“Stap Kea: Wan Projek blong Mekem I Kam Moa Gud, Welfea blong ol Woman mo ol Pikinini Raon long Wol,” Liahona, Ogis 2025.
Ol Woman blong Kavenan
Stap Kea: Wan Projek blong Mekem I Kam Moa Gud, Welfea blong ol Woman mo ol Pikinini Raon long Wol
Mifala i tekem i kam lav mo help blong Jisas Kraes i go long ful wol, taem yumi stap kea long olgeta insaed long wanwan hom blong yumi, ol neba mo komuniti blong yumi.
Wok blong Rilif Sosaeti we i kam wetem insperesen i gat ol rus we i draon dip insaed long wok blong yumaniterian mo blong stap kea from olgeta we oli stap long nid, stat long tabu taem ia blong 1842. long 20 senturi, ol Rili Sosaeti sista oli bin sendem ol sid we oli bin storem blong help blong fidim olgeta we oli bin safa from ol disasta mo taem we i no gat kaekae. Oli bin stanemap ol hospital, oli bin helpem ol woman blong atendem ol medikol skul, mo oli bin trenem ol woman long wok blong nes mo midwaef, oli mekem i kam moa gud fasin blong wok blong protektem ol mama we oli gat bel mo ol niu bebi blong oli no lusum laef blong olgeta. Oli bin promotem tu edukesen taem oli stap stanemap ol skul mo ol program blong litresi.
Tedei, kolosap eit milian Rilif Sosaeti sista raon long wol we oli gohed blong komitim olgetawan blong stap kea long olgeta we oli stap long nid. Rilif Sosaeti i sapotem ol eksperiens blong ol woman blo tekem mo kasem ol help we i kam long Sevya—long saed blong bodi mo spirit—i go long evri pikinini blong God. Taem ol sista oli givim mo kasem help blong Sevya, oli kam moa olsem Hem, oli filim lav blong Hem, kavenan rilesensip blong olgeta wetem Hem i kam moa strong.
Stamba tingting blong mekem i kam moa gud, welfea blong ol woman mo ol pikinini raon long wol i wan eksperiens—wan janis blong tekem i kam help long saed blong spirit mo bodi, i go long evri pikinini blong God. Yumi mekem olsem wetem Spirit blong Hem, Prishud atoriti, mo paoa blong Hem, we yumi kasem taem yumi stap kipim ol kavenan blong yumi wetem Hem.
Wetem stamba tingting ia, yumi lukaotem blong mekem i posibol wan bigfala samting i hapen blong stap blesem laef blong ol woman mo ol pikinini tru long ol fofala eria blong fokas.
-
Nutrisen blong ol pikinini
-
Medikol kea we oli givim long woman we i gat bel mo ol niu bon bebi
-
Imiunaesesen
-
Edukesen
?From wanem yumi stap putum nomo ol paoa, ol hat mo ol risos blong yumi long wan wolwaed stamba tingting blong mekem I kam moa gud welfea blong ol woman mo ol pikinini? From yumi biliv se progres i stat wetem ol woman mo ol pikinini raon long wol. Presiden Johnson i tijim se: “Taem yu blesem wan woman, yu blesem wan famli, wan komuniti, wan nesen. Taem yu blesem wan pikinini, yu stap bildim fiuja we bae i blong gud blong yu.”
Olsem pat blong wolwaed stamba tingting, Fas Presidensi i bin apruvum $55.8-milian blong Jos i lidim stamba tingting blong muvum kwik i kam moa gud, nutrisen mo helt-kea long 12 kantri we oli gat hae nid. Jos i wok wetem eit ki we i no gavman oganaesesen, Jos i bin sapotem ol program we oli mekem i kam gud helt mo gud blong ova 14 milian pikinini mo ol niu mo ol woman we bae oli kam ol mama long 2024.
Presiden Camille N. Johnson i visitim wan mama blong tri pikinini long wan taem blong donetem kakae long Costa Rica. Presiden Johnson i talem se: “Sista ia i glad tumas from kaekae blong ol pikinini blong hem we oli hanggri”. “Mi bin talem long hem se mi lavem hem, be moa impoten , se God i lavem hem.”
Stap Pat blong wan Impoten Samting
Taem mi (Presiden Johnson) i bin visitim Costa Rica las yia, mi bin gat janis blong help wetem taem we oli stap donetem kaekae. Mi bin glad blong mitim plante woman mo ol pikinini we oli kam blong kasem wan helti kaekae. Mi gat wan strong filing mo tingting we i kam long spirit se yumi stap mekem stret wanem we Sevya bae i wantem yumi blong mekem. Mi bin mitim Yumana mo tri naesfala pikinini blong hem. Gudfala woman ia i stap salem ol ros flaoa we oli mekem aot long riben we hemwan i mekem, blong save stap provaeda long famli blong hem. Hem i bin glad tumas blong gat wan kaekae blong ol pikinini blong hem we oli hanggri. Mi bin talem long hem se mi lavem hem, be moa impoten, se God i lavem hem. Yumana i bin kasem wan help long saed blong ol samting blong wol mo help long saed blong spirit taem hem i bin filim mo luksave lav blong God.
