“Givhan long Olgeta we Oli Nogud long smel blong Senta,” Liahona, Julae 2025.
Givhan long Olgeta we Oli Nogud long smel blong Senta
Ol Akomodesen i nidim andastaning mo sore mo lav we i kam long evriwan we oli tekpat.
Ol pikja droing i kam long Elia Sampo
Invitesen blong Sevya blong yumi i blong “evriwan long [yumi] blong kam long hem mo tekpat long gud fasin blong hem; mo hem i no tanem baksaed blong hem long eniwan we i kam long hem” (2 Nifae 26:33). Wan impoten wei blong kam long Sevya i blong stap atendem jos mo stap tekpat long ol jos aktiviti. Samtaem, blong atendem jos i save stap olsem wan jalenj folem ol defdefren risen. Hem i had, speseli long wan man we i stap wetem wan we i gat spesel nid, o i nogud long wan samting, o ol nara medikol kondisen.
Olsem ol disaepol blong Jisas Kraes, yumi wantem evriwan blong filim welkam mo save atendem jos mo ol aktiviti. Eksampol, yumi soem se yumi gat wari long ol pipol we oli nogud long saed blong kaekae taem yumi stap rere long sakramen wetem ol opsen we i no gat gluten [wan kaekae we oli putum long bred blong mekem i tes gud]. Hemia i givim wan janis long wanwan long ol man ia blong tekpat long sakramen mo riniu ol tabu kavenan wetem Lod.
Sam memba oli faenem i had blong atendem jos o ol nara kam tugeta long pablik, from se oli filim nogud kwiktaem long long ol kemikol smel, olsem ol sprei mo ol senta blong bodi. Ol pipol we oli gat ol kondisen olsem sotwin, nogud long smel blong senta, o oli filim nogud kwiktaem long smel blong fulap kemikol, oli moa isi blong harem nogud mo bae oli save gat wan risal bodi i save soemaot hemia. Long saed blong kaekae we man i nogud long hem, yu no save talem se wan man o woman i no gud long wan kaekae, long simpol wei ia blong lukluk long olgeta. Olsem wan risal, oltaem oli no stap luksave ol kaen situesen olsem, be i afektem bigwan paoa blong man o woman ia blong mekem ol nomol aktiviti blong laef.
Ol Saen
Ol saen oli defdefren mo i kam wetem filing blong traot, hed i raon, hed i soa, taet, filing blong wari, ol problem blong pulum gud win, jes mo trot i soa, mo sam moa.
Ol saen oli stat long no series kasem taem i kam series bigwan. Maet wan man o woman i save filim hed i soa we i save finis afta sam aoa, wan narawan i save gat wan bigfala jenis long bodi we i save stap blong plante dei o maet i save gat wan imejensi trip i go long hospital.
Ol filing blong harem nogud kwiktaem long bodi we i hapen tru long kemikol, i save spolem laef blong wan man o woman mo mekem hem i gat filing ia blong stastap hemwan. Wan memba we i gat eksperiens ol nogud saen i eksplenem se: “Ol evri dei aktiviti , olsem go soping, visitim ol fren, stap atendem ol Jos miting, o blong stap go kakae aot, i save stap olsem wan jalenj. Hemia i lid i go long ol filing blong kroskros, seperesen, mo fulap wetem filing blong stastap yuwan. Antap long hemia, samtaem yumi filim se olgeta raon long yumi oli no andastanem yumi mo oli jajem yumi, we oli no ‘luk’ save sik blong yumi mo we oli filim se yumi stap selfis mo yumi nogud from yumi ‘no laekem smel.’”
Wan papa mo boe blong hem tufala i stap kasem gat strong sotwin taem tufala i smelem ol kemikol. Boe ia i stap rere blong toktok long sakramen miting bifo bae hem i stap go long wan misin. Wan wik bifo hem i givim toktok, bisop i bin talem long ol memba se yangfala man ia i gat ol series problem long saed blong smelem ol strong senta blong bodi, mo hem i bin askem ol memba blong tingabaot hemia taem oli kam long jos long wik we bae hem i givim toktok. Hemia i bin hapen long bes Sandei we papa mo boe i eva gat blong atendem jos.
Ol Akomodesen
Insaed long wan jos, wan man o woman we i gat ol filing blong harem nogud kwiktaem long saed blong ol kemikol i save jusum blong sidaon longwe long ol nara pipol. Long ol narawan, bae i nid blong gat ol wei we i moa strong blong protek, olsem blong stap werem wan mask long fes we i klinim ol win we yu pulum, stap karem wan masin blong kilim ea i kam long jos o stap wajem sakramen miting onlaen.
