“Fet blong Sista Muñoz” Liahona, Julae 2025.
Ol Voes blong Ol Lata–dei Sent
Fet blong Sista Muñoz
“!Merikel! Merikel!” boe ia i singaot strong taem i ron i godaon long rod.
Pikja i kam long Deved Malan/Malan Krietiv
Long 1967, Elda William Danner mo mi i bin tufala fas long ol 20 misinari blong givim seves long Kolombia. Mitufala i gat smol sakses nomo, kasem taem wan man we nem blong hem Raúl, we ol narafala misinari oli bin tijim hem, i bin introdiusum mitufala long famli Muñoz. Spirit i bin strong tumas taem mitufala i tijim famli ia, mo stap testifae abaot Profet Josef Smit mo Restoresen.
“Mi save se ol yang man ia oli stap talem trutok,” Raúl i talem. “Tufala i gat semmak prishud we Jisas Kraes i gat. Tufala i save go long rum antap naoia mo hilim blaen gel blong yutufala, Margarita.”
Sista Muñoz i luk long mi mo i askem, “?Hemia i tru?”
Mi no save toktok olsem wan bigfala samting i blokem trot blong mi. Oli neva traem testemoni blong mi olsem bifo. Mi bin save se ol merikel olsem i nidim wan strong fet. Mi mo kompanion blong mi mitufala i faenemaot afta se ae speselis i bin talem long famli blong Margarita, we hem i nomo save lukluk sikis manis i pas from wan aksiden, se hem bae i nomo save lukluk bakegen.
“Yutufala gat semmak prishud olsem Jisas Kraes,” Sista Muñoz i talem. “Gel blong mi i blaen. Yumi go antap mo hilim hem.”
Mi neva bin witnesem bigfala fet olsem bifo. Hem i olsem waef blong King Lamonae, we i talem long Amon, “mi biliv se bae i hapen folem wanem we yu bin talem” (Alma 19:9).
Elda Danner i anoentem Margarita, mo mi bin silim anoenting ia. Long sapraes blong mi, ol toktok we oli kamaot long maot blong mi oli no kam long mi: “Bae yu hil mo bae yu save lukluk bakegen.” Mi filim se mi mas talemaot ol narafala blesing, we blong talem tu se ol famli memba bae oli help blong bildim Jos long Kolombia. Afta, mi bin stap tingting long miwan se maet mi mekem ol promes we bae oli no save kam tru.
Long nekis dei, yangfala boe blong famli ia i ron i kam stret long rod blong mifala mo i singaot , “!Merikel! !Merikel! !Sista blong mi i save lukluk bakegen!”
Mifala i bin baptaesem 13 pipol long wik ia.
Brata mo Sista Muñoz i kam ol fetful memba blong Jos. Jenis ia we oli kasem, i tekem tu Brata Muñoz we i wok olsem hed blong kastom long Kolombia, i bin help blong mekem gospel i go raon long ples ia. Wan gel i bin givim seves long wan misin; brata blong hem i bin givim seves olsem wan bisop. Margarita i save lukluk bakegen long ful laef blong hem.
Jisas Kraes i talem long olgeta we oli gat fet long Hem, “Long nem blong mi, bambae oli openem ae blong blaenman” (Doktrin mo Ol Kavenan 84:69). Mi save se “evri samting i posibol long olgeta we oli stap biliv” long Sevya (Mak 9:23).