“Mi Filim Pis long Hat blong Mi,” Liahona, Julae 2025.
Ol Pikja blong Fet
Mi Filim Pis long Hat blong Mi
Olsem wan studen nes, mi filim se mi no gat inaf taem long koling blong mi long Jos mo ol stadi blong mi. Be mi bin lanem long yut blong mi se blong givim seves mo stap obei long ol komanmen blong God, i lid i go long wan hapi laef.
Ol foto i kam long Kristina Smit
Long yang laef blong mi, mi gat tingting ia blong lego Jos Ia blong Jisas Kraes blong Ol Lata-dei Sent. Be long semmak taem, mi bin luksave se mi no bin folem evri tijing blong Jos. Mi disaed se sapos mi wantem blong lego Jos, mi wantem blong filim gud abaot hemia.
So, mi disaed blong traem blong obei long evri samting we gospel i tijim. Afta, sapos mi filim insaed long mi se ol tijing ia i no stret long mi, mi save livim Jos mo no rigret.
Wetem ful “paoa long tingting, maen mo ful paoa blong mi” (Doktrin mo Ol Kavenan 4:2), mi traem blong obei long wanem we Lod i tijim mo wajem wanem bae i hapen afta. Truaot long eksperiens ia, mi bin gat wan taem blong stap hapi kasem wan digri we mi neva bin eksperiensem bifo. Blong stap nomo long Jos, mi bin filim se mi save laef long wan hapi laef, mo mi save wanem i tru hapines.
Afta long eksperiens ia, mi bin disaed blong go long wan misin mo serem pis ia we mi bin filim long hat blong mi. Nomata ol hadtaem we bae mi go tru long hem, mi bin lanem se sapos mi prea long God, Hem bae i helpem mi, givim mi hop, mo helpem mi andastanem risen blong ol hadtaem blong mi.
?Wanem Nao Mi Mas Mekem?
Afta long misin blong mi, taem mi stap stadi blong kam wan nes, mi spenem fulap taem evri dei blong mekem praktis trening. Afta long hemia, bae mi mekem ol homwok asaenmen kasem 2 o 3 klok long moning. Mo afta bae mi slip smol bifo mi mekem sam moa praktis trening long nekis dei.
Long taem ia, mi stap givim seves olsem Yang Man presiden. Hem i bin had tumas long mi blong stadi mo mekem koling blong mi long Jos. Mi bin save se sapos mi stop long koling blong mi, yet, bae mi no save tijim ol yang man abaot olsem wanem i impoten blong folem rod blong God o kasem ol blesing we Hem i gat i stap blong mi.
?Wanem nao mi mas mekem?” Mi bin askem Papa long Heven. “Bodi mo maen blong mi i no wok stret, mo mi no ting se mi stap mekem wok ia we Yu wantem mi blong mekem.”
Afta we mi prea, mi bin filim kamfot. Mi filim se God i stap talem long mi se, “Taem ia we yu stap spenem blong stap wokhad i impoten blong yu. Bisi taem tebol blong yu maet i had, be sapos yu winim jalenj ia naoia, bae mi yusum yu blong blesem mo helpem plante man long fiuja.”
Ansa ia i givim mi hop se mi gat wan wok blong mekem, se sapos mi gohed strong, bae mi save mekem wan spesel wok long fiuja.
Mi bin talemaot long ol yang man olsem wanem skul i bin had tumas long mi. Be mi talem long olgeta tu se Jos mo gospel i impoten mo i mas stap long medel long laef blong yumi iven long medel blong ol hadtaem. Mi talemaot lav blong mi long olgeta mo talem se mi stap traehad blong mekem koling blong mi from olgeta oli impoten tumas long mi olsem ol stadi blong mi. Wota blong ae blong olgeta i foldaon taem trutok blong ol samting ia i tajem hat blong olgeta.
Kasem Blesing blong Stap Givim Seves
Taem mi gohed blong givim seves long ol yang man ia mo tijim gospel long olgeta, mi tingting fulap abaot ol filing blong konfius blong ol yia we oli yang, taem oli stap kam long jos mo stap lanem abaot gospel. Mi lukluk nomo long helt blong olgeta long saed blong tingting mo helpem olgeta wetem wanwan nid blong olgeta.
Blong stap givim seves long ol yang man i bin helpem mi blong mekem i kam antap skil ia blong lukluk gud mo luksave ol smosmol jenis long pipol. Naoia we mi wok olsem wan nes mo stap lukaotem taosen long ol sikman, mi bin yusum skil ia taem mi stap wok mo toktok wetem ol narawan.
“Sikman ia i talem se yu andastanem gud ol filing blong hem,” wan we mitufala i wok tugeta i talem. O wan sikman bae i talem, “Mi faenem i isi blong toktok long yu.”
Blong stap mekem ol koling long Jos i bin blesem mi long hom tu. Mi bin lanem blong putum faswan waef blong mi, taem mi lanem blong no stap tingbaot miwan.
“Sapos mi mi Papa long Heven,” bae mi askem miwan, “?olsem wanem bae Hem i mekem famli ia i kam strong, mo wanem nao bae mi stap mekem blong kasem ol samting ia?”
From mi bin stadi long gospel wetem ful hat blong mi, mi save olsem wanem mo from wanem mi mas tijim ol pikinini blong mi se Jos i impoten. Mi mo waef blong mi, mitufala i save olsem wanem blong fidim famli blong mitufala long saed blong spirit from ol tijing blong mitufala i stap nomo long ol tijing blong Sevya.
Mi filim hop mo pis long hat blong mi taem mi stap folem ol tijing mo stap lisin long ol insperesen blong Hem. Hem i bin stap long saed blong mi long wokbaot blong mi, i stap blesem mi taem mi stap obei, mo ol koling blong blesem mo helpem ol narawan. Nomata long ol hadtaem, mi wantem laef long wan wei we mi save mekem wanem we Jisas Kraes i wantem (luk long 2 Nifae 32:3).