“Lav blong Sevya mo Wari blong Hem long Wan Ia,” Liahona, Julae 2025.
Lav blong Sevya mo Wari blong Hem long Wan Ia
Oli bin askem yumi blong lavem mo givhan long wanwan olsem we Jisas Kraes i mekem—wan afta wan.
Pikja i kam long Alex Nabaum
Sot taem afta long baptaes blong mi long Ogis 1984, mi bin harem se bae i gat wan naes aktiviti wetem miusik mo bae oli rus , i no longwe long ples we mi stap long hem long Kwekwe Simbabwe. Mi mo ol fren blong mi, mifala i glad tumas blong go, be i stap long wan Sandei. Ol fren blong mi oli no ol memba blong Jos.
Mi bin talem long olgeta, “ Bae mi go long Jos, be bae mi haed mo ronwe afta long sakramen miting mo joenem yufala.”
Ol fren blong mi, we oli save ol wiknes blong mi, oli bin talem, “Sapos yu mekem olsem bae yu mestem mifala. Long taem we bae yu kam, kaekae bae i finis.”
Mi gat wan joes blong mekem. ?Bae mi go long jos o long kaekae ia? Mi bin jusum blong go long kaekae be mi bin faenemaot long Sandei moning se oli bin kanselem. Long taem ia, i bin let tumas blong mi go long Jos, mekem mi bin stap nomo insaed long smol rum we mi rentem.
Eli long aftenun ia, mi bin harem wan voes: “ Eddie Dube i stap long ples ia?”
Hem i branj Presiden blong mi, John Newbold, wetem woman blong hem, Jean. !Mi wantem blong haed andanit long bed blong mi! Be bifo mi save mekem eni samting, tufala i bin stanap kolosap long kaliko blong windo we i seraotem rum blong mi long ol nara pat blong haos.
“O, Eddie,” tufala i talem, “mifala i bin misim yu long Jos tedei.”
Mifala i bin toktok blong smoltaem, mo afta we tufala i go, ol kaen toktok blong tufala, “Eddie, mifala i bin misim yu,” i gohed blong go tru long maen blong mi. Mi mi glad tumas from John mo Jean Newbold. Stat long dei ia, mi bin kasem blesing from tufala i bin helpem mi blong luk, long wan wei we i blong miwan, lav mo wari we Sevya blong yumi Jisas Kraes i gat long wan.
Wan afta Wan
Jisas i bin kam long Ol Man blong Nifae olsem man we i girap bakegen long ded afta we Hem i bin stap wetem Papa. Hem i kam blong givim kamfot long ol man. Hem i invaetem olgeta wetem lav:
“Girap mo kam fored long mi, blong yufala i save putum han blong yufala insaed long saed blong mi, mo tu, blong yufala i save filim ol mak blong ol nil long ol han blong mi mo long ol leg blong mi, blong yufala i save gat save se mi mi God blong Isrel, mo God blong ful wol, mo oli bin kilimded mi from ol sin blong wol.
“… Mo samting ia oli mekem, oli go fored wan afta narawan kasem taem we evriwan i go, mo oli luk wetem ol ae blong olgeta mo oli filim wetem ol han blong olgeta, mo oli save gud mo oli talemaot se hem i hem, we ol profet oli bin raetem, se bambae hem i kam.” (3 Nifae 11:14–15; oli ademap italik).
Afta, Sevya i invaetem olgeta blong tekem evriwan we oli bin sik, harem nogud, o “oli gat hadtaem long eni fasin mo hem i bin mekem olgeta i kam oraet evriwan oli kam oraet taem we oli karem olgeta oli go fored long hem. ” (3 Nifae 17:7, 9; oli ademap italik). “Hem i bin tekem ol smol pikinini, wan afta narawan, mo i bin blesem olgeta, mo i bin prea long Papa from olgeta” (3 Nifae 17:21; oli ademap italik).
Blong pikjarem long maen se i bin gat 2,500 pipol we i bin stap long ples ia, i soem tru tingting we i stap daon(luk long 3 Nifae 17:25). Blong bon mo groap long Afrika, oltaem mi pikjarem long maen, Sevya we i stap stanap long san we i saen, stap wet blong hilim, kamfotem, leftemap tingting, mo soem lav long evriwan we oli kam long Hem. Olsem ol disaepol blong Hem, oli bin askem yumi blong lavem mo givhan long wanwan olsem we Jisas Kraes i mekem—wan afta wan.
Go wetem Fet
Presidensi blong Rilif Sosaeti o kworom blong ol Elda long wod o branj blong yu, wetem apruvol blong bisop o branj presiden, oli bin asaenem wanwan man mo ol famli long yu blong yu givhan long olgeta. Sam long olgeta, maet yu no save olgeta. Maet bae yu filim se yu fraet blong visitim, kolem o iven teksem olgeta. Maet yu wari se bae oli no wantem yu long hom blong olgeta. Be ol lida blong yu oli bin prea plante mo tingting long olsem wanem asaenmen ia bae i minim long yu mo ol blesing we i save givim long yu mo ol famli we yu stap givhan long olgeta. From hemia, go wetem fet.