Yumi luk wolwaed stamba tingting ia, i pat long wok blong sevem man mo blong kam olsem wan god. Taem ol pipol i stap kasem help long saed blong ol samting blong wol, yumi hop mo wantem blong luk se oli filim lav blong Lod long olgeta mo bae oli wantem blong kam insaed o mekem i kam moa strong kavenan rilesensip blong olgeta wetem Hem.
Ol efot blong mekem i kam moa gud helt mo gud blong ol woman mo ol pikinini i mekem i hapen tabu responsabiliti blong kea from olgeta we oli stap long nid. Yet stamba tingting ia i stap blesem ol pipol long ol narafala wei:
-
Hem i mekem i kam antap save mo paoa long saed blong bodi blong jeneresen we i stap kam antap, i stap helpem olgeta blong kasem paoa blong olgeta long saed blong spirit.
-
Hem i mekem ol wei blong helpem ol neba mo ol fren blong yumi, plante long olgeta we oli wantem tu blong lanem olsem wanem blong helpem wanwan pikinini blong olgeta.
-
Hem i givim wan wei we medel blong hem, i gat gospel we i talemaot ol seves we i gat mining mo ol janis blong givhan long ol woman, speseli ol yang adalt woman.
Jeneresen blong ol yang adalt blong tedei oli wantem blong stap pat long wan impoten samting, wan samting we i mekem tru jenis long wol. Mifala i hop se wolwaed stamba tingting ia bae i helpem ol sista blong luk se olgeta oli bin pat finis long wan long ol bigfala samting blong wol: tabu oganaesesen blong Lod blong ol woman insaed long Jos ia blong Hem we i bin kambak, Rilif Sosaeti.
Mifala i bilif se wolwaed stamba tingting ia bae i givim insperesen long ol memba blong yumi mo ol fren blong givim seves long wanwan komuniti blong olgeta. Mifala hop se bae oli luksave hemia:
-
Jos Ia blong Jisas Kraes blong Ol Lata-dei Sent i stap fokas long ol problem we i stap afektem ol woman mo ol pikinini mo i stap donetem ol risos blong mekem i kam moa gud helt mo gud blong olgeta.
-
Jos mo Rilif Sosaeti blong hem, oli ol lida blong ful wol blong stap tokbaot ol problem blong yumaniterian.
-
Oli lidim mo oganaesem Rilif Sosaeti o aot long ol woman we oli stap mekem i kam gud ol laef blong ol wanwan man mo woman, ol famli mo ol komuniti.
Hem ia i wan stat nomo blong wan samting we moa gud i bitim wanem i nomol we bae i blesem laef blong plante we bae oli givim mo oli kasem help blong Sevya tedei, mo long ol yia we bae i kam, taem wolwaed stamba tingting ia i gohed blong progres.
Wan medikol profesonol i stap wok long wan smol pikinini long Filipin. Nutrisen blong pikinini i wan long ol fo eria fokas blong Jos wolwaed stamba tingting blong mekem I kam moa gud welfea blong ol woman mo ol pikinini.
Paoa We I Raonem Ples We Yumi Stap long Hem
Taem yu lukluk raon long wol, Jos i ripresentem wanwan long yumi olsem ol memba we i stap tekem i kam tugeta ol oganaesesen we oli gat ol man we oli gat eksperiens blong stap tokbaot mo stretem ol bigfala problem long ples we i longwe. Be yet, nambawan yumaniterian help i hapen kolosap long hom blong yu taem yu givhan i go krosem fanis o rod. Yu yu stap laef folem ol kavenan blong yu mo stap tekpat long wolwaed wokabaot taem yu tekem aksen wetem fasin blong Kraes blong gat lav mo wetem lav, kea from olgeta long famli blong yuwan, ol neba mo komuniti blong yu.
?Maet bae yu no save fiksim ruf blong neba blong yu o travel i go long wan nara kantri blong klinim haos blong ol nara man afta long wan hariken, be yu save rid long wan pikinini, lisin long wan fren we i stap gotru wan hadtaem o donetem wan fas ofring? Evri efot i gat valiu mo i impoten long wok ia blong kea long olgeta we oli stap long nid. Tangkyu blong save stap olsem wan rod we tru long hem ol narawan i save kasem help blong Sevya taem yu stap olsem ol han blong Hem we i kaen, ol leg blong Hem we i lid, mo ol sora blong Hem we oli save lisin, ol maot blong Hem blong talem ol toktok we oli kaen.
Taem Jos i tekem i kam tugeta ol oganaesesen blong wok tugeta from help mo welfea blong ol woman mo ol pikinini long ol defdefren kantri, ol Rilif Sosaeti sista i tekem i kam tugeta ol pipol blong tokbaot mo stretem ol jalenj long wanwan komuniti blong olgeta. Ol woman blong Rilif Sosaeti oli luksave ol nid, karem i kam tugeta ol risos, mo help blong tokbaot ol jalenj. Bae yumi mekem olsem wetem help blong Spirit, blong stap tekem lav mo help blong Jisas Kraes i go long evri pikinini blong God.