No mata long hamas ol filing blong harem nogud kwiktaem long bodi i series o no series blong wan man o woman blong smelem ol kemikol, hem i impoten blong tingabaot se hemia i wan tru wari. Ol Akomodesen i nidim andastaning, sore mo lav we i go long evriwan we oli tekpat. Ol pipol oli yusum ol senta blong bodi mo ol nara senta from plante risen, olsem yusum wanem we oli laekem, o from haejin blong olgetawan. I nid blong gat ikwol respek mo andastaning blong tokbaot ol nid blong evriwan.
Sapos yu gat ol filing blong harem nogud kwiktaem long bodi from kemikol, plis toktok wetem wan memba blong bisoprik blong yu. Taem we ol akomodesen oli no posibol long evri situesen, bae i gud blong letem ol lida blong wod oli save long nid blong yu. Wod kaonsel i save wok wetem yu blong mekem bes blong olgeta blong helpem yu wetem ol ol filing blong harem nogud kwiktaem long bodi blong yu long saed from kemikol. Stret wei blong tokbaot bae i dipen long ol situesen mo i mas gat balens wetem wan andastaning se bae i no evri situesen i save stretem nid blong evriwan.
Sam aedia blong ol lida:
-
Helpem ol memba oli andastanem se ol ol filing blong harem nogud kwiktaem long bodi from ol kemikol oli wan bigfala wari blong olgeta we oli sik.
-
Oltaem givimaot ol anaonsmen mo ol rimaenda abaot olsem wanem yumi save gat lav mo sore long olgeta we oli stap go tru long ol filing blong harem nogud kwiktaem long bodi from kemikol mo ol nara kondisen blong sik we i mekem wan i stap hemwan mo olsem wanem yumi save helpem evriwan blong joen blong stap wosipim Lod.
-
Tingting blong singaotem wan wod o stek disabiliti speselis blong help blong tokbaot hemia mo ol narafala problem.
-
Tingting blong oganaesem wan trening sesen blong ol lida mo memba abaot ol filing blong harem nogud kwiktaem long bodi from kemikol mo ol nara kondisen we maet i save stopem wan blong tekpat long ol miting blong Jos.
Sam aedia blong ol akomodesen:
-
Givim ol janis blong wanwan man o woman we i gat ol filing blong harem nogud kwiktaem long bodi from kemikol, i serem ol nid mo wari blong olgeta wetem ol wod lida.
-
Sapos i posibol, mekem evri bes blong yu blong mekem plan mo wokemaot ol gaedlaen blong ol miting mo ol aktiviti blong letem ol pipol we oli gat ol filing blong harem nogud kwiktaem long bodi o wetem ol samting we oli nogud long olgeta blong oli filim se i stret blong oli kam.
-
Tingting blong mekem laef vidio onlaen blong ol miting blong olgeta we oli no save kam mo givim sam wei blong wanwan long ol man ia blong tekpat long sakramen.
-
Yusum nomo ol prodak we Jos i apruvum mo we tim blong ol fasiliteta blong Jos oli givim long ol wan miting haos. Sapos wan long ol prodak ia i stap krietem wan problem, wok wetem lokol fasiliti maneja blong faenem ol nara wei blong fiksim. Sapos ol memba oli karem wanwan sprei blong mekem ples i smel naes o ol prodak blong klinap, ol prodak ia i save mekem wan we i nogud long ol kemikol smel i sik.
-
Tingting long ol olgeta we oli nogud long smel blong ol kemikol, taem yu stap mekem plan blong wan aktiviti.
-
Tingbaot long maen se sam pipol wetem oli nogud long smel blong kemikol bae oli laekem blong givim seves insaed long wan eria we i sef long olgeta.
Elda Patrick Kearon blong Kworom blong Olgeta Aposol i bin tijim se: “Long olgeta we oli filim se oli no pat o stap long laen, fasin blong welkam [yumi] i wan impoten samting. Long en, yumi save askem yumi wanwan se, olsem wanem nao bae Sevya i wantem yumi blong gat sakramen ?Olsem wanem nao bae Hem i wantem blong yumi welkamem, kea mo lukaot long wanwan long ol pikinini blong Hem? ?Wanem filing nao Hem i wantem yumi blong filim taem yumi kam blong riniu tru taem yumi wosipim Hem?”
Tru taem yumi stap krietem aweanes blong situesen ia, ol pipol we oli nogud long smel blong kemikol bae oli save filim se yumi harem olgeta, respektem mo blong oli save tekpat fulwan long wod o branj blong olgeta. Taem bisoprik mo wod kaonsel i wok tugeta wetem lav mo sore mo wetem plante prea wetem wanwan long olgeta we oli gat ol kaen siknes long saed blong helt olsem, bae moa long ol pikinini blong Papa long Heven bae oli kam moa strong from oli kasem plante janis blong tekem olgeta i kam kolosap long Jisas Kraes. Taem wan wod i kam tugeta, “hat blong olgeta oli joen tugeta blong kam wan long lav.” (Mosaea 18:21), ol hat oli kasem glad mo hiling.