Advaes blong Mi i go long Ol Yang Adalt abaot Deiting mo Mared

Sapos yu bin stap askem se olsem wanem yu stap deit, mi hop se “wetem wan stamba tingting” bae i wan long ol fas ansa blong yu. Bae mi traem mo soem hemia wetem wan eksampol.

Fulap long ol taem blong deit blong mi mo waef blong mi i bin taem mitufala i stap longlongwe long mitufala. Mi mitim Katrin taem mitufala i stap skul long Santiago, Jile. Mitufala i stat blong stap deit, be hem i muv i gobak hom long Antofagasta bifo mi finisim digri blong mi. From mitufala wantem mekem rilesensip ia i gro, bae wan o tu taem long wan manis, mi ron long bas blong 20 aoa i go long Antofagasta long Tosdei aftenun, spenem wiken wetem Katrin (stap go long ol jos seves), mo tekem bas blong wan nara 20 aoa i kambak long Santiago blong stap long klas blong mi long 8:00 klok long moning blong Mandei.

Long ol dei we mitufala i no save stap tugeta mitufala i toktok nomo long fon. From se long taem ia mifala i no gat ol mobael fon, mi bin pem wan fon plan we i letem mi blong mekem ol fri kol long ol pablik fon. Mi spenem ol aoa blong stap long wan pablik fon, mo taem wan i wantem yusum fon, bae mi hang ap mo kolem bak Katrin stret afta we man ia i finis toktok long fon.

Truaot long ol eksperiens ia, from plante samting i traem blong blokem rilesensip blong mitufala, mi bin lanem abaot olsem wanem mi save toktok long Katrin wetem wan stamba tingting.

Mi invaetem yufala blong mekem deiting i hapen wetem wan stamba tingting. Presiden Russell M. Nelson i bin askem yumi blong mekem fasin blong stap olsem wan disaepol i fas mo nambawan samting long laef long yumi. Bae yumi save lukaotem tu fasin blong stap deit wetem wan stamba tingting.

Yumi mas askem ol impoten kwestin ia:

• ?Wanem tingting blong yu abaot laef, famli, mo moa impoten, long Sevya?

• ?Mi save wanem kaen samting yu laekem mo no laekem blong mekem, be wanem filing blong yu abaot gospel?

• ?Wanem i ol standet blong yu?

Ol kwestin we i gat stamba tingting i go tugeta wetem ol aktiviti we i gat stamba tingting. Gat gud taem be tingbaot blong mekem ol samting long saed blong spirit tugeta tu. Mekem ol aktiviti we i save helpem yutufala blong andastanem mo kam blong save gud yutufala.

Fet i winim Fraet

Afta we yutufala i stap deit blong wan longfala taem, bae i had blong mekem desisen ia blong mared. !Mi stap fraet yet kasem taem ia we mi mo Katrin i bin mared!

Stap jusum blong mared bae i wan had desisen, be i no wan desisen we bae yu mekem wantaem nomo. Stap jusum blong mared i minim blong stap jusum blong komitim yuwan bakegen long kompanion blong yu blong taem we i no save finis truaot laef blong yu mo wok tugeta blong stap mekem komitmen ia i kam moa strong.

Taem yu gat ol kwestin abaot mared o gospel, yu mas “stadi gud long hem insaed long maen blong yu; afta yu mas askem [long Lod] sapos hem i raet” (Doktrin mo Ol Kavenan 9:8) Yu mas askem yuwan tu, “Mi mi glad blong jusum blong stap pat long hemia blong ful laef blong mi?”

Taem mi bin mared, sam man i askem mi sapos mi fraet se bae wan dei mi divos olsem papa mo mama blong mi. Be ansa blong mi oltaem i no. Taem mi bin mared, mi disaed se bae mi mekem evri samting blong mekem mared blong mi i wok gud. Hemia i minim blong stap jusum evri dei blong folem Sevya mo stap glad from waef we mi maredem. Mi jusum blong no letem fasin blong divos i tekemaot mi long wan gud mo stret desisen.

Presiden Jeffrey R. Holland, Akting Presiden blong Kworom blong olgeta Twelef Aposol, i bin talem “Taem i gat wan wekap long saed blong spirit, lukaot gud long temtesen ia we bae i karemaot yu long wan gudfala samting. Sapos i bin stret taem yu bin prea abaot wan samting, mo yu bin trastem, mo yu bin laef from, hem i stret naoia. … Fesem ol fasin blong yu blong gat tu tingting. Kontrolem ol fraet blong yu. “No sakemaot tras we yu gat.’”

I tru se i gat fulap long yufala we oli gud tumas mo oli tru long tingting blong olgeta blong faenem wan kompanion. Yu save se hemia i wan gud mo klin tingting, be taem yu faenem i had blong faenem wan we yu save laef gud wetem, bae yu filim se yu stak long progres blong yu long rod blong kavenan.

Folem hemia, Sista Kristen M. Oaks i talem: “Sapos yu faenem yuwan se yu putum wan taem blong wet blong mared, stop blong wet mo stat blong rere. Rere yuwan blong laef—tru edukesen, eksperiens, mo stap mekem ol plan. No wet blong hapines i kam long yu. Lukaotem ol janis blong givim seves mo stap lan. Mo moa impoten, trastem Lod ‘prea long nem blong Lod evri dei, mo stanap strong long fet from ol samting we bae oli kam’ [Mosaea 4:11]. Mi promes se taem bae yu mekem olsem, hapines bae i kam long yu.”

Wokbaot blong kavenan rod blong yu i no stop from yu no mared yet. Yu gat yet ol kavenan blong yu we i joen wetem Sevya. Sapos yu stap fesem, fasin we oli no wantem yu, stap yuwan, o fraet, tekem Hem i kam long ol hadtaem blong yu. Bae Hem i givhan long yu. Bae Hem i helpem yu.

Blong samfala, deiting wetem wan tingting blong faenem wan kompanion blong taem we i no save finis bae i no save hapen kwiktaem. Blong ol narawan yes, bae i save hapen olsem. Nomata wanem, mi save se God bae i save mekem i hapen evri singgel promes we Hem i bin mekem long yumi, sapos yumi tingting strong mo trastem Hem.

Nomata weaples yu stap long hem long wol o wanem we i stap hapen mo no hapen long laef blong yu, from Jisas Kraes, yu save gat glad long eni situesen we yu stap long hem. Hem mo ol tijing blong Hem, oltaem oli ol ansa.