Blong stap luk ol nid blong olgeta we oli muv i kam long wan niufala ples, blong milian, Itali, ol Rilif Sosaeti sista oli bin oganaesem wan seves blong givim long olgeta ol klos mo ol samting blong haos. Sam sista oli donetem ol samting we oli jes yusum nomo, mo ol narawan oli oganaesem mo klinim ol donesen ia. Wanwan donesen blong ol sista i impoten. Ol Rilif Sosaeti sista oli helpem ol visita blong filim lav blong Jisas Kraes taem oli kam long donesen senta. Monia, wan lokol Rilif Sosaeti sista, i talem se: “Aot long ol smol samting i kam ol big samting. Mo yumi save blesem ol pipol insaed mo aotsaed long Jos. Hemia i gospel we i tekem aksen.”
Taem hem i stap toktok long niufala oganaesesen blong Rilif Sosaeti, Profet Josef Smit i talem long ol sista se:,“Naoia yu yu stap long wan situesen we yu save tekem aksen folem ol fasin blong soem lav we God i putum insaed long hat blong yu.”
Taem hem i stap long Guadalajara, Mexico, Sista Yee i bin lanem abaot mo luk plante gudfala eksampol blong ol sista we oli stap tekem aksen folem ol fasin blong soem lav taem oli stap lukaotem blong givhan long wan nid long ples ia.
Wan long ol sista ia i Sista Pulido, we i bin luk wan nid long lokol hospital blong helpem wanwan man mo woman mo ol famli we oli kam longwe mo oli nidim kaekae mo klos taem oli stap wet blong kasem tritmen. Hem i karem i kam tugeta 120 Rilif Sosaeti sista, sam misinari, mo ol narawan insaed long komuniti blong faenem ol donesen blong kaekae, wota, ol blangket mo ol klos. Abaot 1,500 pipol oli bin donetem ol samting, mo ol sista mo ol narawan oli priperem ol lanj mo kaekae blong kolosap 1,200 pipol. Oli bin givim ol samting long olgeta we oli stap wet blong kasem tritmen long hospital.
Sista ia i se hem i stap mekem olsem from se hem i gat bigfala lav long ol pipol ia. Wetem wota blong ol ae, wetem tingting i stap daon, hem i eksplenem se hem i bin wan long olgeta ia we i stap wet long hospital taem hasban blong hem i bin kam mo i bin go from tritmen blong kansa. Hem i talem se bigfala blesing mo tingting blong hat blong hem i blong givhan olsem we Sevya bae i mekem.
Stap Givim Help Olsem blong Sevya
Ol sista, oli bin givim responsabiliti long yumi wetem tabu wok blong tekem i kam help blong Sevya—long saed blong bodi mo spirit—i go long ful wol. Mo yumi save mekem olsem taem yumi stap lukaot long olgeta we oli stap raon long yumi we yumi save helpem. Hemia i wan presen mo wan blesing. Blong stap pat long wolwaed stamba tingting blong mekem i kam moa gud blong ol woman mo ol pikinini i wan eksperiens we i tekem yumi i go kolosap long Sevya. Blong stap tekem aksen olsem we bae Hem i mekem, yumi filim lav blong Hem; mo wantem blong hat blong yumi, mo komitmen blong, wan kavenan rilesensip blong yumi wetem Hem i gro.
Tangkyu blong helpem mifala i tekem i kam lav mo help blong Jisas Kraes long ol sista mo ol brata long evri ples.
Blong stap traem blong folem Jisas Kraes, wanem we i impoten long yumi i blong yumi olsem ol disaepol blong Hem, i blong luksave ol stret man we oli nidim help mo tekem aksen wetem fasin blong wet longtaem wetem lav.
Presiden Russell M. Nelson i talem long yumi long 2024 Wolwaed Rilif Sosaeti Devosen, “Mi blesem yufala blong luksave se ol tabu presen blong yufala olsem wan pikinini gel blong God, i givim paoa long yufala, !i no blong jenisim ol laef nomo be, blong jenisim wol!”
!Hemia nao i wanem yumi sud mekem!
Hem i wan gudfala taem blong stap olsem ol woman blong kavenan mo ol memba blong wan sosaeti we i karem i kam help blong Sevya—long saed blong bodi mo spirit— i go long ol sista mo ol brata raon long wol. Bigfala gol blong stap givim help mo fasin blong dipen long yuwan, i blong priperem wei blong ol sista mo brata blong yumi blong gat wan tingting blong hat blong wantem mo kasem lav mo sore we i stap oltaem blong mekem mo kipim ol kavenan wetem God.
Mifala i talemaot testemoni blong mifala se Jisas Kraes i help ia mo se help ia we Hem i givim i blong taem we i no save finis.