Sam yia i pas, mi bin go wetem wan stek presiden long saotis pat blong Yunaeted Stet blong visitim sam famli bifo wan stek konfrens. Taem mifala i kasem wan hom, wan man we i werem ol rafraf klos i wokbaot i kam long mitufala.
“Yutufala wantem wanem?” hem i singaot strong long mitufala. “!Mi no wantem ol pipol oli stap kam long haos blong mi!”
Mi bin wari taem aksen blong man ia i kam olsem se hem i kros. !Mi bin wantem blong pulum han blong stek presiden mo ron i gobak long trak! Be stek presiden i stap kwaet nomo. “Mifala i sore,” hem i talem. “Mifala i ting se bisop blong yu i letem yu save se bae mitufala i kam.”
Taem tufala i stap toktok mi filim Spirit i strong tumas. Mi karem i kam strong paoa long tingting blong mi, mo kam kolosap long man ia, mo talem, “Dia brata, Presiden Thomas S. Monson [hem i bin profet long taem ia] hem i bin givim mi asaenmen blong kam long ples ia. Mitufala i kam ia blong luk yu. Mi tekem lav blong profet i kam long yu.
Mi bin lukluk long ol ae blong man ia mo luksave se wota blong ae blong hem i stat blong fulap. Hem i stat blong serem ol jalenj blong hem wetem mitufala. Waef blong hem i safa long sik blong tingting. Hem i bin lusum wok blong hem i no longtaem i pas. Hem i no gat kaekae blong fidim ol pikinini blong hem. Stek presiden i givim hop long man ia se Jos bae i helpem hem mo famli blong hem. Mifala i bin gat wan naes visit.
Sam wik afta, mi bin askem stek presiden blong givim wan apdeit. Hem i talem long mi se bisop blong brata ia mo wod kaonsel oli stap helpem hem mo mo waef blong hem, we tufala i no wan memba blong Jos, tufala i bin stat blong stap mit wetem ol misinari.
Fasin blong givhan i stat taem yumi go aot mo helpem ol narawan wetem fet mo lav. Taem yumi go wetem fet, stap trastem Lod, yumi save lukaotem revelesen we i kam long Hem folem ol wei blong Hem mo ol stamba tingting blong Hem long olsem wanem yumi stap givhan long wanwan long ol pikinini blong Hem. Bae Hem i helpem yumi save wanem blong talem mo wanem blong mekem mo bae i givim daereksen long yumi long olsem wanem blong stap “ karem ol hevi samting blong wanwan long olgeta, blong mekem se i nomo hevi,” “krae sore wetem olgeta we oli krae sore ;… mo leftemap tingting blong olgeta we oli nidim fasin blong leftemap tingting” (Mosaea 18:8–9). Taem yumi mekem hemia, bae yumi kam blong save hamas Sevya i lavem wan ia wetem tru hat.
Bae Glad blong Yu I Bigwan Tumas
Kasem tedei, mi mi stap gohed yet blong toktok wetem John mo Jean Newbold. Afta ol yia ia, mi filim glad from lav we tufala i bin soem long mi. Mo tufala i bin filim glad taem tufala i stap luk mi progres long gospel. Hemia i wanem we i save hapen taem yumi mekem wok blong givhan—yumi mo olgeta we yumi givim seves long olgeta, yumi kam kolosap long yumi wanwan mo kam moa kolosap wetem Sevya.
Sevya i bin tijim se: “praes blong wan sol i bigwan long ae blong God. …
!Sevya i bin talem se sapos yumi wokhad long evri dei we yumi gat blong tijim fasin blong sakem sin long ol pipol ia, mo karem wan sol nomo i kam long Hem, bae yumi kasem bigfala glad wetem sol ia long kingdom blong Papa! (Doktrin mo Ol Kavenan 18:10, 15; oli ademap italik).
Sapos wok blong givhan i no bin wan impoten samting long yu, Presiden Russell M. Nelson i bin tijim se “yumi evriwan i save mekem gud mo kam moa gud bitim bifo.” Mi invaetem yu blong jenis mo statem wan niu pej. Mi promes se taem yu tekpat fulwan long wok blong givhan, bae yu faenem ol ansa long ol jalenj we yu stap fesem naoia.
Promes blong Sevya i tru: “Man we i wantem sevem laef blong hem, hem bambae i lusum laef blong hem, be man we i lusum laef blong hem from mi, hem bambae i kasem laef blong hem.” (Matiu 16:25).
Wetem help blong Sevya, yu save kam kaen givhan brata o givhan sista we Hem i nidim yu blong kam olsem mo blong mekem wan jenis long laef blong ol pikinini blong Papa long Heven—wanwan mo evri gudgudfala wan.