Rodríguez, Switsalan

Prea i wan impoten pat we i mas stap long medel blong wok blong givhan olsem Sevya. Prea i save statem fasin blong yumi blong lukaotem blong save huia blong blesem. Hemia i save helpem yumi kam blong andastanem wanem we heven i wantem blesem. Prea tu i wan ki step blong stap lanem olsem wanem blong mekem diuti blong yumi.

Hasban blong mi, Mario, i bin safa long KOVID eli bifo oli faenem meresin blong sik ia. Bisop i bin askem wan elda blong wod blong mifala, Moronae, blong givim wan prishud blesing long hem.

From hem i no wantem se bae i kasem sik ia mo pasem long famli blong hem, Moronae i nidim konfemesen blong heven bifo hem i go givim blesing. Hem i nildaon wetem waef blong hem long prea, mo stap wet long wan stret ansa we i save givim pis. Taem tufala i filim pis ia, waef blong hem i talem long hem “Go wetem klos blong faet blong yu, Moronae.”

Taem hem i kam insaed long hom blong mitufala, mitufala i luk wan soldia blong Lod. Hasban blong mi i krae wetem glad taem i luk strong brata ia i kam blong givim long hem, blesing we hem i wantem. !Hem i wan eksperiens we i gat paoa!

Sevya i bin kam tru long wan wokman blong Hem, gudfala brata Moronae, we i putum ol han blong hem long hed blong Mario mo blesem hem olsem we Kraes bae i mekem.

I kam long Morais Freitas Duarte, Bresil

Wan taem mi bin givhan long wan sista we i bin stop blong kam long jos. Taem mi bin visitim hem, bae mi serem long hem hamas Sevya i lavem hem mo famli blong hem. Bae mi invaetem olgeta oltaem blong kam long jos long Sandei we i stap kam. Mi stap mekem olsem blong wan longfala taem, be oli neva kam. Mi filim tingting blong mi i kam slak. Temtesen blong givap i strong. Be evri taem we mi mo kompanion blong mi i visitim hom blong olgeta, mitufala i gat wan lukluk blong heven. Oltaem bae mitufala i pikjarem olgeta long tempol, oli dresap long waet. Mitufala i save se mitufala i mas gohed blong traem.

Afta plante prea mo visit, dei ia i bin kam—!famli ia oli bin kam long jos! Mo oli gohed blong stap kambak evri wik. Famli ia i bin wokhad blong mekem fet blong olgeta i gro mo blong kasem rod blong kavenan. I bin klia se gospel i bin givim paoa long olgeta.

Long en, mi bin risivim wan invitesen blong go long tempol siling blong olgeta. Taem mi stap wajem tabu odinens ia, mi no save stop blong krae wetem glad. I bin wan merikel.

Wanwan taem mi bin wantem blong givap. Be evri taem we mi bin stap visitim olgeta, mi bin stap luk tempol. God i bin soem long mi wan smol pat blong plan blong Hem we i gat long famli ia. Hem i bin yusum mi olsem wan tul blong Hem blong stap toktok wetem olgeta. Mi talem tangkyu long Hem blong soem long mi tru visen blong mekem wok blong givhan.

Glad mo paoa blong mekem wok blong givhan yumi faenem taem yumi kam wan blesing long laef blong wan narawan, mo stap givim seves long olgeta olsem we Sevya bae i mekem. Rilif Sosaeti Jeneral Presiden Camille N.Johnson i tijim se “long ol taem we yu stap mekem eni samting blong helpem narawan—long saed blong bodi o long saed blong spirit— … yu stap karem olgeta i kam long lav blong Kraes. Mi testifae se taem yu mekem olsem, bae yu kasem blesing blong faenem help blong yu we i kam tru long Hem.”

Yumi kam moa olsem Sevya long ol wok blong givhan blong yumi taem yumi tanem yumi i go long Lod blong i helpem yumi long ol efot blong yumi. Yumi folem ol kwaet toktok blong spirit, kam blong save olgeta we yumi stap givim seves long olgeta, prea from olgeta, helpem olgeta mo kipim ol kavenan, mo yumi gohed blong mekem ol efot.

Wok blong givhan blong Sevya—wan afta wan—i wan gudfala wei blong yumi folem (luk long 3 Nifae 11:15). Olsem Elda Juan Pablo Villar blong ol Seventi i tijim: “Sapos yumi folem Jisas Kraes—Masta blong givhan— mo givhan long ol narawan olsem Hem bae i mekem, Hem bae i givim yumi paoa mo mekem yumi kam strong. Tru long wok blong givhan blong yumi, yumi save blesem laef blong ol narawan’ mo faenem pis mo glad blong yumiwan.”